Genese
34 Dina muna Jakobu wa mumbanda yakitile na Leya wakele na kuya na kusikama* na bambanda ba muje mu lifuti. 2 Co Shekemu, muna Hema wa kaHivi mwamwene Dina wamukwatele na kukamupika. Hema wapwile mwata wa muje mu lifuti. 3 Co Shekemu wakele na kusinganyeka lika Dina muna Jakobu wa mumbanda, co wamuzemene manene na kwendeka nendi majwi a kumukokweya.* 4 Co mamaneselelo Shekemu walekele ishe Hema ngwendi: “Njambatele ou mumbanda mangana apwe munakazi wange.”
5 Jakobu wazibile ngwabo munendi Dina wa mumbanda banamujwalesa. Ha simbu oyo, bana bendi ba banalume bakele mu shwata na bimuna bendi. Ngeci Jakobu wolokele lika kulu kweta noho habelukilile bana bendi. 6 Mu kwita kwa simbu, Hema ishe ya Shekemu waile na kusimutwiya na Jakobu. 7 Oloni bana ba Jakobu bazibile byalingiwile, co belukile kwimbo bwasi-bwasi. Bazibile kubabala ku bimbunge na kulubala manene mwafwa Shekemu washawile Isalele ha kulilala na muna Jakobu wa mumbanda, cuma cije kucapandele kulingiwa.
8 Hema wakasimutwiiye nabo ngwendi: “Munange Shekemu nazeme manene munobe wa mumbanda. Shukulu-kambu, mwaneye apwe munakazi wendi, 9 mangana tulyambatele. Twaneni bana beni ba banakazi, co neni mwambata bana betu ba banakazi. 10 Mwasa kukala netu, co mwasa kulinga byoshe bimutonda muno mu lifuti. Kalenimo na kulingilamo mingoso na kutungamo.” 11 Co Shekemu walekele ishe ya Dina na bandolome bendi ngwendi: “Njiwane kutetela ku mesho eni, co njimyana byoshe bimulomba. 12 Mwasa kunjitomena byonda byabingi manene na bwana. Njimyana byoshe bimunjileka. Njaneni lika ou mumbanda mangana apwe munakazi wange.”
13 Co bana ba Jakobu ba banalume bakwisile Shekemu na Ishe Hema mwafwa Shekemu wajwalesele ndokazi yabo Dina. 14 Bendekele ngwabo: “Kutwasa kulinga cuma ca cifweci. Kutwasa kwana ndokazi yetu kuli munalume uje kaile ku mukanda mwafwa tushauka. 15 Tutaba lika bimunatuleke nga mulinga eci cuma: ngwetu mutwale banalume boshe ku mukanda mangana mupwe ngwe yetu. 16 Co tumyana bana betu ba banakazi, co netu twambata bana beni ba banakazi, co tukala hamolika neni na kupwa banu bamo. 17 Oloni nga kumututolilila na kujeneka kuya ku mukanda, co twambata ndokazi yetu na kuya nendi.”
18 Awa majwi abendekele azibisile kubwaha Hema na munendi Shekemu. 19 Uje mukwenje walingile bwasi bibamulekele mwafwa wazemene manene muna Jakobu wa mumbanda, co uje mukwenje ikeye wapwile wa bulemu manene ku njibo ya ishe.
20 Ngeci Hema na munendi Shekemu baile ku cikolo ca nganda na kukasimutwiya na banalume ba mu nganda yabo, ngwabo: 21 “Aba banu bashaka kukala netu mu kwoloka. Tubatabeseni bakale mu lifuti lyetu na kulingilamo mingoso mwafwa lifuti lyakama basa kukalamo. Twasa kwambata bana babo ba banakazi kupwa banakazi betu. Netu twasa kubana bana betu ba banakazi. 22 Aba banu ngwabo basa kutaba lika kukala netu na kupwa banu bamolika netu nga tulinga eci cuma: nga banalume boshe mukati ketu baya ku mukanda ngwe mubanalingila bakebo. 23 Co byuma byabo, bufuko bwabo na bimuna babo boshe bipwa byetu. Ngeci, tutabeni bibanendeka mangana bakale netu.” 24 Banalume boshe baje bakele na kukobela na kutuhuka ku cikolo ca nganda batabele byabalekele Hema na munendi Shekemu. Co banalume boshe baje bakele na kukobela na kutuhuka ku cikolo ca nganda babatwalele ku mukanda.
25 Oloni ha litangwa lyamucitatu baje banalume te baciziba kubabala, bana ba Jakobu babali, Simyoni na Levi, bandolome ya Dina bambatele mikwale yabo na kukobela mu nganda. Oloni banu ba muje mu nganda, kubanangukile ngwabo banaija na kubatsiya. Ngeci, Simyoni na Levi batsiile banalume boshe ba muje mu nganda. 26 Batsiile Hema na munendi Shekemu na mukwale, co bambatele Dina uje wakele ku njibo ya Shekemu, co baile. 27 Bana ba Jakobu bakwabo ba banalume baile muje mu nganda mwakele baje bibimbi, co bakaipukwile mwafwa bajwalesele ndokazi yabo. 28 Co bambatele matanga abo a bimanga nawa a bingombe na bidonki na byuma byoshe byakele muje mu nganda na mu shwata. 29 Co bambatele byuma byabo byoshe na kwambata bana babo babandondo na banakazi babo na kupukula byuma byoshe byakele mu binjibo byabo.
30 Co Jakobu walekele Simyoni na Levi ngwendi: munanjinenela bukalu bwakama na kunjizindisa ku banu ba muno mu lifuti, baKanana na baPerizite. Yetu tunapu tubabandondo, co aba banu batukungulukila na kutulwisa, co batunyongesa, yange na ba ku njibo yange.” 31 Oloni bendekele ngwabo: “Kutwasa kwecelela munu apwise ndokazi yetu ngwe lihule.”