Samu
Mwaso wembile Devidi mwakele mu mambo ya Juda.
63 Obe Njambi, yobe Njambi yange. Njitwalelelaho kukutonda.
Njili na lihwila lya kushaka yobe ngwe munu uje natsi lihwila.
Njinalezumuka mwafwa ya kushungwiya yobe
Muno mu lifuti lya kuma cau, mwa kujeneka mema.
2 Ngeci, njakumono mu mwela wa kujela.
Njamono nzili yobe na bumpau bwobe.
3 Tunwa twange tukushangazala
Mwafwa cizemo cobe cije kucesi kutenguluka capwa cacibwa manene kutubakana kuyoya.
4 Ngeci njikushangazala mu kuyoya kwange kwoshe.
Njijundula maboko ange mwafwa ya lizina lyobe.
5 Njajauka* na byuma byabibwa biunanjangwila,
Ngeci kanwa kange kakushangazala mu kubwahelela.
6 Njikwanuka ha simbu injili ha mwela wange.
Njisinganyekesesa hali yobe mukati ka butsiki.
7 Mwafwa yobe mukwasi wange,
Njitambeka mu kubwahelela mu munzinze wa mambaba obe.
8 Njikakateya kuli yobe.
Liboko lyobe lya cilyo lyanjikwatelela.
9 Oloni baje bashaka kunyongesa mwonyo wange*
Basikumuka mu libu.
10 Bakabanyongesa na mukwale.
Bakapwa byakulya bya bimbanje.
11 Oloni mwene akabwahelela mwafwa ya Njambi.
Munu woshe uje alisinga hali Njambi akalisamba*
Mwafwa kanwa koshe kaje kendeka makuli bakakolwesa.