Genese
38 Ha simbu ije, Juda wasezele bandolome bendi, co wakashimbikile tenti yendi kuyehi na munalume wa kaAdulamu wa lizina lya Hila. 2 Mwakele kuje, Juda wamwene muna kaKanana wa lizina lya Shuwa. Ngeci wamwambatele na kulilala nendi, 3 co wakele na cikute. Mu kwita kwa simbu, wakitile mwana wa munalume, co wamulukile ngwendi Ele. 4 Wakele lalo na cikute, co wakitile mwana wa munalume. Wamulukile ngwendi Onani. 5 Wakitile lalo mwana wa munalume, co wamulukile ngwendi Shila. Juda wakele mu Akizibu, munakazi wendi mwamukitilile Shila.
6 Mu kwita kwa simbu, Juda wambatelele munendi wa ntwatwa Ele munakazi. Lizina lyou munakazi lyapwile Tamala. 7 Oloni Ele ntwatwa ya Juda kazibisile Yehova kubwaha ku mbunge, ngeci Yehova wamutsiile. 8 Juda mwamwene ngoco, walekele Onani ngwendi: “Lilale na munakazi wa ndolome yobe mangana mulinge bulo bwa munu na nyali yendi mangana ukitileko ndolome yobe bana.” 9 Oloni Onani wazibukile ngwendi bana bakita na nyali yendi kubabamono kupwa bana bendi. Ngeci mwakele na kulilala na nyali yendi, wakele na kwitila mbuto yendi hasi mangana keti akitile ndolome yendi bana. 10 Byuma byalingile byapwile byabibi ku mesho a Yehova, ngeci nendi wamutsiile. 11 Co Juda walekele inamweno Tamala ngwendi: “Ya ukakale ngoco bene mu bufwile mu njibo ya isho kweta noho hakakolela munange wa munalume Shila,” mwafwa Juda walyendekesele ngwendi: ‘Shila nendi hamo atsa ngwe bandolome bendi.’ Ngeci Tamala waile wakakele mu njibo ya ishe.
12 Mu kwita kwa simbu, muna Shuwa munakazi wa Juda watsile. Juda walilile munakazi wendi kweta noho hayahwililile simbu ya kumulila, co waile kuli baka-kutehula bimanga bendi ku Timunaha, waile hamo na kabusamba kendi Hila wa kaAdulamu. 13 Tamala bamulekele ngwabo: “Tala, ishomweno ali na kuya ku Timunaha na kutehula bimanga bendi.” 14 Tamala mwazibile ngoco, washulwile bizalo byendi bya bufwile na kuzala byeka, co walifwikile naanga ku mesho na kulifwika lalo shawelo. Co wakatumamene ku cikolo ca Enaimu ije yakala mu ngila ya kuya ku Timunaha mwafwa Tamala wamwene ngwendi Shila nakolo, oloni kubamushombweseleko.
15 Juda mwamwene Tamala, wasinganyekele ngwendi hamo lihule mwafwa wafwikile ku mesho endi. 16 Ngeci Juda waile kumukulo wa ngila kuli Tamala na kukamuleka ngwendi: “Njitabese njililale nobe.” Juda wendekele ngoco mwafwa kazibukile ngwendi wapwile inamweno. Oloni Tamala wakumbulwile ngwendi: “Unjana bika nga ulilala nange?” 17 Juda wakumbulwile ngwendi: “Njikakutumina muna membe ha butanga bwange.” Oloni Tamala wamwihwile ngwendi: “Kuma unjanako bimo binjikwatelamo kweta noho haukatumina owo muna membe ndi?” 18 Juda wamwihwile ngwendi: “Ushaka ngwobe njikwane bika biukwatelamo?” Tamala wamukumbulwile ngwendi: “Njane riñi yobe ya cizibukiso na mukole wobe na mulamu owo uli mu liboko lyobe.” Juda wamwanenebyo, co walilalele nendi, co Tamala wakele na cikute ca Juda. 19 Munima yebi, Tamala wakatukile na kuya, co washulwile shawelo na kuzala bizalo byendi bya bufwile.
20 Co Juda watumine kabusamba kendi wa kaAdulamu ngwendi atwale muna-membe na kukambata byuma byakwatelelemo uje munakazi, oloni kakamuwanene. 21 Uje kabusamba kendi wehwile banu ba muje mu mwela ngwendi: “Ali kuli uje lihule wa mu tempele uje akakala kumukulo wa ngila mu Enaimu?” Oloni bamukumbulwile ngwabo: “Muno mu mwela kumwakele lihule wa mu tempele.” 22 Mamaneselelo welukile kuli Juda na kukamuleka ngwendi: “Uje munakazi kunjakamuwanene, co lalo banu ba muje mu mwela banendeka ngwabo, ‘Muno mu mwela kumwakele lihule wa mu tempele.’” 23 Ngeci Juda wendekele ngwendi: “Ambate ngano mwafwa nga tutwalelelaho kumutonda tushaukilaho lika. Yange njinamutuminine muna membe, oloni kuwamuwanene.”
24 Munima ya bingonde bitatu, Juda bamulekele ngwabo: “Nyokomweno Tamala nalingi buhule, co mu buhule bwendi nakawanamo cikute.” Juda mwazibile ngoco, wendekele ngwendi: “Mutuhuleni hanja mangana bamwenyeke.” 25 Mubakele na kumutuhula hanja, watumine lijwi kuli ishemweno ngwendi: “Babenya ebi byuma ikeye nanjana cikute.” Co wendekele lalo ngwendi: “Acibitalesese mwamubwa, co unjileke babenya ei riñi nou mukole nou mulamu.” 26 Co Juda watalesesele bije byuma na kwendeka ngwendi: “Tamala napu muka-kusungama manene kunjitubakana mwafwa kunjamwanene munange wa munalume Shila ngwange amwambate.” Co Juda kalilalele lalo na Tamala kutunda haje.
27 Simbu yendi ya kupapa muyetele, wapapele bampasa. 28 Mwakele na kupapa, umo wabo watuhwisile liboko lyendi, co bwasi-bwasi muka-kupapesa wambatele bwanda bwa kubenga na kubukuta ku liboko lyendi na kwendeka ngwendi: “Ou ikeye nalibanga kusemuka.” 29 Oloni mwelwisile lika liboko lyendi, ndolome yendi wasemukile. Co uje muka-kupapesa wendekele ngwendi: “Tala, unalitubila ngila yobe babenya.” Ngeci bamulukile ngwabo Pelezi.* 30 Kutundaho, ndolome yendi uje ibakutile bwanda bwa kubenga ku liboko wasemukile, co bamulukile ngwabo Zera.