Isaya
62 Mwafwa ya Siyone, kunjoloka lika kulu,
Mwafwa ya Jelusalema, kunjimana lika ngoco,
Kweta noho kusungama kwendi kubyakula ngwe ceke cakama
Na kwoboka kwendi kushukuma ngwe mutetengo.
2 “Baka-mafuti bakamona kusungama kwobe, obe munakazi,
Na bimyene boshe bakamona bumpau bwobe.
Co bakakusanesa lizina lyaliha,
Lyakakuluka Yehova babenya.
3 Ukapwa cilongo cacibwa mu liboko lya Yehova,
Ukapwa nanga ya bumwene ya kulikuta ku mutwe mu liboko lya Njambi yobe.
4 Kubakakusana lalo munakazi ibanayengula,
Co lifuti lyobe kubakalisana lalo ngundu.
Bakakusana ngwabo Uje Akanjizibisa Kubwaha,
Co lifuti lyobe bakalisana ngwabo Uje Nashomboka.
Yehova akabwahelela mwafwa yobe,
Co lifuti lyobe likapwa ngwe uje nashomboka.
5 Mwafwa ngecilika mukwenje mwakambata mumbanda uje kanda alilaleho na munalume,
Bana bobe ba banalume bakakwambata.
Ngecilika cambato mwakabwahelela mwafwa ya shombolwa,
Njambi yobe akabwahelela mwafwa yobe.
6 Obe Jelusalema, njinaka baka-kunyunga ha bibumbe byobe.
Kubapandele kutwalelelaho kwoloka kulu litangwa lyoshe na butsiki bwoshe.
Eni mukatumbula lizina lya Yehova,
Keti muhwime,
7 Keti mumwane simbu ya kuhwima, kweta noho hakazamekela Jelusalema,
Eyo, kweta noho hakalingisila banu ha lifuti-libu hoshe bashangazale Jelusalema.”
8 Yehova nalisingi na liboko lyendi lya cilyo, nalisingi na liboko lyendi lya nzili ngwendi:
“Kunjikana lalo binona byeni ku bitozi beni kupwa byakulya byabo,
Nambe kutabesa banu ba ku lifuti lyeka banwe binyu byeni byabiha bimunondanganena.
9 Oloni baje bakakungulula binona, bakabilya na kushangazala Yehova,
Co baje bakakungulula binyu bakabinwina mu malapa ange a kujela.”
10 Iteni, iteni mu bikolo.
Bwaheseleni banu ngila.
Pangeni, pangeni tapalo.
Tundisenimo mamanya.
Shimbikileni miyati ya banu cimweso.*
11 Taleni! Yehova nambulula muzimbu ku mamaneselelo a lifuti-libu ngwendi:
“Lekeni muna Siyone wa munakazi ngweni,
‘Tala! Kwoboka kwobe kuli na kwija.
Tala! Ikeye akana cikandelela,
Co nalibwahesela kwana munu fweto.’”
12 Bakabasana ngwabo banu ba kujela, baje banasokola Yehova,
Co bakakusana ngwabo Uje Ibashakezeka, Nganda Ije Kubayengwile.