Samu
Mwaso wa Devidi.
143 Obe Yehova, ziba lilombelo lyange.
Tolilila ku kulambelela kwange kwa kulomba bukwasi.
Njikumbulule mwafwa ya kulongwa kwobe na kusungama kwobe.
2 Keti usompe ngamba yobe,
Mwafwa kukwesi munu wa kuyoya uje asa kupwa wa kusungama ku mesho obe.
3 Mwafwa citozi ali na kunjisheka.
Natikila mwonyo wange hasi.
Nanjilingisa njikale mu lisusulungu ngwe mwa baje batsa laja.
4 Nzili* yange ili na kuhwa.
Mbunge yange inambumbula.
5 Njanuka matangwa a kunima,
Njisinganyekesesa ha bipangi byobe.
Njisinganyekesesa* manene bipangi bya maboko obe.
6 Njolwela maboko ange kuli yobe.
Njili na lihwila lya kushaka yobe ngwe lifuti lya kuma mulikashungwiya nyozi. (Sela)
7 Njikumbulule bwasi, obe Yehova.
Nzili* yange inahu.
Keti unjishwekele cihanga cobe,
Keti ngoconi njifwa ngwe baje bali na kusikumuka mu bwina.*
8 Ku mutondo, njitabese njizibe bya cizemo cobe cije kucesi kutenguluka
Mwafwa njakulahela yobe.
Njikwase njizibuke ngila injinapande kwenda
Mwafwa njitengulukila kuli yobe.
9 Njamene ku bitozi bange, obe Yehova.
Njitonda unjinyungilile.
10 Njilongese kulinga cizango cobe
Mwafwa yobe Njambi yange.
Sipilitu yobe yapwa yaibwa.
Njitwamenene ha mwela wa kusalama.*
11 Obe Yehova, njinyungilile mwafwa ya lizina lyobe.
Njamene ku bukalu mwafwa ya kusungama kwobe.
12 Manesa* bitozi bange mwafwa ya cizemo cobe cije kucesi kutenguluka.
Nyongesa boshe baje bali na kunjipindisa*
Mwafwa nji ngamba yobe.