Jelemiya
12 Obe Yehova, ukalingi byuma mu kusungama munjikakuleke binyengo byange,
Munjikasimutwiya nobe biñanda bya kwakula mwamubwa.
Oloni mwafwa bika byuma bili na kwendela mwamubwa baka-bubi?
Mwafwa bika banu ba kujeneka kulongwa kubesi na kulishoshomwena?
2 Wabakunine, co banashimbika mizi.
Banakolo na kwima bushuka.
Simbu yoshe bali na kwendeka byobe, oloni bimbunge byabo bili kulako nobe.
3 Oloni yobe, obe Yehova unjizibuka mwamubwa, uli na kunjimona.
Unelula mbunge yange, co unawana ngwobe njalikwatasana nobe.
Bake kwa likalyabo ngwe bimanga baje babaya na kutsiya,
Bake kumukulo babandamene litangwa lya kubatsiya.
4 Lifuti lyambata simbu ya kupwa hali oku linominina?
Co bimena bya mu shwata byambata simbu ya kupwa hali oku binomu?
Mwafwa ya banu bababi baje balimo,
Tusitu na tuzila bananyongo.
Aba banu banendeka ngwabo: “Kasa kumona bikalingiwa kuli yetu.”
5 Nga ujuka kushatuka na baka-mendi,
Kuma tubalu wasa kushatuka nabo ndi?
Nameme uliziba kusimpa mu lifuti lya kwoloka,
Oloni ulinga bati muweta mu shwata ya kuzika ya ku ngenge ya ndonga ya Jodani?
6 Mwafwa nameme bandolome bobe, bakunjibo ya isho bene
Banakunyanyamena,
Banakukuwilila.
Keti ubakulahele
Nameme bakuleka byuma byabibwa.
7 “Njinombila kuti bakunjibo yange, njinaseze buswana bwange.
Njinana muka-cizemo cange mu maboko a bitozi bendi.
8 Uje wapwa buswana bwange napu ngwe ndumba kuli yange.
Nanjibulumina.
Ngeci njinamuzindi.
9 Uje wapwa buswana bwange, kuli yange napu ngwe kazila wa mibala ya kuliseza-seza uje akali situ.
Tuzila bakwabo baje bakali situ banamuzengeleka mangana bamulwise.
Ijeni, likungululeni, eni tusitu ba mu shwata,
Ijeni mwakulye.
10 Tunyungi babangi banabiisa lihya lyange lya binyu.
Banalyatangela mutamba wange.
Mutamba wange unjashaka banaupwisa mambo.
11 Linabihya,
Linominina,
Linapu ngundu kuli yange.
Lifuti lyoshe banalipwisa ngundu.
Oloni naumo wahi nakako mbunge.
12 Baka-kunyongesa banaija mu bingila byoshe bya mu mambo,
Mwafwa mukwale wa Yehova uli na kunyongesa banu kutunda ku mashangumukilo a lifuti kutwala ku mamaneselelo alyo.
Co naumo wahi ali mu kwoloka.
13 Bakunine tiliku, oloni banateje mingonga.
Banondangana, oloni nebi bibanawana byahi.
Byuma bibakateja bikabazibisa shwamwa
Mwafwa ya butenu bwa Yehova buje buli na kushukuma.”
14 Ebi bikebyo byali na kwendeka Yehova ku banu bababi baje banjatunga nabo, baje bali na kukwata buswana bunjanene banu bange baIsalele, ngwendi: “Hano njibatukula mu lifuti lyabo, co njikatukula na bakunjibo ya Juda mukati kabo. 15 Oloni munima ya kubatukula, njikabazibila ngozi, co njikelwisa umo na umo wabo ha buswana bwendi na mu lifuti lyendi.”
16 “Co nga bakalilongesa bingila bya banu bange na kulisinga ha lizina lyange ngwabo, ‘Njilisinga ha lizina lya Yehova wa kuyoya!’ ngwe muje mubalongeselele banu bange kulisinga hali Bale, co njikabatabesa batwaleleleho kukala mukati ka banu bange. 17 Oloni nga babyana kwononoka, co uje muyati nawo njikautukula, njikautukula na kuunyongesa,” mukemwo mwanendeka Yehova.