Isaya
51 “Njitolilileni, yeni muli na kushakezeka kusungama,
Yeni muli na kushakezeka Yehova.
Taleni ku limanya kubamimungwile
Na ku bwina bwa mamanya kubamindile.
2 Taleni kuli ishweni Abrahamu
Na kuli Sala uje wamikitile.
Mwafwa wapwile likalyendi munjamusanene,
Co njamubezikisile na kutumisa bana bendi.
3 Mwafwa Yehova akazembeleka Siyone.
Akazembeleka bibumbe byayo bije binapujuka,
Co akapwisa shwata yayo ngwe Edeni
Na kupwisa mambo yayo ngwe lihya lya Yehova.
Kulisamba na kubwahelela bikakalamo,
Mukakala kukandelela na myaso yaibwa.
4 Njitolilileni, eni banu bange,
Jendekeleni matwi eni kuli yange, eni banu bange.
Mwafwa lishiko likatunda kuli yange,
Co kwakula kwange kwakubwa njikacizameka ngwe ceke ku miyati ya banu.
5 Kusungama kwange kuli muyehi,
Kwobola kwange kwija hali yeni,
Co maboko ange akasompa miyati ya banu.
Banu ba ha mañanda bakalabelela kuli yange,
Co bakabandamena liboko* lyange.
6 Anduleni mesho eni mwilu,
Na kutala ha lifuti-libu.
Mwafwa melu akalishandoka ngwe bwisi.
Lifuti-libu likahwila ngwe cizalo,
Co baje bakalaho bakatsa ngwe tungeningeni.
Oloni kwobola kwange kupwa kwa myaka yoshe,
Co kusungama kwange kukukahu.*
7 Njitolilileni, yeni muzibuka kusungama,
Eni banu muli na lishiko* lyange mu bimbunge byeni.
Keti muzibe lyoba mwafwa ya banu baje bali na kumishendumuna,
Co keti mulijujukile mwafwa ya matuka abo.
8 Mwafwa tulongolo bakabalya ngwe cizalo.
Tulongolo baje bakali bizalo bakabalya ngwe baje balya bwanda.
Oloni kusungama kwange kukalako myaka yoshe,
Co kwobola kwange nakwo kukalako ku bisemwa byoshe.”
9 Obe liboko lya Yehova, lingako bimo,
Eyo, lingako bimo na kumwesa nzili yobe.
Lingako bimo ngwe muwalingilile kusañulu, ku bisemwa bya kunima.
Kuma keti yobe wasanyozwele Rahabu?*
Kuma keti yobe watibile cikashama wa mu kalunga-ndonga ndi?
10 Kuma keti yobe womisile kalunga-ndonga? Keti yobe womisile mema a ha nzinga ndi?
Kuma keti yobe womisile nzinga ya kalunga-ndonga na kuipwisa ngila mangana baje bawasokwele baitemo ndi?
11 Banu ba Yehova banapatula bakeluka.
Bakaija ku Siyone oku batambeka mu kubwahelela,
Bakazala cilongo ca kubwahelela simbu yoshe,
Bakalisamba na kubwahelela,
Co busiwa na miteto bikahwa.
12 Yange njili na kukuzembeleka.
Bika biuzibila lyoba munu uje atsa
Na muna munu uje ajujwama ngwe mwila wa kuzibuluka?
13 Bika biwibalela Yehova uje wakutangele,
Uje wajangumwine melu na kujala lubula lwa lifuti-libu?
Simbu yoshe wakele na kutewa butenu bwa muka-kulyatelela,*
Ngwe uje asa kukunyongesa.
Hanwoni butenu bwa muka-kulyatelela buli kuli?
14 Uje ibanakulamesa oku ali mu malyenge ololo bamupatula,
Katsi na kuya mu bwina,
Co lalo kajeneka byakulya.
15 Oloni yange Yehova Njambi yobe,
Uje akangwanjanga kalunga-ndonga na kulingisa mankimba endi atenuke,
Lizina lyange yange Yehova wa maswalale.
16 Njaka majwi ange mu kanwa kobe,
Na kukufwika na munzinze wa liboko lyange,
Mangana njizameke melu na kujala lubula lwa lifuti-libu
Na kuleka Siyone ngwange, ‘Mu banu bange.’
17 Induka! Induka! Katuka, obe Jelusalema,
Yobe unanu butenu bwa mu nganja ili mu liboko lya Yehova.
Unanu mu nganja,
Unatsembe binakala mu nganja bije bilingisa munu atalyangele.
18 Hakati ka bana banakiti, naumo wahi amutwamenena,
Co ku bana banalele, naumo wahi namukwatelela ku liboko.
19 Ebi byuma bibali binakuwana.
Iya akuzibila mema ku mbunge?
Kubihya na kunyonga binakuwana, njala na mukwale nabyo binakuwana,
Iya akuzembeleka?
20 Bana bobe banalezumuka.
Bali na kulala ha masambwa-ngila hoshe
Ngwe bimanga ba mu shwata baje bali mu bwanda.
Butenu bwa Yehova bunabepukila mu kushula, Njambi yobe nabatenukila.”
21 Ngeci shukulu-kambu, tolilila ku byuma ebi,
Obe munakazi wa kuyanda na kupenda, nameme keti binyu binakupendesa.
22 Mwata wobe Yehova, Njambi yobe uje akalwila banu bendi ngwendi:
“Tala! Njikambata nganja ili mu liboko lyobe ije ilingisa munu atalyangele,
Nganja yange ya butenu,
Co kuukanumo lalo.
23 Njikayaka mu maboko a baka-kukuyandesa,
Baje bakulekele ngwabo, ‘Bulumana twende ha mwongo wobe.’
Co walingisile mwongo wobe upwe ngwe hasi,
Ngwe tapalo muje mubenda.”