Jelemiya
19 Yehova nendeka ngwendi: “Ya ukalande njaba ya buma kuli muka-kumunga byuma bya buma. Ambatako bamo ku bakulunu ba banu na bakulunu bamo ku bakulunu ba tupilistu, 2 co ya ku Cingulunga ca Muna Hinomu, ku bukobelelelo bwa Cikolo ca Bimbazubwila bya Buma. Muuketa kuje ukendeke majwi anjikuleka. 3 Ukabaleke ngwobe, ‘Tolilileni lijwi lya Yehova eni bimyene ba Juda neni bimyene mwakala mu Jelusalema. Yehova wa maswalale, Njambi ya Isalele nendeka ngwendi:
“‘“Ololo njinena bukalu muno mu mwela, co woshe akaziba byobu bukalu akalikomokela.* 4 Njikabanenela obu bukalu mwafwa bananjiseze na kulingisa ou mwela usholoke kupwa wa bungenzi kuli yange. Omu mu mwela bananenamo milambu ku binjambi beka baje kubazibukile, baje lalo kubazibukile bakukulwila babo na bimyene ba Juda. Co banashulisa ou mwela na maninga a banu ba kujeneka mulonga. 5 Batungilile Bale myela ya kulunduka mangana benyekeleho bana babo ba banalume kupwa bwana bwa mutunu bwa kwenyeka kuli Bale, cuma cije kunjabashikile nambe kubaleka, cije kanda njisinganyekeho.”’
6 “‘“Ngeci, Taleni! matangwa ali na kwija,” mukemwo mwanendeka Yehova, “omwo ou mwela kubakausana lalo ngwabo Tofethi nambe Cingulunga ca Muna Hinomu, oloni bakausana ngwabo Cingulunga ca Kutsiila. 7 Njikatanganesa butumbe bwa Juda na Jelusalema muno mu mwela, co njikabalingisa batse ku mukwale wa bitozi babo baje bashaka kubatsiya, co bibimbi byabo njikabyana ku tuzila na kubikashama ba ha lifuti-libu kupwa byakulya. 8 Co ei nganda njikaipwisa cuma ca kukomokesa na cuma cije cibakumbila banu milozi, co boshe bakaitako bakakomoka mubakaimona na kukumba milozi mwafwa ya bukalu bunaizila. 9 Co njikabalingisa balye situ ya bana babo ba banalume na bana babo ba banakazi, co umo na umo wabo akalya situ ya mukwabo munu mwafwa ije nganda bakaizengeleka, co bakakala mu bukalu mwafwa ya bitozi babo baje bakashaka kubatsiya.”’
10 “Kutundaho, ukatikile ije njaba ha mesho a baje banalume baukaya nabo, 11 co ukabaleke ngwobe, ‘Yehova wa maswalale nendeka ngwendi: “Omu mukemwo munjikatika aba banu nei nganda, ngwe munu uje atika njaba yanamungu muka-kumunga byuma bya buma, mangana keti base kuimunga lalo, co bakatsinda banu mu Tofethi kweta noho hakukajenekela mwela wa kubatsinda.”’
12 “Yehova nendeka ngwendi: ‘Ebi bikebyo binjikalinga kuli ou mwela na ku banu bakalamo. Njikapwisa ei nganda ngwe Tofethi. 13 Co binjibo bya mu Jelusalema na binjibo bya bimyene ba Juda na binjibo byoshe bije bibanenene milambu ha biluli ku bingongonosi byoshe na ha biluli habetililile milambu ya byakunwa ku binjambi beka, byoshe bikapwa bya kujwala ngwe ou mwela wa Tofethi.’”
14 Jelemiya mwelukile kutunda ku Tofethi kuje kwamutumine Yehova ngwendi akapolofwete, wemanene mu lilapa lya njibo ya Yehova na kuleka banu boshe ngwendi: 15 “Yehova wa maswalale Njambi ya Isalele nendeka ngwendi, ‘Njinena bukalu hali ei nganda na ha bimbongi byayo byoshe buje bunjinendeka, mwafwa banatindibala na kubyana kwononoka majwi ange.’”