Isaya
42 Taleni! Ngamba yange, uje injili na kukwasa!
Uje injinangula, uje akanjizibisa kubwaha!
Njinaka sipilitu yange muli ikeye,
Co baka-mafuti akabakula mwamubwa.
2 Kakakuu nambe kutambeka,
Co kakalingisa lijwi lyendi balizibe mu tapalo.
3 Kakafunyula lihongo lya kutepama
Nambe kuzima mukole wa ndeya uje uli na kukakama bwisi.
Akakula mwamubwa, mu kulongwa.
4 Kakazeye nambe kutikika kweta noho hakazamekela kwakula mwamubwa ha lifuti-libu,
Co banu ba ha mañanda batwalelelaho kubandamena lishiko* lyendi.
5 Njambi wa busunga Yehova,
Ishamatanga wa melu uje wapwa Wakama Manene, uje wajangumwine melu,
Uje wajangumwine lifuti-libu na kulingisa byoshe byakalaho bikaleko,
Uje akana muku banu bakalaho
Na kwana sipilitu baje bakendeho, nendeka ngwendi:
6 “Yange Yehova, njinakusana mu kusungama,
Njinakukwata ku liboko.
Njikunyungilila na kukwana ku banu kupwa cishimbikiya*
Na kukupwisa ceke ca mafuti,
7 Mangana utonese mesho a tupuputwa
Na kupatula mapanditi mu kamenga ka mwisi ya libu
Na kupatula mu kamenga baje bali mu lisusulungu.
8 Yange Yehova. Likelyo lizina lyange.
Naumo wahi injana* bumpau bwange,
Co kunjana kushangazala kwange ku tumponya ba kushonga.
9 Taleni, byuma bya kulibanga binalingiwa,
Hanwoni njili na kwendeka byuma byabiha.
Njimilekabyo simbu kanda bisholoke.”
10 Imbileni Yehova mwaso wauha,
Mushangazaleni eni mwakala ku mamaneselelo a lifuti-libu,
Yeni mukasikumuka ku kalunga-ndonga na byoshe byashulamo,
Yeni mañanda na baje bakalaho.
11 Mambo na binganda byayo bitambeke,
Membo a Keda atambeke.
Baje bakala mu mamanya batambeke mu kubwahelela,
Bakuwe oku bali helu lya minkinda.
12 Bane Yehova bumpau
Na kumushangazala ha mañanda.
13 Yehova akaya na kulwa ngwe munalume wa nzili.
Akakala na ntwima ngwe muka-kulwa.
Akatambeka, eyo, akatambeka mutambi wa nzita,
Akamwesa ngwendi ali na nzili kutubakana bitozi bendi.
14 “Njinoloka kulu ha simbu yailaha.
Njinatwalelelaho kwoloka kulu na kukwata mbunge.
Njiteta na kuhwimangana na kutesoka ha simbu imolika,
Ngwe munakazi ali na kupapa.
15 Njilundumuna minkinda na malundu
Na kumisa bimena byaho byoshe.
Njilingisa bindonga bipwe mañanda*
Na kumisa bihongo bya mema.
16 Njitwamenena tupuputwa mu ngila ije kubazibuka
Na kubalingisa bende mu bingila bije kubazibuka mwamubwa.
Njilingisa lisusulungu lili halutwe lwabo lipwe ceke
Na kulingisa mwela wa mandunga-mandunga upwe mwela wa kusalama.
Ebi bikebyo binjibalingila, co kunjibayengula.”
17 Baje bakulahela tumponya ba kushonga,
Baje bendeka ku binjambi ba bikubo ngwabo: “Yeni binjambi betu,”
Bakabelwisa na kubaleka majwi aje akabazibisa shwamwa.
18 Tolilileni, eni tusinda-matwi,
Taleni na kumona, eni tupuputwa.
19 Iya napu kapuputwa ngwe ngamba yange?
Iya napu manene kasinda-matwi ngwe katumwa injituma?
Iya napu manene kapuputwa ngwe uje ibanana cikandelela?
Iya napu manene kapuputwa ngwe ngamba ya Yehova?
20 Muli na kumona byuma byabingi, oloni kumwesi na kutwalelelaho kutona.
Mwazikula matwi eni, oloni kumwesi na kutolilila.
21 Mwafwa ya kusungama kwendi,
Yehova ashaka kwamesa lishiko* na kulilingisa likale na bumpau.
22 Oloni aba banu banabapukula na kubafungulula,
Boshe banawila mu mena, co banabashweke mu tumenga.
Banabapukula kwa kujeneka umo wa kubamena,
Na kubafungulula kwa kujeneka umo endeka ngwendi: “Belwiseni!”
23 Iya hakati keni aziba ebi byuma?
Iya akako mbunge na kutolilila mangana alilongeseko bimo bikamukwasa kulutwe?
24 Iya nana Jakobu kuli baka-kufungulula?
Iya nana Isalele kuli baka-kupukula?
Kuma keti Yehova, Uje itwabiisilile?
Babyanene kwenda mu bingila byendi,
Co kubononokele lishiko lyendi.
25 Ngeci, watwaleleleleho kubalubalela
Na kubalingisa baliwane na nzita mangana abamwese butenu bwendi.
Butenu bwendi bwanyongesele byoshe byabazengelekele, oloni kubakeleko mbunge.
Bwabepukilile, oloni kubombileko mbunge.