Jelemiya
6 Eni bana ba Benjamini, yeni mukabande kulako na Jelusalema.
Ohyeseni limbinga mu Tekowa.
Shwamekeni tuhya twa cimweso mu Bethi-hakelemu
Mwafwa bukalu buli na kwija kutundilila ku kunto,* kuli na kwija bukalu bwakama.
2 Muna Siyone wa munakazi nalifu na munakazi wamubwa wamubotsi.
3 Tunyungi bakaija na matanga abo.
Bakashimbika bitenti byabo kumuzengeleka,
Umo na umo wabo akalisa butanga bwali na kunyunga.
4 “Libwaheseleni nzita mukamulwise!
Katukeni, co tuyeni tukamulwise mutanya-mwelu!”
“Tunabindama, mwafwa litangwa lili na kuya na kulahuka,
Mwafwa minzinze ya mangwezi ili na kuya na kulahelako lika!”
5 “Katukeni, tuyeni tukamulwise butsiki
Na kunyongesa tuposhi twendi twa kukola.”
6 Mwafwa Yehova wa maswalale nendeka ngwendi:
“Teteni miti na kulundwila Jelusalema lilundu lya kuilwisila.
Nganda ya Jelusalema inapande kulitabela kuli yange.
Mwafwa munashulu manene baka-kulyatelela.
7 Ngecilika mwa lisima mulikatulika mema a kutonola,
Na Jelusalema mukemwo muinatulikila bubi.
Omu mu nganda mwashulu bukenya na kulyatelela.
Co simbu yoshe njili na kumonamo mishongo na bukalu.
8 Tolilila binjikunangula, obe Jelusalema, keti ngoconi unjizibisa bunyengwe, co njikuseza.
Njikakupwisa ngundu, njikakupwisa mwela wa kujeneka banu.”
9 Yehova wa maswalale ali na kwendeka ngwendi:
“BaIsalele baje bakasalaho, bakabapupulula ngwe munu uje apupulula bushuka bwa binyu bwa mamaneselelo ku miti ya binyu.
Olola liboko lyobe lalo ngwe munu uje ali na kukungulula bushuka bwa binyu ku miti ya binyu.”
10 “Iya injileka na kunangula?
Iya anjitolilila?
Tala! Matwi abo anaziki, co kubasa kutolilila ku byuma binjendeka.
Tala! Bali na kushaula lijwi lya Yehova,
Kulyesi na kubazibisa kubwaha.
11 Ngeci, mu mbunge yange mwashulu butenu bwa Yehova,
Njinajuka kubutulika.”
“Bwitile hali mwanike uje ali na kwenda mu tapalo,
Na ha cibunga ca bakwenje baje banalikungulwila hamo.
Boshe bakabakwata, munalume hamolika na munakazi wendi,
Mukulunu hamolika na kakulukazi.
12 Bakabanyeka binjibo byabo na kubyana banu beka,
Bakabanyeka mahya abo na banakazi babo
Mwafwa njikolola liboko lyange na kwana kashitiko banu bakala omu mu lifuti,” mukemwo mwanendeka Yehova.
13 Mwafwa kutunda ku wamundondo kutwala ku wakama, boshe bali na linyanyamena.
Kutunda ku kapolofweto kutwala ku kapilistu, boshe bali na kunyanyamena bakwabo kupangesa makuli.
14 Bali na kulikwisa kusaka banu bange baje banabetwa ha kubaleka lika ngwabo,
‘Kuli kwoloka! Kuli kwoloka!’
Okuni kwoloka cahiko.
15 Kuma bali na kuziba shwamwa mwafwa ya byuma bya bunyengwe bibanalingi ndi?
Kubesi na kuziba shwamwa nambe kamandondo.
Kubazibuka nambe mukwafwa kuziba shwamwa.
Ngeci bakawila mukati ka baje banau laja.
Munjikabana kashitiko bakatanuka,” ngwendi Yehova.
16 Yehova ali na kwendeka ngwendi:
“Yeni mukemane ha masambwa-ngila mukamone,
Yeni mukehule kubili bingila bya kusañulu.
Yeni mukehule kuili ngila yaibwa na kwendamo
Mangana muwane kuhwima.”
Oloni bakebo bendekele ngwabo: “Kutukendemo.”
17 “Co njangwile tunyungi baje bendekele ngwabo,
‘Tolilileni ku cilumo ca limbinga!’”
Oloni banu bendekele ngwabo: “Kutucitolilila.”
18 “Ngeci tolilileni yeni baka-mafuti
Neni munakunguluka,
Zibeni bikalingiwa ku banu ba mu Jelusalema.
19 Tolilileni eni mwakala ha lifuti-libu
Njili na kwana aba banu kashitiko
Mwafwa ya bisinganyeka byabo byabibi
Mwafwa kubatolilile ku majwi ange,
Co banabyana lishiko lyange.
20 Muli na kulisina ngoco kunjinenela isense ya kutoka ya ku Sheba
Na mushati wa kutobala* wa ku lifuti lya kulako.
Kunjishaka bwana bweni bwa mutunu bwa kwenyeka,
Co milambu yeni kuyesi na kunjizibisa kubwaha.”
21 Ngeci Yehova ali na kwendeka ngwendi:
“Njikakela aba banu bitanwiso,
Co bakatanukaho,
Bisemi ba banalume na bana babo ba banalume,
Munu hamolika na kabusamba kendi,
Co boshe bakanyonga.”
22 Yehova ali na kwendeka ngwendi:
“Banu bakatunda ku lifuti lya ku kunto,*
Co muyati wakama ukatunda ku mutambela wa kulako wa lifuti-libu.
23 Bakambata mata a lusipa na makunga.
Bapwa bikenya, co kubakakala na mema ku mbunge.
Majwi abo akatambeka ngwe muwakacumu mema a mu kalunga-ndonga,
Co bakalonda ha tubalu.
Bakalikwalaleka ngwe maswalale baje baya ku nzita mangana bakulwise, obe muna Siyone wa munakazi.”
24 Tunazibi muzimbu waco.
Maboko etu anazeye.
Bukalu bunatuwana,
Tuli na kuziba kubabala ngwe munakazi uje ali na kupapa.
25 Keti mwendangane mu shwata,
Co keti mwendangane mu tapalo,
Mwafwa citozi nakwata mukwale.
Banu boshe bali mu lyoba.
26 Eni bana ba banu bange,*
Zaleni bikeleya na kulimbundunga mu lito.
Lileni na kumbolozoka ngwe munu uje alila munendi umolika,
Mwafwa muka-kunyongesa atwizila mu kukasumuna.
27 “Njinakupwisa* ngwe muka-kwilula bikubo hakati ka banu bange,
Uje atondesesa mwamubwa.
Unapande kunanguka na kwilula bingila byabo.
28 Boshe bapwa ba kutindibala,
Baya na kubiisa bakwabo mazina.
Bapwa ngwe kopa na cikubo,
Boshe bakala na bilinga byabibi.
29 Muka-kupanga napanga na nzili mu kuyengununa bikubo
Nenyeka na mibanje yanakala na kupangesa mu kupembezela tuhya
Oloni kulifwita kwendi kunai mwangoco,
Loto* lika inatunduko,
30 Bakabasana ngwabo banapu siuva ije ibanabyana,
Mwafwa Yehova nababyana.”