Jelemiya
11 Yehova walekele Jelemiya ngwendi: 2 “Eni banu tolilileni ku majwi eci cikumiiyo.
“Leka* banu ba mu Juda na baje bakala mu Jelusalema awa majwi 3 ngwobe: ‘Yehova Njambi ya Isalele nendeka ngwendi: “Munu woshe uje kononoka awa majwi eci cikumiiyo apwe wa kusinga, 4 majwi aje anjashikile bakukulwila beni ha litangwa linjabatundisile mu lifuti lya Ijipiti, munjabatundisile mu lutengo lwa kuyengunwina bikubo na kwendeka ngwange, ‘Ononokeni lijwi lyange, co lingeni byoshe binjimishika, co mupwa banu bange, co yange njipwa Njambi yeni, 5 mangana njishulisilile byuma binjalisingile kuli bakukulwila babo ngwange njibana lifuti lije lyalisala mabele na buki, ngwe mukunafu lelo.’”’”
Co njakumbulwile ngwange: “Ameni* obe Yehova.”
6 Co Yehova wanjilekele ngwendi: “Ambulula awa majwi oshe mu binganda bya Juda na mu bitapalo bya mu Jelusalema ngwobe: ‘Tolilileni ku majwi eci cikumiiyo, co ononokeni. 7 Mwafwa njanangwile manene bakukulwila beni ha litangwa linjabatundisile mu Ijipiti kweta na lelo lino. Njelukilile-ilukilile kubanangula ngwange: “Ononokeni lijwi lyange.” 8 Oloni kubanjitolililile nambe kujendeka matwi abo. Umo na umo wabo watwaleleleleho kutindibala na kukabangeya mbunge yendi yaibi. Babyanene kulinga byuma binjabashikile, ngeci njalingisile majwi oshe a mu cikumiiyo anjabashikile alishulisilile kuli bakebo.”
9 Co Yehova wanjilekele ngwendi: “Banu ba mu Juda na banu baje bakala mu Jelusalema banalizibasana kunjitengulukila. 10 Baneluka ku milonga ya bakukulwila babo ba kusañulu baje babyanene kwononoka majwi ange, nabo banakabangeya binjambi beka na kubapangela. Bakunjibo ya Isalele na bakunjibo ya Juda banapokola cikumiiyo cinjalikumiiye na bakukulwila babo. 11 Mukemwo yange Yehova njinendeka ngwange, ‘Njibanenela bukalu buje kubasa kutewa. Mubakanjilomba bukwasi kunjikabatolilila. 12 Co ba mu binganda bya Juda na baje bakala mu Jelusalema bakaya ku binjambi baje babali na kwenyekela milambu na kulomba bukwasi, oloni aba binjambi kubakabobola ha simbu ibakaliwana na bukalu. 13 Mwafwa binjambi bobe banapu babangi ngwe binganda byobe obe Juda. Unatungila cuma ca shwamwa* mitula yaingi ngwe bitapalo bya mu Jelusalema, mitula ya kwenyekela milambu kuli Bale.
14 “Oloni yobe keti ulombelele aba banu. Keti ulile mwafwa yabo nambe kubalombelelako. Kunjibatolilila mubatambeka kuli yange mwafwa ya bukalu bubaliwana nabwo.
15 Banu bange banjazema kubesi na lisesa lya kukala mu njibo yange,
Mwafwa bwingi bwabo banalingi byuma byabibi.
Kuma basa kwonowesa bukalu kubezila mwafwa ya situ ya kujela* ndi?
Kuma bakalisamba ha simbu ije ndi?
16 Yehova wamitumbwile ngwendi munapu muti waubwa wa olive,
Muti waubwa uje wima bushuka bwabubwa.
Oloni kwazibikile cilumo cakama, co wamyenyekele na tuhya,
Na kupamozola minango yeni.
17 “Yehova wa maswalale uje wamikunine nendeka ngwendi bukalu bukamizila yeni bakunjibo ya Juda neni bakunjibo ya Isalele mwafwa ya bubi bumunalingi omwo munanjilubalesa ha kwana Bale milambu.”
18 Yehova wanjilekele mangana njizibuke.
Ha simbu ije wanjimwesele byuma bibakele na kulinga.
19 Njapwile ngwe manga wa kwoloka uje ibatwala na kutsiya.
Kunjazibukile ngwange bakele na kuyongola kunjilinga mwamubi mubakele na kwendeka ngwabo:
“Tuyeni tubiise muti na bushuka bwawo,
Co tuyeni tumutsiye
Mangana lizina lyendi keti bakalyanuke lalo.”
20 Oloni Yehova wa maswalale wapwa muka-kusompa wa kusungama.
Akelula bisinganyeka bya kuloba, na bimbunge.
Njitabese njimone muubalinga shambandinga,
Mwafwa njinanene ñanda yange kuli yobe.
21 Ngeci ebi bikebyo byali na kwendeka Yehova ku banu ba ku Anatoti baje bashaka kukutsiya, baje lalo bali na kwendeka ngwabo: “Kuwapandele kupolofweta mu lizina lya Yehova, keti ngoconi tukutsiya.” 22 Yehova wa maswalale ali na kwendeka ngwendi: “Njikabana kashitiko. Bakwenje bakatsa ku mukwale, co bana babo ba banalume na bana babo ba banakazi bakatsa ku njala. 23 Kukwesi nambe umo wabo akasala, mwafwa njikanena bukalu ku banu ba ku Anatoti mu mwaka unjikabanenela kashitiko.”