Jelemiya
7 Yehova walekele Jelemiya ngwendi: 2 “Ya ukemane mu cikolo ca njibo yange Yehova na kukendeka ou muzimbu ngwobe, ‘Tolilileni lijwi lya Yehova yeni banu ba mu Juda muli na kukobela muno mu bikolo mangana mwakutsikamene Yehova. 3 Yehova wa maswalale, Njambi ya Isalele nendeka ngwendi: “Tengululeni bingila byeni na bilinga byeni, co njimitabesa mutwaleleleho kukala omu mu mwela. 4 Keti mukulahele majwi a makuli na kwendeka ngweni, ‘Ei tempele ya Yehova, tempele ya Yehova, tempele ya Yehova!’ 5 Mwafwa nga cili bene mutengulula bingila byeni na bilinga byeni, nga cili bene mwakula mwamubwa munu na mukwabo yatunga nendi, 6 nga kumuyandesa baka-kwija baje banaija na kukala neni nambe bisiwa nambe bifwile, nga kumwitila maninga a kujeneka mulonga, co lalo nga kumukabangeya binjambi beka baje baminenela bukalu, 7 co njikamitabesa ngwange mutwaleleleho kukala omu mu mwela, mu lifuti linjanene bakukulwila beni ngwange bakalemo myaka yoshe.”’”
8 Oloni muli na kukulahela majwi a makuli aje kuwasa kumikwasa nambe kamandondo. 9 Kuma mwasa kwiba na kutsiya banu na kulinga bukoi na kulisinga ha biñanda bya makuli na kwana milambu kuli Bale na kukabangeya binjambi baje kumwazibukile, 10 co kutundaho mwija na kwimana kulutwe lwange muno mu njibo ije imanena lizina lyange na kwendeka ngweni, ‘Twoboka,’ okuni muli na kulinga byuma byoshe bya bunyengwe ndi? 11 Kuma muli na kumona ngweni ei njibo imanena lizina lyange inapu mwela wa kubanda mapwepwe ndi? Njinalimwena bimuli na kulinga,” mukemwo mwanendeka Yehova.
12 “Aciyeni ku mwela wange ku Shilo, mwela uje wabangele kwimanena lizina lyange mukamone munjinaulingi mwafwa ya banu bange ba Isalele. 13 Oloni munatwalelelaho kulinga byuma byoshe ebi,’ mukemwo mwanendeka Yehova. ‘Nameme njinelukila-ilukila kumyendekela, oloni kumwazibile. Njinatwalelelaho kusana, oloni sheni kukumbulula. 14 Ngeci, byuma binjinalingi ku Shilo bikebyo binjikalinga noku ku njibo imanena lizina lyange, ei njibo imunakulahela, nou mwela unjamyanene na bakukulwila beni. 15 Njikamishekela kulako ngeci munjashekele bandolome beni boshe, batekulwila ba Efremu boshe.’
16 “Oloni yobe keti ulombelele aba banu. Kesi ulile mwafwa yabo nambe kubalombelela nambe kunjilambelela mwafwa yabo mwafwa kunjikutolilila. 17 Kuma kuwesi na kumona bibali na kulinga mu binganda bya Juda na mu bitapalo bya Jelusalema ndi? 18 Bana ba banalume bali na kucaba bikuni, bisemi ba banalume bali na kubweka tuhya, co banakazi babo bali na kutika fulawa mangana bapange makende a mulambu a kwana kuli Mwene wa Munakazi wa Mwilu,* co bali na kwitila mulambu wa byakunwa ku binjambi beka mangana banjilubalese. 19 Yehova nendeka ngwendi, ‘Kuma yange bali na kubulumuna ndi? Kuma keti bakebo babenya bali na kulibulumuna na kulikokela shwamwa ndi?’ 20 Ngeci, Mwata Wahakamwa ya Byoshe Yehova nendeka ngwendi, ‘Taleni! Butenu bwange na kulubala kwange njikabitila ha mwela ou, ha banu, na ha bikashama, na ha miti ya mu shwata na ha bushuka bwa hasi. Bukabyenyeka, co wahi akabuzima.’
21 “Yehova wa maswalale, Njambi ya Isalele ngwendi, ‘Twaleleleniho. Ku milambu yeni ikwabo, bwezeleleniko na milambu ya bwana bwa kwenyeka, co mukabulye yeni babenya. 22 Mwafwa ha litangwa linjatundisile bakukulwila beni mu lifuti lya Ijipiti kunjabalekele nambe kubashika ngwange banjane bwana bwa mutunu bwa kwenyeka nambe milambu embwe. 23 Oloni njabashikile ngwange: “Ononokeni lijwi lyange, co mupwa banu bange. Munapande kwenda mu bingila byange binjimishika mangana byuma bimyendele mwamubwa.”’ 24 Oloni kubatolililile nambe kujendeka matwi abo ngwabo bazibe embwe, oloni bakabele biyongola byabo, co batindibalele na kukabangeya bimbunge byabo byabibi. Belukile munima, kubaile kulutwe, 25 tunde bene ha litangwa libatundile bakukulwila babo mu Ijipiti kweta na lelo lino. Ngeci njatwaleleleleho kutuma bangamba bange boshe, njatumine tupolofweto bange kuli yeni, njakele na kubatuma litangwa na litangwa, kwilukila na kwilukila. 26 Oloni aba banu babyanene kunjitolilila, co kubajendekele matwi abo mangana bazibe. Batindibalele, co balingile byuma byabibi kutubakana bije bibalingile bakukulwila babo.
27 “Ukabaleka majwi oshe awa, oloni kubakakutolilila. Ukabasana, oloni kubakakukumbulula. 28 Co ukabaleka ngwobe, ‘Ou ukewo muyati uje kuwatolilile lijwi lya Yehova Njambi yawo, co unabyana kuunangula. Kulongwa cinahumo, nameme kucendeka bene kubesi na kucendeka.’
29 “Tehuleni binkambu byeni na kubyumbila kuti, co katuleni mbimbi ha malundu mwafwa Yehova nabyana eci cisemwa cinamulubalesa, co naciseze. 30 ‘Mwafwa banu ba mu Juda banalingi byuma byabibi mu mesho ange,’ mukemwo mwanendeka Yehova. ‘Banaka tumponya ba bunyengwe mu njibo ije imanena lizina lyange mangana baijwalese. 31 Banatungu myela ya kulunduka mu Tofethi ije ili mu Cingulunga ca Muna Hinomu mangana benyeke bana babo ba banalume na bana babo ba banakazi mu tuhya, cuma cije kunjabashikile, cije kanda njisinganyekeho.’
32 “‘Ngeci, Taleni! matangwa ali na kwija,’ mukemwo mwanendeka Yehova, ‘omwo ou mwela kubakausana lalo ngwabo Tofethi nambe Cingulunga ca Muna Hinomu, oloni bakausana ngwabo Cingulunga ca Kutsiila. Bakatsinda banu mu Tofethi kweta noho hakukajenekela mwela wa kutsindila. 33 Co bibimbi byaba banu bikapwa byakulya bya tuzila na bikashama, co wahi akabasheka. 34 Njikamanesa miyoyo ya kulisamba, na miyoyo ya kubwahelela. Kubakazibi lalo lijwi lya cambato na lijwi lya shombolwa mu binganda bya Juda na mu bitapalo bya Jelusalema mwafwa lifuti likapwa ngundu.’”