Samu
Kuli muka-kutwamenena. Mwaso wa kwimba na bisanzi bya mikole. Masikiu.* Mwaso wembile Devidi, baZifu mubezile na kuleka Saulu ngwabo: “Devidi nalishweke kuli yetu.”
54 Obe Njambi, linga kwesekesa na lizina lyobe na kunjobola,
Co njamene na nzili yobe.
2 Obe Njambi, ziba lilombelo lyange.
Aka mbunge ku majwi atunda mu kanwa kange.
3 Mwafwa banu baje kunjizibuka, bananjikatukila mangana banjilwise,
Co banu ba kukenyuka bali na kushakezeka mwonyo* wange.
Kubesi kusingimika Njambi.* (Sela)
4 Taleni! Njambi ikeye mukwasi wange,
Yehova ali hamo na baje bali na kunjikwasa.
5 Elwisila bitozi bange bubi bwabo.
Bamanese,* mwafwa u wa kulongwa.
6 Njikana milambu kuli yobe na mbunge imolika.
Njikashangazala lizina lyobe, obe Yehova, mwafwa lyapwa lyalibwa.
7 Mwafwa akanjobola ku bukalu bwoshe,
Co njikalisamba munjikamona bitozi bange banalundumuka.