Jelemiya
2 Yehova wanjilekele ngwendi: 2 “Ya ukaleke Jelusalema ngwobe, ‘Yehova nendeka ngwendi:
“Njicanuka muwapwililile wa kulongwa* ku bwanike
Na cizemo ciwanjimwesele munjakwendekeyeye,
Nomu muwanjikabangeyeye mu mambo,
Mu lifuti muje kubesi kukuna bimbuto.
3 Isalele wapwile wa kujela kuli Yehova, wapwile bushuka bwakulibanga ku byuma byanateje.”’
‘Boshe baje bashakele kumubulumuna bakele na mulonga.
Bukalu bwakele na kubezila,’ mukemwo mwanendeka Yehova.”
4 Tolilileni ku lijwi lya Yehova eni bakunjibo ya Jakobu,
Neni binaanga byoshe bya ku njibo ya Isalele.
5 Yehova nendeka ngwendi:
“Bukalu muka bubamwene bakukulwila beni muli yange
Mangana bongumuke ngacije na kuya kulako nange,
Na kukabangeya tumponya bangoco na kubalingisa nabo bapwe bangoco?
6 Kubehwile ngwabo, ‘Yehova ali kuli,
Uje watutundisile mu lifuti lya Ijipiti,
Uje watwitisile mu mambo,
Uje watwitisile mu lifuti lya kuma na lya mena,
Mu lifuti lya lilanga na lisusulungu lyakama
Mu lifuti muje kumwesi kwita banu,
Muje lalo kumwakele banu?’
7 Co njaminenele mu lifuti muje muli mahya a miti ya bushuka,
Mangana mwakulye bushuka bwalyo na byuma byalyo byabibwa.
Oloni yeni mwezile na kujwalesa lifuti lyange.
Mwalingisile buswana bwange bupwe cuma ca bunyengwe.
8 Tupilistu kubehwile ngwabo, ‘Yehova ali kuli?’
Baje bakele na kutala bya lishiko kubanjizibukile,
Tunyungi banjitengulukilile,
Tupolofweto bapolofwetele mu lizina lya Bale,
Co bakabangeyeye binjambi baje kubasa kubakwasa.
9 ‘Ngeci njikalwa neni lalo,’ mukemwo mwanendeka Yehova,
‘Co lalo njikalwa na bana ba bana beni.’
10 Oloni jabukeni muye ku ngenge ya kalunga-ndonga* ya Kitimu mukamone.
Tumeni katumwa ku Keda mangana akatondesese mwamubwa.
Yeni mukamone indi cuma ca kufwa ngacije calingiwaho laja.
11 Kuma kuli lifuti lyalandakana binjambi balyo na byuma bije keti binjambi ndi?
Oloni banu bange banalandakana bumpau bwange na byuma byangoco.
12 Eni melu, taleni na kulikomokela ha cuma eci.
Jajeni na lyoba lyakama,’ mukemwo mwanendeka Yehova,
13 Mwafwa banu bange banalingi ebi byuma bibali byabibi:
Banaseze yange kabwelubwelu ka mema a kuyoya,
Na kulindila masima,
Masima aje kuwasa kutulika mema.’
14 ‘Kuma Isalele napu ngamba indi ndungo uje nasemukila mu njibo?
Co bikoni bibali na kumupukwila?
15 Bindumba bali na kumubulumina.
Banajundula ku majwi abo.
Lifuti lyendi banalipwisa cuma ca kukomokesa.
Banenyeka binganda byendi, ngeci naumo wahi alimo.
16 Banu ba ku Nofu* na ku Tapanesi bali na kulya cilongo ca ku mutwe wobe.
17 Kuma keti yobe babenya walikokelabyo
Ha kuseza Yehova Njambi yobe
Mwakele na kukutwamena mu ngila ndi?
18 Co bika biushungwiiya ngila ya kuya ku Ijipiti
Na kunwa mema a ku Shiho?*
Bika biushungwiiya ngila ya kuya ku Asiria
Na kunwa mema a mu Ndonga ya Yufreti?
19 Bubi bweni bunapande kumyolola,
Co kujeneka kulongwa kweni kunapande kumipaya.
Munapande kuzibuka na kunanguka ngweni
Kuseza Yehova Njambi yeni kunapu cuma cacibi, ca kulula.
Munamwesa ngweni kumwesi na kunjizibila lyobe,’ mukemwo mwanendeka Mwata Wahakamwa ya Byoshe, Yehova wa maswalale.
20 Mwafwa kusañulu njapokozwele joko yobe
Na kubatula malyenge obe.
Oloni yobe wendekele ngwobe: “Kunjikupangela.”
Mwafwa wakele na kulala mukali na kulinga buhule
Ha lilundu hoshe na mwisi ya muti woshe waubwa.
21 Munjakukunine wapwile muti waubwa wa binyu bya kubenga wa kutunda ha mbuto yaibwa,
Co kunaija bati utenguluke kupwa muti wa binyu wa mu shwata?’
22 ‘Nameme utane na soda na mulola wawingi
Mulonga wobe anga ucipwa citoma kuli yange,’ mukemwo mwanendeka Mwata Wahakamwa ya Byoshe Yehova.
23 Wasa kwendeka bati ngwobe, ‘Kunjalijwalesele,
Ngwobe kunjakabangeyeye baBale’?
Tala biwalingile mu cingulunga.
Singanyeka ha byuma biunalingi.
Unapu ngwe kamele wa lwabo wa lumbisi,
Uje ali na kushatuka lika noku-noku mu bingila byendi,
24 Ngwe ngolo uje nezilila kukala mu mambo
Uje ali na kunikilila mu lihunzi mwafwa ya lishungu lyendi.
Iya asa kumubindika nga lishungu lyendi linakatuka?
Baje bali na kumutonda kubapandele kulisina.
Bamuwana ha simbu yendi.
25 Ecela biuli na kulinga simbu kanda ushangumuke kwenda mendi-mendi
Na kuziba lihwila ha milibu yobe.
Oloni yobe wendekele ngwobe, ‘Embwe na seho bene yahi!
Njinazeme laja banu beka,
Co njibakabangeya.’
26 Shwamwa ije ibanazibi bakunjibo ya Isalele,
Inapu ngwe shwamwa ije yakazibi mwizi nga banamukwata
Bakebo na bimyene babo, na bamyata babo
Na tupilistu babo na tupolofweto babo.
27 Bakaleka muti ngwabo, ‘Yobe tate,’
Na limanya ngwabo, ‘Yobe wanjikitile.’
Oloni yange bananjitalesa nima kutubakana kutala kuli yange.
Co mu simbu ya bukalu bendeka ngwabo,
‘Ija utwobole!’
28 Bali kuli oni binjambi bobe bawalimungilile?
Baije nga basa kukwobola mu simbu yobe ya bukalu,
Mwafwa binjambi bobe banapu babangi ngwe binganda byobe, obe Juda.
29 Yehova nendeka ngwendi: ‘Bika biuli na kunjanena mulonga?
Bika bimunanjitengulukila mubaboshe?’
30 Njinalisini kwana bana bobe kashitiko.
Oloni bakebo kubatabele kubanyanyamesa.
Mukwale wobe unatsii tupolofweto bobe,
Ngwe ndumba wa butenu uje ali na kwendangana.
31 Obe cisemwa, singanyekesesa ha lijwi lya Yehova yobe babenya.
Kuma njinapu ngwe mambo kuli Isalele
Nambe lifuti lya lisusulungu lyakama ndi?
Bika bibanendekela banu bange ngwabo, ‘Tuli na kwendangana mu kuzituka.
Kutwija lalo kuli yobe.’?
32 Kuma munakazi uje kanda alilaleho laja na munalume asa kwibala byuma byendi bya kulicakeya ndi?
Kuma shombolwa asa kwibala nanga yendi ya kukuta ha mabele* ndi?
Oloni banu bange bananjibala ha simbu yailaha.
33 Obe munakazi, u mutongwe mu kushakezeka cizemo.
Unalizilisa yobe babenya bingila byabibi.
34 Bifunga byobe binabihya na maninga a tuhutu ba kujeneka mulonga,
Keti ngwabo bakele na kutuba njibo mukemwo babatsiile embwe,
Oloni njawanene maninga abo ha bifunga byobe byoshe.
35 Oloni yobe unendeka ngwobe, ‘Kunjesi na mulonga.
Cili bene butenu bwa Njambi kubunjizila.’
Co hano njikusompa
Mwafwa unendeka ngwobe, ‘Kunjalingile bubi.’
36 Bika biuli na kumwena ngila yobe ya kupengapenga ngwe yaibwa?
Mukaziba shwamwa mwafwa ya Ijipiti,
Ngwe mumunazibila shwamwa mwafwa ya Asiria.
37 Mwafwa yeci cuma lalo, mukaya oku munalikwata mu mitwe,
Mwafwa Yehova nabyana baje bamunakulahela.
Kubakamikwasa.”