Jelemiya
38 Co Shefatiya muna Matane, na Gedaliya muna Pasha, na Juka muna Shelemiya, na Pasha muna Maukaija, bazibile majwi endekele Jelemiya ku banu boshe, ngwendi: 2 “Yehova nendeka ngwendi, ‘Woshe uje atwalelelaho kukala muno mu nganda atsa ku mukwale na ku njala yakama na ku mushongo wa kulitambwisa, oloni uje alyana mu maboko a baKaudiya atwalelelaho kuyoya na kwobola mwonyo wendi ngwe byuma bibanapukula.’* 3 Yehova nendeka ngwendi, ‘Cili bene ei nganda bayana ku maswalale ba mwene wa Babiloni, co akaifungulula.’”
4 Bamyata balekele mwene ngwabo: “Tukulomba utsiye ou munalume mwafwa awa majwi ali na kwendeka ali na kuzeyesa maswalale banasalako muno mu nganda na banu boshe. Mwafwa ou munalume katondo ngwendi aba banu bakale mu kwoloka, oloni atonda ngwendi bakobele mu bukalu.” 5 Mwene Zedekiya wabakumbulwile ngwendi: “Mulingeni mwoshe mumushakela, mwafwa yange mwene kunjasa kumibindika.”
6 Ngeci bambatele Jelemiya na kumumbila mu lisima lya Maukaija muna mwene lije lyakele mu Lilapa lya Baka-kunyunga. Basoselelemo Jelemiya na mikole. Muje mu lisima kumwakele mema, mwakele lika mandoba, co Jelemiya washangumukile kumbombomena mu mandoba.
7 Ebedi-meleki wa ku Ithopia uje wapwile munalume wa bulemu* mu njibo ya mwene wazibile ngwabo Jelemiya banamwaka mu lisima. Ha simbu oyo, mwene watumamene ku Cikolo ca Benjamini, 8 ngeci Ebedi-meleki watuhukile mu njibo ya mwene na kukasimutwiya na mwene ngwendi: 9 “Shukulu yange, mwene yange, byuma bibanalingi aba banalume kuli kapolofweto Jelemiya byabibi manene. Banamumbila mu lisima, co atsilamo muje mwafwa ya njala yakama, mwafwa makende anahumo muno mu nganda.”
10 Co mwene washikile Ebedi-meleki wa ku Ithopia ngwendi: “Ambata banalume 30 mangana uye nabo mukatundise kapolofweto Jelemiya mu lisima simbu kanda atse.” 11 Ngeci Ebedi-meleki wambatele baje banalume, co baile mu njibo ya mwene, mu mulili uje wakele mwisi ya mulili wa kutulikila bufuko, co bakambatelemo binanga bya kutabozoka na bizalo bya kutabozoka, co babisoselele kuli Jelemiya uje wakele mu lisima kupangesa mikole. 12 Co Ebedi-meleki wa ku Ithopia walekele Jelemiya ngwendi: “Jelemiya aka obyo binanga na bizalo bya kutabozoka mu biñondondwa byobe mangana mikole keti ikupwesule.” Jelemiya walingile ngoco bene, 13 co bakokele Jelemiya na mikole na kumutundisa mu lisima. Co Jelemiya watwaleleleleho kukala mu Lilapa lya Baka-kunyunga.
14 Mwene Zedekiya wasanene kapolofweto Jelemiya mangana aije kuli ikeye, ku cikolo camucitatu cije cakele mu njibo ya Yehova, co mwene walekele Jelemiya ngwendi: “Kuli bimo binjishaka kukwihula. Keti unjishwekele cuma coshe-coshe.” 15 Jelemiya wakumbulwile Zedekiya ngwendi: “Nga njikuleka, unjitsiya. Co lalo nga njikunangula, kuunjitolilila.” 16 Ngeci Mwene Zedekiya walisingile kuli Jelemiya ku bushweke ngwendi: “Njilisinga hali Yehova wa kuyoya uje natwana eci kuyoya ngwange kunjikutsii, co lalo kunjikwana mu maboko aba banu bashaka kukutsiya.”
17 Co Jelemiya walekele Zedekiya ngwendi: “Yehova Njambi wa maswalale, Njambi ya Isalele nendeka ngwendi, ‘Nga ulyana mu maboko a bamyata ba mwene wa Babiloni, co wobola mwonyo wobe, co lalo ino nganda kubayenyeka na tuhya, co yobe na bakunjibo yobe mwoboka. 18 Oloni nga kuulyana mu maboko a bamyata ba mwene wa Babiloni, co ino nganda bayana mu maboko a baKaudiya, bayenyeka na tuhya, co nobe kuukasa kupusunuka mu maboko abo.’”
19 Co Mwene Zedekiya walekele Jelemiya ngwendi: “Njalishoshomwena baJuda baje banatewela ku baKaudiya, mwafwa nga banjana mu maboko a baJuda, co banjilinga mwamubi.” 20 Oloni Jelemiya wendekele ngwendi: “Kubakwana mu maboko abo. Yobe ononoka lika majwi a Yehova anjili na kukuleka, co byuma bikwendela mwamubwa, co utwalelelaho kuyoya. 21 Oloni nga ubyana kulyana mu maboko abo, co byuma byananjileke Yehova bilingiwa. 22 Nanjimwesa banakazi boshe baje banasala mu njibo ya mwene wa Juda oku bali na kubatuhula na kubatwala ku bamyata ba mwene wa Babiloni, co bali na kwendeka ngwabo,
‘Banalume baje baakulahelele banamukwisi na kumuhyana.
Banalingisa mendi endi akakateye mu mandoba.
Co banamuseze.’
23 Co banakazi bobe boshe na bana bobe ba banalume bakabatwala ku baKaudiya, co yobe kuukasa kupusunuka mu maboko abo. Mwene wa Babiloni akakukwata, co ino nganda bakayenyeka na tuhya mwafwa yobe.”
24 Co Zedekiya walekele Jelemiya ngwendi: “Keti uleke munu woshe-woshe ebi byuma mangana keti utse. 25 Co nga bamyata baziba ngwabo njinasimutwiya nobe, co baija kuli yobe na kukuleka ngwabo, ‘Tuleke biunaleke mwene. Keti utushwekele cuma coshe-coshe, co kutukutsii. Mwene nakuleke bika?’ 26 Unapande kubakumbulula ngwobe, ‘Njinakala na kulomba mwene ngwange keti anjilwise ku njibo ya Jehonatani mangana keti njikatsileko.’”
27 Mu kwita kwa simbu, bamyata boshe bezile kuli Jelemiya na kumwihula, co wabalekele byuma byoshe byamushikile mwene ngwendi endeke. Ngeci kubendekele byuma bikwabo lalo, mwafwa kubazibile byuma byasimutwiiye Jelemiya na mwene. 28 Jelemiya watwaleleleleho kukala mu Lilapa lya Baka-kunyunga kweta na ha litangwa libafungulwile Jelusalema. Jelemiya anga wakele muje bene na ha simbu ibafungulwile Jelusalema.