Jelemiya
49 Yehova nendeka kutalesa ku baAmoni ngwendi:
“Kuma Isalele kesi na bana ndi?
Kuma kesi na swana ndi?
Mwafwa bika Maukamu nambata buswana bwa Gadi?
Co mwafwa bika banu bendi bali na kuyoya mu binganda bya Isalele?”
2 “‘Ngeci, taleni! matangwa ali na kwija,’ mukemwo mwanendeka Yehova,
‘Omwo njikalingisa cilumo ca nzita bacizibe ku Laba ya baAmoni.
Amoni ikapwa ngundu na kupwa mutumbo wa bisiwila,
Co binganda bije binaizengeleka bakabyenyeka.’
‘Co Isalele akaswana boshe baje bamushekele,’ ngwendi Yehova.
3 ‘Mbolozoka obe Heshiboni, mwafwa Ai banainyongesa.
Lileni eni bimbongi binazengeleka Laba.
Zaleni bikeleya.
Mbolozokeni na kwendangana mu limba libanatungu na mamanya,
Mwafwa Maukamu bamutwala mu bufunge,
Hamolika na tupilistu bendi na bamyata bendi.
4 Obe mwana wa munakazi wa kujeneka kulongwa,
Mwafwa bika ulyalesela bingulunga na kulyalesela byana bya bwilo?
Uli na kukulahela bufuko bwobe,
Co wendeka ngwobe: “Iya aija na kunjilwisa?”’”
5 “Mwata Wahakamwa ya Byoshe, Yehova wa maswalale nendeka ngwendi: ‘Njiminenela cuma ca kutewesa
Kutunda ku banu boshe baje banamizengeleka.
Bakamishandwela mu mitambela yoshe,
Co naumo wahi akakungulula baje bali na kutewa.’”
6 “‘Oloni mu kwita kwa simbu, njikakungulula bafunge ba baAmoni,’ mukemwo mwanendeka Yehova.”
7 Yehova wa maswalale nendeka kutalesa kuli Edomu ngwendi:
“Kuma mana anahumo mu Temani ndi?
Kuma baka-kuzibisisa kubesi oni na binangulo byabibwa ndi?
Kuma mana abo anabolo ndi?
8 Eni mwakala mu Dedani,
Mingulukeni na kutewa. Yeni mukalishweke mu binema bya kuloba.
Mwafwa njinenela Isau bukalu
Simbu ya kumwana kashitiko muyeta.
9 Nga baka-kuteja bushuka bwa binyu baija mu lihya lyobe,
Kuma kubasezeko bumo mangana bakwabo bapupulule ndi?
Nga bezi baija butsiki,
Bebako lika bibatonda.
10 Oloni Isau njikamushulula na kumuseza mushelengwa.
Njikajombolola myela yendi mwakabanda,
Mangana keti awane kwa kubanda.
Bana bendi na bandolome bendi na banu batunga nabo, boshe bakabanyongesa,
Co kakakalako lalo.
11 Seza bana bobe baje kubesi na ishabo,
Co njibanyungilila,
Co bifwile bobe banjikulahela.”
12 Yehova nendeka ngwendi: “Tala! Nga baje kubasompelele nganja banapande kuinwa, kuma yobe bakuseza ngoco kwa kujeneka ku kwana kashitiko ndi? Kubakuseze ngoco, mwafwa unapande kuinwa.”
13 Yehova nendeka ngwendi: “Njilisinga hali yange babenya ngwange Bozila akapwa cuma ca kukomokesa, bakamushaula na kumunyongesa na kumusinga, co binganda byendi byoshe bikapwa bingundu myaka na myaka.”
14 Njinazibi muzimbu wa kutunda kuli Yehova,
Banatumu katumwa kuli baka-mafuti mangana akendeke ngwendi:
“Likungululeni, co yeni mukamulwise.
Libwaheseleni nzita.”
15 “Mwafwa tala! Njinakupwisa wamundondo hakati ka mafuti,
Banu bali na kukwombwanesa.
16 Obe wakala mu myela ya kubanda ya mu mamanya,
Obe wakala ha lilundu lyalilaha manene,
Unalikwisi yobe babenya mwafwa wajajesele bakweni,
Co lalo mwafwa mbunge yobe yapwa ya kulyalesa.
Nameme unatungila lishwa lyobe mwilu ngwe ngonga,
Oloni njikakupalumunamo,” mukemwo mwanendeka Yehova.
17 “Edomu napande kupwa cuma ca kukomokesa. Banu boshe baje bakaita kuyehi nendi mubakamumona bakalikomokela na kukumba milozi mwafwa ya bukalu bwoshe bunamwizila. 18 Ngecilika mubanyongesele Sodoma na Gomola na binganda bije byakele hayehi nabyo, nomu mu nganda “wahi akakalamo, co wahi akatungamo,” ngwendi Yehova.
19 “Taleni! Munu umo akaija na kubiisa bulilo bubananyungilila mwamubwa ngwe ndumba uje ali na kutunda mu shwata ya kuzika ya ku Jodani, oloni njikamulingisa atewe mu lifuti lyabo. Co njikangula ntwama uje napu wa kwangula mangana atwamenene eli lifuti. Mwafwa iya nalifu nange, co iya asa kulwa nange? Kanyungi muka asa kwimana kulutwe lwange? 20 Ngeci, eni banu tolilileni byuma byanangula kulinga Yehova kutalesa kuli Edomu na byuma byanayongola kulinga kutalesa ku banu bakala mu Temani:
Cili bene bana ba bimanga bakabapalangeya.
Akalingisa myela ibakala ipwe bingundu mwafwa ya byuma bibanalingi.
21 Cilumo ca kwandumuka kwabo cinalingisa lifuti liningange.
Kuli na kuzibika miteto!
Cilumo caco banacizibi na ku Kalunga-ndonga wa Kubenga.
22 Taleni! Akakanduka na kusikumuka ngwe ngonga,
Co akajangumwina mambaba endi hali Bozila.
Ha litangwa olyo, bimbunge bya baka-kulwa ba Edomu
Bikapwa ngwe mbunge ya munakazi uje ashaka kupapa.”
23 Ou ukewo muzimbu wa kusompa Damasika:
“Hamathi na Apadi banabazibisa shwamwa.
Mwafwa banazibi muzimbu waubi.
Bali na kuziba lyoba.
Banapu ngwe kalunga-ndonga uje natenuka uje kubasa kwolwesa.
24 Damasika nalijujukila.
Natenguluka ngwendi atewe, oloni lyoba linamuwana.
Bukalu na kubabala binamuwana
Ngwe munakazi uje ali na kupapa.
25 Mwafwa bika nganda ije ibakashangazala
Na mbongi ya kubwahelela kubabyumbilile kuti?
26 Mwafwa bakwenje bendi bakawila mu myela yendi ya mbunga,
Co ha litangwa olyo, maswalale bendi bakanyonga,” mukemwo mwanendeka Yehova wa maswalale.
27 “Njikashwameka tuhya ha bibumbe bya Damasika,
Co tukenyeka tuposhi twa kukola twa Beni-hadadi.”
28 Yehova nendeka kutalesa kuli Keda na bumwene bwa Hazole buje bwaanyongesele Mwene Nebukadineza* wa Babiloni, ngwendi:
“Katukeni, yeni ku Keda.
Yeni mukanyongese bana ba ku Butuhukilo bwa Litangwa.
29 Bakabanyeka bitenti byabo na matanga abo,
Na binanga byabo bya bitenti na byuma byabo byoshe.
Bakabanyeka tumele babo,
Co banu bakatambeka ngwabo, ‘Banu boshe bali mu lyoba.’”
30 Eni mwakala mu Hazole teweni
Yeni kulako. Yeni mukalishweke mu binema bya kuloba,” mukemwo mwanendeka Yehova.
“Mwafwa Mwene Nebukadineza* wa Babiloni natumbu butumbe bwa kumilwisa,
Co nawana ngila ya kumihyanenamo.”
31 “Katukeni, yeni mukalwise lifuti lije lili mu kwoloka,
Lije kulyesi mu bushonde,” mukemwo mwanendeka Yehova.
“Lije kulyesi na mapito na tupateso. Bakala kwa likalyabo.
32 Bakabapukula tumele babo,
Co bakabapukula bimuna babo babangi.
Boshe baje banakamba binkambu bya ha mbakatwi,*
Njikabashandwela kwoshe kuje kuya lihunzi,
Co njikabanenela bukalu kutundilila ku mitambela yoshe,” mukemwo mwanendeka Yehova.
33 Co Hazole akapwa limbo lya bimbanje,
Co lalo akapwa ngundu myaka na myaka.
Wahi akakalamo,
Co wahi akatungamo.”
34 Ku mashangumukilo a ciyulo ca Mwene Zedekiya wa Juda, Yehova wendekele na kapolofweto Jelemiya kutalesa ku Elamu. Wendekele ngwendi: 35 “Yehova wa maswalale nendeka ngwendi: ‘Njipokola buta bwa lusipa bwa baElamu haje hanemana nzili yabo. 36 Njikahuwisila baElamu lihunzi lya kutunda ku bimbango biwana bya lilu, co njikabashandwela kwoshe kuje kuya eli lihunzi. Kukwesi mu lifuti mubakajeneka kukala baElamu munjikabashandola.’”
37 Njikalingisa baElamu bazibile lyoba bitozi babo na baje bashaka kubatsiya. Co njikabanenela bukalu, njikabanenela butenu bwange,” mukemwo mwanendeka Yehova. “Co njikatuma mukwale munima yabo kweta noho hanjikabanyongesela.”
38 Yehova nendeka ngwendi: “Njikatumbika litanda lyange mu Elamu, co njikanyongesa mwene na bamyata ba mu Elamu.”
39 “Oloni mu matangwa a mamaneselelo, njikakungulula bafunge ba mu Elamu,” mukemwo mwanendeka Yehova.