Ezekiele
29 Mu mwaka wa bu 10, mu ngonde ya bu 10, ha litangwa lya bu 12 omu mu ngonde, Yehova wanjilekele lalo ngwendi: 2 “Muna munu, tala kuli Falo mwene wa Ijipiti, co upolofwete byuma bikalingiwa kuli ikeye na ku lifuti lya Ijipiti lyoshe. 3 Endeka ngwobe: ‘Mwata Wahakamwa ya Byoshe Yehova nendeka ngwendi:
“Njikulwisa obe Falo mwene wa Ijipiti,
Yobe cikashama wakama wa mu kalunga-ndonga uje nalala mu bana ba bindonga ba Nailo,*
Uje nendeka ngwendi, ‘Ndonga ya Nailo yapwa yange.
Njalipangeleleyo yange babenya.’
4 Oloni njikaka tulobo mu bimbange byobe, co njikalingisa bisi ba mu ndonga yobe ya Nailo bakakateye ku mabanda obe.
Njikakutundisa mu ndonga yobe ya Nailo hamolika na bisi boshe ba mu Nailo baje bakakakateya ku mabanda obe.
5 Njikakuseza mu mambo, yobe na bisi boshe ba mu ndonga yobe ya Nailo.
Ukawila hasi, co kubakakwambata na kukutsinda.
Njikakupwisa byakulya bya bikashama na tuzila.
6 Co baje batunga mu Ijipiti boshe bakazibuka ngwabo yange Yehova,
Mwafwa kubakwasele bakunjibo ya Isalele. Bapwile ba kuzeya ngwe cishoni.*
7 Mubakukwatele ku liboko, wapokozokele,
Co wabalengozwele ha bitsili.
Mubalizamenene hali yobe, wapokokele,
Co walingisile mendi* abo ajaje.”
8 “‘Mwata Wahakamwa ya Byoshe Yehova nendeka ngwendi: “Njikunenela mukwale, co njitsiya banu na tusitu baje bali muli yobe. 9 Lifuti lya Ijipiti likapwa ngundu na mwela uje unabihya, co bakazibuka ngwabo yange Yehova mwafwa unendeka ngwobe, ‘Ndonga ya Nailo yapwa yange, yange njaipangele.’ 10 Ngeci njikulwisa na kulwisa ndonga yobe ya Nailo, co njilingisa lifuti lya Ijipiti libihye na kuma. Njilibiisa na kulipwisa ngundu, kushangumukila ku Migido kutwala ku Siyene kuketa na ku nginga ya Ithopia. 11 Banu na bimuna kubaketimo, co wahi akakalamo ha myaka 40. 12 Njikalingisa lifuti lya Ijipiti libihye manene kutubakana mafuti akwabo, co binganda byalyo bikabihya manene kutubakana binganda bikwabo ha myaka 40. Co njikashandwela baka-Ijipiti mukati ka baka-mafuti na kubashandanganena mukati ka mafuti.”
13 “‘Mwafwa Mwata Wahakamwa ya Byoshe Yehova nendeka ngwendi: “Myaka 40 muikaita, njikakungulula baka-Ijipiti kutunda ku baka-mafuti kuje kunjabashandwelele. 14 Njikelwisa lalo bafunge ba Ijipiti ku lifuti lya Patrosi, ku lifuti lyabo kuje kubatunda, co bakapwa bumwene bwabundondo. 15 Ijipiti ikapwa yaindondo kutubakana bumwene bukwabo, co kuikalyatelela lalo mafuti akwabo, co njikabalingisa bapwe babandondo manene, co kubakasa kufungulula miyati ikwabo. 16 Bakunjibo ya Isalele kubakakulahela lalo Ijipiti, oloni ikabanukisa mulonga ubalingile ha kulomba bukwasi kuli baka-Ijipiti, co bakazibuka ngwabo yange Mwata Wahakamwa ya Byoshe Yehova.”’”
17 Co mu mwaka wa bu 27, mu ngonde ya kulibanga ha litangwa lya kulibanga omu mu ngonde, Yehova wanjilekele ngwendi: 18 “Muna munu, Mwene Nebukadineza* wa Babiloni walingisile maswalale bendi bapange na nzili mu kulwisa Tile. Mitwe yoshe baikongobwele, co bitsili byoshe byatosokele, oloni ikeye na maswalale bendi kubatambwile fweto ha cipangi cibalingile ca kulwisa Tile.
19 “Ngeci, Mwata Wahakamwa ya Byoshe Yehova nendeka ngwendi, ‘Njana lifuti lya Ijipiti kuli Mwene Nebukadineza* wa Babiloni, co akambata bufuko bwalyo na kupukulamo byuma byabingi, co bikebyo bikapwa fweto ya maswalale bendi.’
20 “‘Njikamwana lifuti lya Ijipiti kupwa fweto mwafwa ya cipangi cananjilingila ca kulwisa Tile,’ ngwendi Mwata Wahakamwa ya Byoshe Yehova.
21 “Ha litangwa olyo, njikamenesela limbinga bakunjibo ya Isalele, co njikakutabesa wendeke mukati kabo, co bakazibuka ngwabo yange Yehova.”