Jelemiya
26 Yehova wendekele na Jelemiya ku mashangumukilo a ciyulo ca Jehoyakimu muna Josiya, mwene wa Juda, ngwendi: 2 “Yehova nendeka ngwendi, ‘Imana mu lilapa lya njibo yange Yehova, co wendeke kutalesa ku banu boshe bali mu binganda bya Juda, baje bali na kwija na kulemesa ku njibo yange Yehova. Baleke byoshe binjikushika, keti utundiseko nambe lijwi limo. 3 Hamo banjitolilila, co umo na umo wabo atenguluka na kuseza bingila byendi byabibi, co nange njitengulula bisinganyeka byange kutalesa ku bukalu bunjinayongola kubanenela mwafwa ya bilinga byabo byabibi. 4 Baleke ngwobe: “Yehova nendeka ngwendi, ‘Nga kumunjitolilila ha kukabangeya mashiko ange anjinamyana, 5 na kujeneka kutolilila ku majwi a bangamba bange tupolofweto, anjili na kumitumina kwilukila na kwilukila, 6 co njikapwisa ei njibo ngwe Shilo, na kulingisa baka-mafuti boshe ha lifuti-libu basinge ei nganda.’”’”
7 Co tupilistu na tupolofweto na banu boshe bazibile Jelemiya mwakele na kwendeka awa majwi mu njibo ya Yehova. 8 Jelemiya mwamanesele kwendeka byoshe byamushikile Yehova ngwendi aleke banu boshe, tupilistu na tupolofweto na banu boshe bamukwatele na kumuleka ngwabo: “Unapande kutsa. 9 Mwafwa bika unapolofweta mu lizina lya Yehova ngwobe, ‘Ei njibo ikapwa ngwe Shilo, co ei nganda bakainyongesa, co wahi akakalamo’?” Co banu boshe bazengelekele Jelemiya mu njibo ya Yehova.
10 Bamyata ba mu Juda mubazibile awa majwi, batundile ku njibo ya mwene na kuya ku njibo ya Yehova na kukatumama mu cikolo caciha ca njibo ya Yehova. 11 Tupilistu na tupolofweto balekele bamyata na banu boshe ngwabo: “Ou munalume napande kutambula kashitiko ka kutsa, mwafwa ali na kupolofweta byuma byabibi ngwe mumunalizibilaye na matwi eni.”
12 Co Jelemiya wakumbulwile bamyata na banu boshe ngwendi: “Yehova ikeye nanjitumu ngwendi njakupolofwete awa majwi oshe amunazibi kutalesa kuli ei njibo na kuli ei nganda. 13 Ngeci, tengululeni bingila byeni na bilinga byeni, co ononokeni lijwi lya Yehova Njambi yeni, co Yehova atengulula bisinganyeka byendi kutalesa ku bukalu bwanendeka ngwendi aminenela. 14 Oloni ngeci mwangeni njili mu maboko eni. Njilingeni mwoshe mumumwena ngweni mwamubwa, co lalo munapande. 15 Oloni zibukeni ngweni nga munjitsiya, co yeni nei nganda na banu balimo mukala na mulonga wa kwitila maninga a kujeneka mulonga, mwafwa kwendeka lika busunga, Yehova ikeye nanjitumu ngwendi njakumileke awa majwi oshe amunazibi.”
16 Co bamyata na banu boshe balekele tupilistu na tupolofweto ngwabo: “Ou munalume kapandele kutambula kashitiko ka kutsa, mwafwa nendeka kuli yetu mu lizina lya Yehova Njambi yetu.”
17 Kutundaho, bakulunu bamo ba mu lifuti bakatukile na kwendeka ku mbunga yoshe ya banu ngwabo: 18 “Mika wa ku Moleshethi wakele na kupolofweta mu matangwa a mwene Hezekiya wa Juda, co walekele banu boshe ba mu Juda ngwendi, ‘Yehova wa maswalale nendeka ngwendi:
“Siyone bakaikekela ngwe lihya,
Jelusalema ikapwa mitumbo ya mamanya,
Co munkinda wa Njibo ya Njambi* ukapwa ngwe myela ya kulunduka mu shwata.”’
19 “Kuma mwene Hezekiya wa Juda na boshe ba mu Juda bamutsiile ndi? Kuma kazibilile Yehova lyoba na kulomba Yehova abatetele? Mukemwo Yehova watengulwile bisinganyeka byendi kutalesa ku bukalu bwendekele ngwendi abanenela. Ngeci, tulinenela lika bukalu yetu babenya.
20 “Co kwakele munalume mukwabo lalo uje wapolofwetele mu lizina lya Yehova. Lizina lyendi ikeye Ulija muna Shemaya wa ku Kiliyathi-jealimu. Nendi wapolofwetele byuma byabibi hali ei nganda na ha lifuti lino ngwe Jelemiya. 21 Mwene Jehoyakimu na banalume bendi boshe ba nzili na bamyata bendi boshe bazibile majwi endi, co mwene washakele kumutsiya. Ulija mwazibile ngoco, wazibile lyoba, co watewelele ku Ijipiti. 22 Co mwene Jehoyakimu watumine Eutani muna Akibo na banalume bakwabo ngwendi baye ku Ijipiti. 23 Co bakashakele Ulija ku Ijipiti na kumunena kuli mwene Jehoyakimu, co wamutsiile na mukwale na kumutsinda mu bihilo bya banu kuti.”
24 Oloni Ahikamu muna Shafani wakwasele Jelemiya, ngeci kubamwanene mu maboko a banu mangana bamutsiye.