Jelemiya

24 Mwene Nebukadineza wa Babiloni watwalele Jekoniya muna Jehoyakimu, mwene wa Juda mu bufunge, hamolika na bamyata ba Juda na bangangula, na baka-kufula. Wabatundisile mu Jelusalema na kubatwala ku Babiloni. Munima yebi, Yehova wanjimwesele bizuma bibali muje mwakele mikuyu. Ebi bizuma byakele kulutwe lwa tempele ya Yehova. 2 Cizuma cimo cakele na mikuyu yaibwa manene ije yapwile ngwe mikuyu ya kulibanga, oloni cizuma cikwabo cakele na mikuyu yaibi manene. Yapwile yaibi manene, co kuyabwahele nameme kuilya.

3 Co Yehova wanjihwile ngwendi: “Jelemiya, bika biuli na kumona?” Co njamukumbulwile ngwange: “Njili na kumona mikuyu. Mikuyu yaibwa, yaibwa manene, oloni ei mikuyu yaibi, yaibi manene. Yaibi manene kuibwaha nameme kuilya.”

4 Co Yehova wanjilekele ngwendi: 5 “Yehova Njambi ya Isalele nendeka ngwendi, ‘Aba baJuda banjinatwala mu bufunge mu lifuti lya baKaudiya banapu ngwe ei mikuyu yaibwa. Njikabamona kupwa banu bababwa. 6 Njikabanyunga mangana njibalingile byuma byabibwa, co njikabalingisa beluke muno mu lifuti. Njikabatunga, co kunjikabasiula. Njikabakuna, co kunjikabatukula. 7 Njikabana mbunge ya kunjizibuka ngwabo yange Yehova. Bakapwa banu bange, co yange njikapwa Njambi yabo, mwafwa bakeluka kuli yange na bimbunge byabo byoshe.

8 Oloni kutalesa ku mikuyu yaibi ije kuibwaha nameme kuilya, Yehova nendeka ngwendi: “Omu mukemwo munjikamwena Mwene Zedekiya wa Juda hamolika na bamyata bendi na baje boshe banoboka mu Jelusalema, baje bacili muno mu lifuti na baje bali mu Ijipiti. 9 Njikalingisa banu ba mafuti oshe ha lifuti-libu bakakomoke mubakamona bukalu bukaija hali bakebo. Banu bakabashaula, co lalo bakapwa cakumwenako ca banu baje banaliwana na bukalu. Banu bakabashendumuna na kubasinga kwoshe kunjibashandwela. 10 Co njikabatumina mukwale na njala yakama na mushongo wa kulitambwisa, kweta noho habakanyongela mu lifuti linjabanene hamolika na bakukulwila babo.”’”