Jelemiya

52 Zedekiya wakele na myaka 21 mwapwile mwene, co wayulile myaka 11 mu Jelusalema. Ina wapwile Hamutale, muna Jelemiya wa ku Libuna. 2 Zedekiya watwaleleleleho kulinga byuma byabibi ku mesho a Yehova ngwe mwalingile Jehoyakimu. 3 Ebi byuma byalingiwile mu Jelusalema na mu Juda mwafwa Yehova walubalele, mamaneselelo wabatundisile ku mesho endi. Co Zedekiya watengulukilile mwene wa Babiloni. 4 Mu mwaka wa bu 9 wa ciyulo ca Zedekiya, mu ngonde ya bu 10, ha litangwa lya bu 10 omu mu ngonde, Mwene Nebukadineza* wa Babiloni wezile na maswalale bendi boshe na kulwisa Jelusalema. Batungile cilombo kuyehi nayo na kutunga cibumbe ca kuzengulwisa nganda. 5 Co nganda ya Jelusalema baizengelekele kweta na mu mwaka wa bu 11 wa ciyulo ca Mwene Zedekiya.

6 Mu ngonde yamuciwana, ha litangwa lya bu 9 omu mu ngonde, njala yamene manene mu nganda, co banu ba mu lifuti kubakele na byakulya. 7 Mamaneselelo baKaudiya batubile cibumbe ca nganda, co maswalale boshe batewele mu nganda butsiki, batuhukilile ku cikolo cije cakele mukati ka bibumbe bibali kuyehi na lihya lya mwene oku baKaudiya banazengeleka nganda, co batwaleleleleho kutewa kupangesa ngila ya Alaba. 8 Oloni baKaudiya bashekele Mwene Zedekiya, co bakamuwanene mu byana bya Jeliko, co maswalale bendi boshe balishandokele na kumuseza. 9 Co bakwatele Mwene Zedekiya na kumutwala kuli mwene wa Babiloni ku Ribula mu lifuti lya Hamathi, co wakamusompele. 10 Co mwene wa Babiloni watsiilile bana ba Zedekiya ha mesho endi, co lalo watsiilile bamyata ba Juda boshe ku Ribula. 11 Co mwene wa Babiloni watubile mesho a Zedekiya na kumukuta malyenge a kopa na kumutwala ku Babiloni, co wamwakele mu kamenga kweta noho hatsililile.

12 Mu ngonde ya mu citanu, ha litangwa lya bu 10 omu mu ngonde, kulumbununa mu mwaka wa bu 19 wa ciyulo ca Mwene Nebukadineza* mwene wa Babiloni, Nebuzaladani mukulunu wa baka-kunyunga uje wakele na kunyunga mwene wa Babiloni wezile mu Jelusalema. 13 Wenyekele njibo ya Yehova, na njibo ya mwene, na binjibo byoshe bya mu Jelusalema, co lalo wenyekele binjibo byoshe byakama. 14 Co maswalale boshe ba baKaudiya baje bakele hamo na mukulunu wa baka-kunyunga basiwile bibumbe bije byazengelekele Jelusalema.

15 Nebuzaladani mukulunu wa baka-kunyunga wambatele banu bamo ba kwisi na banu boshe baje basalele mu nganda na kubatwala mu bufunge. Wambatele lalo na baje batewelele kuli mwene wa Babiloni hamolika na bangangula ba bitongwe. 16 Oloni Nebuzaladani mukulunu wa baka-kunyunga wasezeleko tuhutu bamo ba mamaneselelo mu lifuti mangana bapwe baka-kupanga mu mahya a binyu na baka-kupanga bipangi bya kubasindiya.

17 Co baKaudiya babwabwanyele bingunzi bya kopa bya ku njibo ya Yehova na matemba, na lilonga lyakama lya kopa, bije byakele mu njibo ya Yehova, co bambatele kopa yoshe na kuya nayo ku Babiloni. 18 Bambatele lalo maleki, mafosholo, byakuzimisa tuhya, malonga, binganja na bikwata byoshe bya kopa bibakele na kupangesa mu tempele. 19 Mukulunu wa baka-kunyunga wambatele malonga, bilahwilo bya tuhya, malonga a kuloba, maleki, bitumbikilo bya bindeya, binganja na malonga akwabo. Byoshe ebi byapwile bya goudi na siuva mpundu. 20 Oloni bingunzi bibali na lilonga lyakama lya kopa, na bingombe ba kopa 12 baje bakele kwisi ya lilonga lya kopa, na matemba aje apangele Mwene Solomoni a ku njibo ya Yehova, kopa yabyo yalemene manene, co kubasele kuipeselesa.

21 Kutalesa ku bingunzi, ngunzi na ngunzi yapwile makyubiti* 18 mu bulaha, co mukole wa kusetekesa wa makyubiti 12 wasele kuizengeleka. Mpimo ya ije ngunzi yapwile hamo na minye iwana,* co hakati yakele na bwina. 22 Co mutwe wa ngunzi yakulibanga wapwile wa kopa, co bulaha bwa uje mutwe bwapwile makyubiti atanu. Co bikubo bya kulishelasana na mapomagraneti aje azengelekele uje mutwe, byoshe byapwile bya kopa. Ngunzi yamucibali yapwile lika ngwe ngunzi ya kulibanga na mapomagraneti ayo. 23 Kumikulo kwakele mapomagraneti 96, co mapomagraneti oshe azengelekele bikubo bya kulishelasana apwile 100.

24 Mukulunu wa baka-kunyunga wambatele lalo na kapilistu wakama Selaya, na Zefaniya uje wakele na kukwasa kapilistu wakama na baka-kunyunga ku bikolo batatu. 25 Co mu nganda wambatelemo mukulunu umo wa mu nkuta uje wapwile mukulunu wa maswalale, na babusamba ba mwene 7 baje bakele mu nganda, na muka-kusonekela mukulunu wa maswalale uje wapwile lalo muka-kukobelesa maswalale bipangi, na banalume 60 ba mu lifuti baje babawanene mu nganda. 26 Nebuzaladani mukulunu wa baka-kunyunga wabambatele na kubatwala kuli mwene wa Babiloni ku Ribula. 27 Mwene wa Babiloni wabatsiilile ku Ribula mu lifuti lya Hamathi. Ngeci Juda yaile mu bufunge kutunda mu lifuti lyayo.

28 Aba bakebo banu baatwalele Nebukadineza mu bufunge. Mu mwaka wa bu 7 wa ciyulo cendi, watwalele baJuda ba kupwa 3,023.

29 Mu mwaka wa bu 18 wa ciyulo ca Nebukadineza, bambatele banu 832 kutunda mu Jelusalema.

30 Mu mwaka wa bu 23 wa ciyulo ca Nebukadineza, Nebuzaladani mukulunu wa baka-kunyunga watwalele baJuda mu bufunge ba kupwa 745.

Banu boshe babatwalele mu bufunge bapwile 4,600.

31 Co mukwetile myaka 37 kutunda haililile Mwene Jehoyakimu wa Juda mu bufunge mu ngonde ya bu 12 ha litangwa lya bu 25 omu mu ngonde, Mwene Evili-melodaki wa Babiloni wapatwile Mwene Jehoyakimu wa Juda na kumutundisa mu kamenga, co ou ukewo mwaka wapwile mwene Evili-melodaki. 32 Wasimutwiiye nendi mwamubwa na kumwaka ha litanda lya helu kutubakana matanda a bimyene bakwabo baje bakele nendi mu Babiloni. 33 Co Jehoyakimu washulwile bizalo byendi bya mu kamenga, co simbu yoshe wakele na kulya hamo na mwene mu matangwa oshe a kuyoya kwendi. 34 Co mwene wa Babiloni washikile ngwendi Jehoyakimu bamwane byakulya simbu yoshe litangwa na litangwa kweta noho hatsililile. Mu kuyoya kwendi kwoshe wakele na kutambula byakulya kuli mwene.