Samu
115 Obe Yehova, bumpau keti bwije kuli yetu, keti bwije kuli yetu,
Oloni bwije ku lizina lyobe
Mwafwa ya cizemo cobe cije kucesi kutenguluka na kulongwa kwobe.
2 Bika bibendekela baka-mafuti ngwabo:
“Njambi yabo ali kuli?”
3 Njambi yetu ali mwilu.
Akalingi byoshe byashaka.
4 Tumponya babo bapwa ba siuva na goldi,
Bapwa bipangi bya maboko a banu.
5 Bali na tunwa, oloni kubasa kwendeka.
Bali na mesho, oloni kubasa kumona.
6 Bali na matwi, oloni kubasa kuziba.
Bali na majulu, oloni kubasa kuziba bweko.
7 Bali na maboko, oloni kubasa kukwata.
Bali na mendi, oloni kubasa kwenda.
Ha milibu yabo kuhasa kutunda lijwi.
8 Baje bakabapanga bapwa ngwe bakebo
Na baje boshe banakulahela aba tumponya.
9 Eni baIsalele, kulaheleni Yehova.
Ikeye mukwasi weni na ntelo yeni.
10 Eni bakunjibo ya Aloni, kulaheleni Yehova.
Ikeye mukwasi weni na ntelo yeni.
11 Yeni mukazibila Yehova lyoba, kulaheleni Yehova.
Ikeye mukwasi weni na ntelo yeni.
12 Yehova atwanuka, co atubezikisa.
Abezikisa bakunjibo ya Isalele.
Abezikisa bakunjibo ya Aloni.
13 Abezikisa baje bakazibila Yehova lyoba,
Bakama na babandondo.
14 Yehova amitumisa,
Yeni na bana beni.
15 Yehova amibezikise,
Uje watangele lilu na lifuti-libu.
16 Melu apwa a Yehova,
Oloni lifuti-libu nalyana bana ba banu.
17 Batsi kubesi kushangazala Jah
Nambe baje baya mu mwela wa kwoloka kubesi kumushangazala.
18 Oloni yetu tushangazala Jah
Kushwa hano kutwala ku myaka yoshe.
Shangazaleni Jah!*