Ezekiele
16 Yehova wanjilekele lalo ngwendi: 2 “Muna munu, leka Jelusalema bilinga byendi bya bunyengwe. 3 Unapande kwendeka ngwobe, ‘Mwata Wahakamwa ya Byoshe Yehova nendeka kuli Jelusalema ngwendi: “Yobe watunda ku lifuti lya baKanana, co kukekwo kuwasemukilile. Isho wapwile kaAmoli, co noko wapwile kaHiti. 4 Co ha litangwa liwasemukile, ñowa yobe kubaibatwile, co lalo kubakutanesele na mema mangana ujele. Kubakukwitile mwongwa, co lalo kubakuzengelele mu binanga. 5 Naumo wahi wakuzibilile ngozi mangana akulingile ebi byuma. Wahi wakuzibilile mema ku mbunge, oloni bakumbilile mu shwata mwafwa bakuzindile ha litangwa liwasemukile.
6 “‘“Munjakele na kwita, njakumwene uli na kulinjandungula mu maninga obe, co muwalalele mu maninga obe, njendekele ngwange: ‘Uyoya.’ Eyo njendekele kuli yobe oku unalala mu maninga obe ngwange: ‘Uyoya.’ 7 Njakupwisile mbunga yakama ngwe bimena bije bimena mu shwata, co wakolele na kupwa mumbanda. Co wakele na kuzala byuma bya kulicakeya byabibwa. Mabele obe akolele, co binkambu byobe nabyo byakolele, oloni anga wacikele mushelengwa.”’
8 “‘Munjakele na kwita, njakumwene, co njanangukile ngwange unakolo, co unapuho kukumwesa cizemo. Ngeci njakufwikile cizalo cange mangana njifwike mushelengwa wobe, co njalisingile na kulinga nobe cikumiiyo, co wapwile wange,’ ngwendi Mwata Wahakamwa ya Byoshe Yehova. 9 ‘Kutundaho, njakutanesele na kutundisa maninga obe, co njakukwitile mazi. 10 Njakuzikile cizalo ca kutaleka na kukwana masanda a cilambu cacibwa* na kukubungila mu lineni yaibwa, co njakuzikile bizalo bya kutula. 11 Njakuzikile byuma bya kulicakeya na kukuzika maseka ku maboko obe na lilyenge mu singo yobe. 12 Co lalo njakwakele riñi ku lijulu na masikiyo ku matwi na kukuzika cilongo cacibwa ku mutwe. 13 Co watwaleleleleho kulicakeya byuma bya goudi na siuva, co bizalo byobe byapwile bya lineni yaibwa na binanga bya kutula na bizalo bya kutaleka. Fulawa yaibwa na buki na mazi, bikebyo biwakele na kulya, co wakolele na kupwa uwamubwa manene, co wapandele kupwa lishano.’”
14 “‘Lutsimo* lwobe lwajalakanene mukati ka baka-mafuti mwafwa ya bubwa bwobe. Bubwa bwobe kubwakele na kapenga mwafwa yange njakulingisile upwe uwamubwa manene,’ ngwendi Mwata Wahakamwa ya Byoshe Yehova.”
15 “‘Oloni washangumukile kukulahela bubwa bwobe, co wapwile lihule mwafwa ya lutsimo lwobe. Walingile buhule camulingila na munu woshe wakele na kwita mu ngila, co bubwa bwobe bwapwile bwendi. 16 Wambatele bizalo byobe bimo bya mibala yaibwa na kukabipangesa mu kubwahesa myela ya kulunduka kuje kuwakalingilile buhule. Ebi byuma kubyapandele kulingiwa, co lalo kubyapandele kukalingiwa. 17 Co lalo wambatele byuma byobe bya senga bya goudi na siuva bije binjakwanene na kupangaho tumponya ba banalume na kulinga nabo buhule. 18 Co wambatele bizalo byobe bya kutaleka na kubafwikabyo,* co wabanene mazi ange na isense yange. 19 Co likende lije linjakwanene lya kupanga ha fulawa yaibwa na mazi na buki, lije linjakwanene ngwange ulye, nalyo walyanene kuli aba tumponya mangana linene lwengo lwalubwa. Ebi bikebyo bene biwalingile,’ ngwendi Mwata Wahakamwa ya Byoshe Yehova.”
20 “‘Wambatele bana bobe ba banalume na ba banakazi baje bawanjikitilile na kubalambula ku tumponya. Kuma bilinga byobe bya buhule kubyatubakanesele ndi? 21 Watsiile bana bange ba banalume na kubana kupwa milambu ha kubenyeka mu tuhya. 22 Muwakele na kulinga bilinga byobe bya bunyengwe na bilinga byobe bya buhule kuwanukile matangwa awapwile mwanike muwakele mushelengwa oku ulinjandungula mu maninga obe. 23 Lubinda lwobe, eyo lubinda lwobe, mwafwa unalingi ebi byuma byoshe byabibi,’ ngwendi Mwata Wahakamwa ya Byoshe Yehova. 24 ‘Walipangelele malundu na myela ya kulunduka mu myela ya mbunga yoshe. 25 Unatungila myela yobe ya kulunduka mu myela ya kutsimana manene, mu bitapalo byoshe, co unalingisa bubwa bwobe butenguluke kupwa cuma ca bunyengwe ha kulyana ku munu woshe aita mu ngila, co bilinga byobe bya buhule binatumu. 26 Walingile buhule na bana ba Ijipiti ba banalume baje bawatunga nabo baje bakala na lishungu lyakama, co wanjilubalesele mwafwa ya bilinga byobe byabingi bya buhule. 27 Njikakulwisa na liboko lyange na kutepulula ku byakulya byobe na kukwana mu maboko a banakazi baje bakuzinda, bana ba baFilistiya ba banakazi baje bakomokele mwafwa ya bilinga byobe bya shwamwa.
28 “‘Wakalingile buhule na bana ba Asiria ba banalume mwafwa kuwajaukile, oloni munima ya kulinga nabo buhule anga bene kuwajaukile. 29 Ngeci watwaleleleleho kulinga buhule mu lifuti lya baka-mingoso* na kulinga buhule na baKaudiya. Nameme ngoco, anga bene kuwajaukile. 30 Mbunge yobe yakele na kubinja* muwakele na kulinga ebi byuma byoshe, muwakele na kulinga ngwe lihule wa kujeneka shwamwa,’ ngwendi Mwata Wahakamwa ya Byoshe Yehova. 31 Oloni muwalipangelele malundu mu myela ya kutsimana mu bitapalo byoshe, na myela ya kulunduka mu myela ya mbunga yoshe, kuwapwile ngwe lihule mwafwa wakele na kubyana kukufweta. 32 U munakazi wa cikoi uje akai ku banu beka na kuseza munalume wendi. 33 Banu bakana bwana mahule boshe, oloni yobe uli na kwana bwana boshe baje bali na kukushungwiya, co uli na kubajamba mangana baije kuli yobe, co lalo uli na kubajamba mangana batunde ku mitambela yoshe bakulinge nobe buhule. 34 Unaliseze na banakazi bakweni baje bakalingi buhule. Naumo wahi akalingi buhule ngwe muuli na kubulinga. Yobe ukafwete bakweni, co bakebo kubesi kukufweta. Buhule bwobe bunaliseze nobu bwa bakweni.’
35 “Ngeci, obe lihule tolilila lijwi lya Yehova. 36 Mwata Wahakamwa ya Byoshe Yehova nendeka ngwendi: ‘Omwo unakala na lishungu lyakama manene, co bushwamwa bwobe bunasholoka muunakala na kulinga buhule na mapangala bobe na tumponya bobe ba bunyengwe,* baje baunana mulambu wa maninga a bana bobe ba banalume, 37 ngeci njikakungulwila hamo mapangala bobe boshe baje bawazibisile kubwaha, boshe baje bawazemene na baje bawazindile. Njikabakungulwila hamo kutunda ku mitambela yoshe mangana bakulwise, co njikakushulwila ha mesho abo, co bakamona bushwamwa bwobe bwoshe.
38 “‘Co njikakusompa na kukwana kashitiko kaje kanapande banakazi baje bakalingi bukoi na banakazi baje baketile maninga, co baketila maninga obe mwafwa ya kulubala na lifuwa. 39 Njikakwana mu maboko abo, co bakapujula malundu obe na kusiula myela yobe ya kulunduka, co bakakushulula bizalo na kukunyeka byuma byobe bya kulicakeya byabibwa na kukuseza mushelengwa. 40 Bakakunenela mbunga ya banu, co bakakwasha mamanya na kukutsiya na mikwale yabo. 41 Bakenyeka binjibo byobe na tuhya na kukusompela ha mesho a banakazi babangi, co njikamanesa buhule bwobe, co ukecela kubafweta. 42 Njikatula matoto ange, co kulubala kwange kukahwa. Mbunge yange ikatula, co hakeho hakukahwila kulubala kwange.’
43 “‘Omwo kuwanukile matangwa obe a ku bwanike, co wanjilubalesele ha kulinga ebi byuma byoshe, hanwoni njikulingisa uliwane na bukalu butunda mu bingila byobe,’ ngwendi Mwata Wahakamwa ya Byoshe Yehova, ‘co kuukatwalelelaho kulinga byuma bya shwamwa na bilinga byobe byoshe bya bunyengwe.
44 “‘Tala! Woshe uje akendeka bisimo, akapangesa eci cisimo kuli yobe ngwendi: “Muli mwana muli ina!” 45 Unapu lika ngwe noko uje wazindile munalume wendi na bana bendi, co unapu ngwe bandokazi bobe baje bazindile bana babo na banalume babo. Noko wapwile kaHiti, co isho wapwile kaAmoli.’”
46 “‘Yayobe wa munakazi napu Samaliya uje ali ku kunto* na bana bendi ba banakazi,* co shongo yobe wa munakazi uje ali ku mbwela* napu Sodoma na bana bendi ba banakazi. 47 Kuwakabangeyeye lika bingila byabo na bilinga byabo bya bunyengwe, oloni mu kasimbu kakandondo lika, yobe walingile byuma byabibi manene kutubakana bibalingile bakebo. 48 Mwata Wahakamwa ya Byoshe Yehova nendeka ngwendi: ‘Njilisinga ha kuyoya kwange ngwange ndokazi yobe Sodoma na bana bendi ba banakazi kubalingile byuma biunalingi yobe na bana bobe ba banakazi. 49 Tala! Ou ukewo mulonga wa ndokazi yobe: Ikeye na bana bendi ba banakazi balyalesele, co bakele na byakulya byabingi, co lalo bakele mu kwoloka kwa kujeneka bishoti, oloni kubakwasele baka-kuyanda na tuhutu. 50 Batwaleleleleho kulijundula na kulinga byuma bya bunyengwe ku mesho ange. Ngeci njamwene ngwange kunapande kubanyongesa.
51 “‘Co lalo bubi bwalingile Samaliya kubwetele nambe ha hafu ya bubi buwalingile. Yobe watwaleleleleho kulinga byuma byabingi bya bunyengwe kutubakana bibalingile bakebo, kwetoni na ha simbu ibasholokele bandokazi bobe ngwe banu ba kusungama mwafwa ya bilinga byobe byoshe bya bunyengwe. 52 Ngeci shwamwa ikulye mwafwa unakundwiya bilinga bya bandokazi bobe. Omwo unalingi byuma bya bunyengwe byabingi kutubakana bakebo, banapwoni ba kusungama kutubakana yobe. Ngeci unashauka, co lalo shwamwa ikulye mwafwa unalingisa bandokazi bobe basholoke ngwe ba kusungama.’
53 “‘Co njikakungulula bafunge babo, bafunge ba Sodoma na bana bendi ba banakazi na bafunge ba Samaliya na bana bendi ba banakazi. Njikakungulula lalo bafunge bobe hamolika nabo, 54 mangana shwamwa ikakulye, co ukaziba shwamwa mwafwa ya byuma biunalingi mangana ubazembeleke. 55 Ndokazi yobe Sodoma na bana bendi ba banakazi bakapwa ngwe mubapwile ha kulibanga. Co lalo ndokazi yobe Samaliya na bana bendi ba banakazi nabo bakapwa ngwe mubapwile ha kulibanga, co nobe na bana bobe ba banakazi mukapwa ngwe mumwapwile ha kulibanga. 56 Ha litangwa liwalyalesele kuwapandele nambe kwendeka bya ndokazi yobe Sodoma, 57 simbu kanda bubi bwobe busholoke. Hanwoni bana ba Siria ba banakazi na baje batunga nabo bali na kukushaula. Co bana ba Filistiya ba banakazi baje boshe banakuzengeleka bali na kukushendumuna. 58 Uliwana na bukalu butunda mu bilinga byobe bya shwamwa na bilinga byobe bya bunyengwe,’ mukemwo mwanendeka Yehova.”
59 “Mwafwa Mwata Wahakamwa ya Byoshe Yehova nendeka ngwendi: ‘Hanwoni njikulinga ngwe muunalingi, mwafwa unombwanesa biwalisingile kuli yange omwo unapokola cikumiiyo cinjalikumiiye nobe. 60 Oloni yange njikanuka cikumiiyo cinjalikumiiye nobe ku bwanike bwobe, co njikalinga nobe cikumiiyo ca myaka yoshe. 61 Ukanuka futisi yobe, co ukaziba shwamwa muukatambula bandokazi bobe, bayayobe hamolika na bishongo bobe. Co njikakwanabo mangana bapwe bana bobe ba banakazi, oloni kunjikalingi ngoco mwafwa ya cikumiiyo cinjalikumiiye nobe.’
62 “‘Co yange njikalinga nobe cikumiiyo, co ukazibuka ngwobe yange Yehova. 63 Ukanuka biwalingile, co ukaziba shwamwa kwashama mu kanwa na kwendeka mwafwa ukashauka munjikakonekela bubi bwobe nameme unalingi byuma byoshe ebi,’ ngwendi Mwata Wahakamwa ya Byoshe Yehova.”