Samu
Kuli muka-kutwamenena. Mwaso wa Devidi.
64 Ziba lijwi lyange, obe Njambi, omwo njilambelela.
Nyungilila mwonyo wange kuli citozi uje ali na kunjijujwisa.
2 Njinyungilile ku matumbe akushwekesa a banu bababi,
Ku mbunga ya banu baka-kulinga byuma byabibi.
3 Botola bindaka byabo ngwe mukwale.
Basungamesa majwi abo amabi ngwe mikili,
4 Mangana bashe munu wa kujeneka mulonga oku bali mu myela yabo ya kulishweka.
Bamwasha mu kukasumuna kwa kujeneka kuziba lyoba.
5 Bakakateya biyongola byabo byabibi.*
Basimutwiya mubashwekela miheto yabo.
Bendeka ngwabo: “Iyajo aimona?”
6 Batonda-tonda bingila byabiha bya kulingilamo bubi.
Batumba butumbe bwabo bwa linyanyamena ku bushweke.
Bisinganyeka bya mu mbunge ya umo na umo wabo hahi habyasikisila.
7 Oloni Njambi abasha.
Babulumuka na mukili mu kukasumuna.
8 Bindaka byabo bibalingisa bawe.
Boshe baje babamona balipika ku mitwe.
9 Co banu boshe bakaziba lyoba,
Co bakambulula byuma byanalingi Njambi
Na kuzibisisa bilinga byendi.
10 Munu wa kusungama akabwahelela mwafwa ya Yehova na kutewela kuli ikeye.
Banu boshe ba kusungama mu bimbunge bakalisamba.*