Jelemiya
4 Yehova nendeka ngwendi: “Nga wiluka, obe Isalele,
Nga wiluka kuli yange
Na kutundisa tumponya bobe ba bunyengwe ku mesho ange,
Co kuukayebangela mu lifuti.
2 Co lalo nga ulisinga mu busunga na mu kusungama ngwobe,
‘Njilisinga hali Yehova wa kuyoya,’
Co mafuti akabezika mwafwa yange Njambi,
Co akalishasha mwafwa yange.”
3 Mwafwa Yehova naleke banu ba mu Juda na mu Jelusalema ngwendi:
“Lilimineni mu lifuti lya bwilo,
Co likeleni kukuna mu mingonga.
4 Yeni ku mukanda mwafwa ya Yehova,
Co twaleni bimbunge byeni ku mukanda,
Eni banu ba mu Juda neni mwakala mu Jelusalema,
Mangana butenu bwange keti bumyepukile ngwe tuhya
Na kumyenyeka kwa kujeneka umo abuzima,
Mwafwa ya bilinga byeni byabibi.”
5 Byendekeni mu Juda na ku byambulula mu Jelusalema.
Tambekeni na kwohyesa limbinga mu lifuti lyoshe.
Tambekeni na kwendeka ngweni: “Likungulwileni hamo,
Tuyeni tutewele ku binganda bya kukola.
6 Shimbikeni cimweso cije cimwesa ngila iya ku Siyone.
Shakezekeni mwela mwa kubanda, co keti mwimane homa hamolika,”
Mwafwa njili na kunena bukalu kutunda ku kunto,* njili na kunena bukalu bwakama.
7 Citozi nasholoka ngwe ndumba atunda mu ciputa.
Muka-kunyongesa mafuti nakatuka.
Natundu mu mwela wendi mangana akupwise lifuti lyeni cuma ca kukomokesa.
Binganda byeni bikapwa bingundu, co naumo wahi akatungamo.
8 Ngeci, zaleni bikeleya,
Lileni na kumbolozoka,
Mwafwa butenu bwa Yehova anga buli hali yetu.
9 Yehova nendeka ngwendi: “Ha litangwa lije, mbunge ya mwene ikazeya,
Co lalo na bimbunge bya bamyata nabyo bikazeya.
Tupilistu bakakasama, co tupolofweto bakakomoka.”
10 Co njendekele ngwange: “Nana! Obe Mwata Wahakamwa ya Byoshe Yehova, cili bene unakwisi banu ba mu Juda na banu ba mu Jelusalema, muunabaleke ngwobe, ‘Mukakala mu kwoloka,’ okuni mukwale uli ha milibu yetu.”
11 Ha simbu oyo, banu ba mu Juda na banu ba mu Jelusalema bakabaleka ngwabo:
“Lihunzi lya kushaluka lije litunda ku malundu a kujeneka byuma mu mambo
Likahuwa na kukomba bana ba banu bange,*
Kulikaija na kuleleka nambe kujelesa.
12 Yange njikashiki lihunzi lyakama kutunda kuje ku myela.
Co njikabasompa.
13 Taleni! Citozi akaija ngwe mashelwa a nyonzi,
Co matemba endi anapu ngwe lihunzi lyakama.
Tubalu bendi bali na lumbisi kutubakana bingonga.
Tunabindama mwafwa tunatsi,
14 Obe Jelusalema tanesa mbunge yobe na kuijelesa ku bubi mangana woboke,
Wambata simbu ya kupwa hali oku watulika bisinganyeka byabibi?
15 Mwafwa lijwi lyendeka muzimbu utunda ku Dani,
Co lyambulula bya bukalu butunda ku minkinda ya Efremu.
16 Wambulule, eyo, wambulule kuli baka-mafuti.
Wambulule kuli Jelusalema.”
“Tunyungi bali na kwija kutunda ku lifuti lya kulako,
Co bakakuwilila binganda bya Juda.
17 Bakamujemukila na kumuzengeleka ngwe baka-kunyunga lihya,
Mwafwa nanjitengulukila,” mukemwo mwanendeka Yehova.
18 “Bingila byobe babenya na bilinga byobe bakakwilwisilabyo.
Co kashitiko kobe kakakuzibisa kubabala,
Mwafwa kutengulukila kunazama mu mbunge yobe.”
19 Nani banana, nani banana!
Njili na kuziba manene kubabala ku mbunge.
Mbunge yange ili na kulwa manene.
Kunjasa kwoloka,
Mwafwa njinazibi cilumo ca limbinga,
Na cilumo ca nzita.
20 Kuli mizimbu ya bukalu bwa kulikabasana,
Mwafwa lifuti lyoshe banalinyongesa.
Tenti yange banainyongesa bwasi-bwasi,
Mu kasimbu kakandondo, binanga bya tenti yange banabinyongesa.
21 Simbu ya kupwa hali injitwalelelaho kumona cimweso?
Simbu ya kupwa hali injitwalelelaho kuziba cilumo ca limbinga?
22 Mwafwa banu bange bapwa bilema.
Bali na kunjisembulula.
Bapwa bana ba kujeneka mana, co lalo kubapwile baka-kuzibisisa
Bananyanyama lika ku kulinga byuma byabibi,
Oloni kubazibuka kulinga byuma byabibwa.
23 Munjatalele mu lifuti lyabo, lyakele mupulungwa, co lalo lyapwile ngundu.
Munjatalele mwilu, kumwakele ceke.
24 Munjatalele minkinda, njamwene ili na kuninganga,
Co malundu akele na kujaja.
25 Munjatalele, kunjamwene munu,
Co tuzila boshe batewele.
26 Munjatalele, njamwene lihya lya bushuka lije lyatengulukile kupwa mambo,
Co binganda byalyo byoshe babipujwile.
Yehova ikeye walingile ebi byuma,
Mwafwa ya butenu bwendi buje bwakele na kushukuma.
27 Mwafwa Yehova nendeka ngwendi: “Lifuti lyoshe likapwa ngundu,
Oloni kunjikanyongesa byuma byoshe.
28 Ngeci, lifuti likalila,
Co melu akazibala
Mwafwa njinendekamo, co njinangula kulinga ngoco,
Co kunjitengulula bisinganyeka byange, nambe kwiluka munima.
29 Mubakaziba miyoyo ya baka-kulonda tubalu na baka-kwasha mata a lusipa,
Boshe mu nganda bakatewa,
Bakatewela mu shwata,
Co bakalonda ha mamanya,
Binganda byoshe bikapwa bingundu,
Co wahi akakalamo.”
30 Banakunyeke byuma byobe, co bikoni biulinga?
Wakele na kuzala bizalo bya kubenga,
Na kulicakeya na byuma bya goudi,
Co wakele na kulipenta bulombo bwa kuzibala mu mesho,
Oloni wakele na kulisina ngoco kulibwahesa,
Mwafwa baje bakele na kukushungwiya banakubyana,
Hanwoni batonda kukutsiya.
31 Mwafwa njili na kuziba miteto ngwe miteto ya munakazi ali na kubinja.
Njinazibi kukemanga ngwe kukemanga kwa munakazi uje ali na kupapa mwana wakulibanga.
Njinazibi lijwi lya muna Siyone wa munakazi uje ali na kuhwimangana.
Nolola maboko endi na kwendeka ngwendi:
“Njabindama mwafwa aba baka-kutsiya bananjijukisa.”