Samu
Kuli muka-kutwamenena. Cilumo ca mwaso cibasana ngwabo: “Bintemo.” Kwanukisa. Mwaso wa Asafu.
80 Obe kanyungi ka Isalele, tolilila,
Yobe uli na kutwamenena Jozefu ngwe uje atwamenena butanga.
2 Mwesa nzili yobe
Ku mesho a Efremu na Benjamini na Manase.
Ija wakutwobole.
3 Obe Njambi, twilwise.
Cihanga cobe citwile ceke hali yetu mangana twoboke.
4 Obe Yehova Njambi wa maswalale, wambata simbu ya kupwa hali oku unalubalela banu bobe na kubyana kutolilila ku malombelo abo?
5 Ubana misozi kupwa byakulya byabo,
Co ubanwisa misozi yaingi manene.
6 Unatabesa baje batwatunga nabo balizungisile yetu.
Bitozi betu bali na kutwalelelaho kutujola mwoshe mubashakela.
7 Obe Njambi wa maswalale, twilwise.
Cihanga cobe citwile ceke hali yetu mangana twoboke.
8 Walingisile muti wa binyu utunde mu Ijipiti.
Washekele baka-mafuti mu lifuti lyabo na kuukunamo.
9 Waubwaheselele mwela,
Co ou muti washimbikile mizi na kujalakana mu lifuti lyoshe.
10 Minkinda yakele mu munzinze wawo,
Co minango yawo yafwikile miti ya Njambi ya sida.
11 Minango yawo yetele na mu kalunga-ndonga,
Co mizi yawo yetele na ku Ndonga.*
12 Bika biunasiwila cibumbe cije cinazengelekele muti wa binyu?
Mwafwa banu boshe bali na kwita bali na kupotola bushuka bwawo.
13 Byombo bali na kuubiisa,
Co tusitu ba mu shwata bali na kuulya.
14 Obe Njambi wa maswalale, iluka.
Tala hasi oku uli mwilu na kumona.
Nyunga ou muti wa binyu,
15 Nsina* ilyakunine liboko lyobe lya cilyo,
Tala munobe* uje iwalikanyameselele yobe babenya.
16 Banawenyeka na tuhya, banautete.
Bananyongo mwafwa ya kutenuka kwobe.*
17 Liboko lyobe likwase munu uje ali ku liboko lyobe lya cilyo,
Likwase muna munu uje iunalikanyamesela yobe babenya.
18 Co kututundu kuli yobe.
Tunyunge mangana tusane ha lizina lyobe.
19 Obe Yehova Njambi wa maswalale, twilwise.
Cihanga cobe citwile ceke hali yetu mangana twoboke.