Jelemiya
10 Eni bakunjibo ya Isalele, tolilileni majwi anendeka Yehova kuli yeni. 2 Yehova nendeka ngwendi:
“Keti mulilongese ngila ya baka-mafuti,
Co lalo keti mutewe bimweso bya mwilu,
Mwafwa baka-mafuti bali na kubitewa.
3 Mwafwa bisemwa bya banu binapu byangoco.
Bakatete lika muti wa mu shwata,
Co ngangula aushonga na cikwata cendi.
4 Bakaubwahesa na siuva na goudi,
Co bakambata sando na kuupameya bimbambo mangana keti uwe.
5 Aba tumponya kubasa kwendeka ngwe mwa cikwisiso cili mu lihya lya binende.*
Kubanga kubajundula mwafwa kubasa kwenda.
Keti mubazibile lyoba mwafwa kubasa kumibulumuna,
Nambe kumilingila cuma cacibwa.”
6 Wahi napu ngwe yobe, obe Yehova.
Wapwa u wakama, co lizina lyobe lyapwa lyakama, co lalo lya nzili.
7 Iya kapandele kukuzibila lyoba lyakama, obe Mwene wa mafuti? Unafwila kukuzibila lyoba,
Mwafwa hakati ka baka-mana boshe ba baka-mafuti na mu bumwene bwabo bwoshe,
Naumo wahi napu ngwe yobe nameme kamandondo.
8 Boshe kubesi kusinganyeka, co lalo bilema.
Bilongesa bya kutunda ku citi binapu byangoco.
9 Siuva ya kulipasha bakaitundisa ku Tashishi, co goudi bakaitundisa ku Ufazi.
Banapu bipangi bya ngangula, bipangi bya muka-kufula.
Bizalo byabo byapwa bya bulombo bwa blu na pepo.
Boshe banabapanga ku bitongwe.
10 Oloni Yehova wapwa Njambi bene.
Wapwa Njambi wa kuyoya na Mwene wa myaka yoshe.
Mwafwa ya butenu bwendi, lifuti-libu likaninganga,
Co kukwesi muyati ukasa kwimana mwafwa ya kulubala kwendi.
11 Unapande kukabaleka ngwobe:
“Binjambi baje kubatangele melu na lifuti-libu
Bakanyonga ha lifuti-libu na mwisi ya melu.”
12 Ikeye watangele lifuti-libu na nzili yendi,
Ikeye wazamekele lifuti-libu kupangesa mana endi,
Co ikeye wajangumwine melu na kuzibisisa kwendi.
13 Mwakatuhula lijwi lyendi,
Mema a mwilu akangwanjanga,
Co lalo akalingisa mashelwa akanduke kutunda ku mamaneselelo a lifuti-libu.
Akanene mihyato ya nyonzi,*
Na kulingisa lihunzi lihuwe kutunda mu bishete byendi.
14 Banu boshe bali na kulinga byuma kwa kujeneka kuzibisisa, kwa kujeneka mana.
Baka-kufula boshe bakaziba shwamwa mwafwa ya tumponya babanafulu.
Mwafwa tumponya babo ba bikubo banapu ba makuli,
Co kubesi na mwonyo.*
15 Banapu bangoco, banapu byuma bibasembulula banu.
Litangwa lya kubelwisila bubi bwabo mulikaija, bakanyonga.
16 Njambi* ya Jakobu kapwile ngwe ebi byuma,
Mwafwa ikeye watangele byuma byoshe,
Co Isalele napu mulamu wendi na buswana bwendi.*
Lizina lyendi ikeye Yehova wa maswalale.
17 Ambata ciputu cobe
Obe munakazi ibanazengeleka.
18 Mwafwa Yehova nendeka ngwendi:
“Ha simbu oyo, njikandandumuna boshe baje bali mu lifuti,
Co njikabalingisa baliwane na bukalu.”
19 Njabindama mwafwa ya kubetwa.
Mbandu yange kuyasa kwola.
Co njendekele ngwange: “Cili bene ou ukewo mushongo wange, co njinapande kulitala nawo.”
20 Tenti yange banaibiisa, co mikole ya tenti yange banaibatozola.
Bana bange ba banalume bananjiseze, co bahi.
Wahi anjijangumwinako tenti yange nambe kunjishukikila binanga byange.
21 Mwafwa tunyungi bange banalingi byuma bya bulema
Co kubehwile Yehova.
Mukemwo kubalingile byuma bya mana,
Co butanga bwoshe bwalishandoka.
22 Tolilileni! Kuli na kwija muzimbu.
Kuli na kuzibika banu bali na kuliuya ku lifuti lya ku kunto,*
Bali na kwija na kunyongesa binganda bya Juda mangana bipwe bingundu na membo a bimbanje.
23 Obe Yehova, njizibuka mwamubwa ngwange ngila ya munu kuyesi mu nzili yendi.
Munu uje ali na kwenda kesi na nzili nameme ya kutwamenena linambo lyendi.
24 Yehova njinangule na kusompa kwobe,
Oloni keti oku unalubala, mangana keti unjinyongese.
25 Itila butenu bwobe hali baka-mafuti baje banakuliula
Na ha binaanga bije kubyesi na kusana ha lizina lyobe.
Mwafwa banabwondo Jakobu,
Eyo, banamubwondo kweta na ha kumunyongesa,
Co limbo lyendi banalipwisa ngundu.