Ezekiele
32 Co mu mwaka wa bu 12, mu ngonde ya bu 12, ha litangwa lya kulibanga omu mu ngonde, Yehova wanjilekele lalo ngwendi: 2 “Muna munu, imba mwaso wa busiwa kutalesa kuli Falo mwene wa Ijipiti, ngwobe
‘Wapwile ngwe muna ndumba wa kukanyama wa baka-mafuti,
Oloni banakwolwesa.
Wapwile ngwe cikashama mu kalunga-ndonga, wakele na kupwacangela mu bindonga byobe,
Wakele na kubundula mema na mendi obe na kubiisa bindonga.’
3 Mwata Wahakamwa ya Byoshe Yehova nendeka ngwendi:
‘Njikakutela bwanda bwange kupangesa mbunga ya mafuti amangi,
Co bakakukoka mu bwanda bwange bwakama.
4 Njikakuseza ha nunda.
Njikakumbila hashandangala.
Njikalingisa tuzila boshe bakatongame hali yobe,
Co njikalingisa bikashama ba ha lifuti-libu hoshe bakulye.
5 Njikombila situ yobe ha minkinda,
Co bije bikasala hali yobe njikabyumbangela mu bingulunga.
6 Njikajulisa eli lifuti na maninga obe aje akangongomokela na ku minkinda,
Co akashula mu bana ba bindonga.’
7 ‘Co muukanyonga, njikafwika melu na kuzibalesa bingongonosi byamwo.
Njikafwika mashelwa ha litangwa,
Co ngonde kuikatu ceke.
8 Njikazibalesa byeke byoshe bya mwilu mwafwa yobe,
Co njikanena lisusulungu mu lifuti lyobe,’ ngwendi Mwata Wahakamwa ya Byoshe Yehova.
9 ‘Njikalingisa banu babangi bashote bimbunge munjikatwala bafunge bobe ku mafuti eka,
Ku mafuti aje kubazibukile.
10 Njikalingisa miyati yaingi ilikasamene,
Co munjikahwingisa mukwale wange kulutwe lwabo, bimyene babo bakalijajela mwafwa yobe.
Ha litangwa liukawa,
Bakatwalelelaho kulijajela, umo na umo akatewa kutsa.’
11 Mwafwa Mwata Wahakamwa ya Byoshe Yehova nendeka ngwendi:
‘Mukwale wa mwene wa Babiloni ukakwizila.
12 Njikalingisa mbunga yobe itse ku mikwale ya baka-kulwa ba nzili,
Baje bapwa ba kukenyuka manene hakati ka baka-mafuti. Boshe bapwa ba kukenyuka.
Bakamanesa kulyalesa kwa Ijipiti, co mbunga yendi yoshe ikanyonga.
13 Njikanyongesa bimuna bendi boshe baje bali kuyehi na mema endi amangi,
Co kukwesi lindi lya munu nambe mbemba ya cimuna ije ikawabundula lalo.’
14 ‘Njikajelesa mema abo,
Co njikalingisa mema a mu bindonga aite ngwe mazi,’ ngwendi Mwata Wahakamwa ya Byoshe Yehova.
15 ‘Munjikapwisa Ijipiti ngundu na kuipwisa lifuti lije linabihya, lifuti lije kulyesi na byuma bije byakelemo,
Munjikanyongesa boshe baje balimo,
Co bakazibuka ngwabo yange Yehova.
16 Ou ukewo mwaso wa busiwa, co banu bakawimba.
Bana ba banakazi ba baka-mafuti bakawimba.
Bakawimbila Ijipiti na mbunga yendi yoshe,’ ngwendi Mwata Wahakamwa ya Byoshe Yehova.”
17 Co mu mwaka wa bu 12, ha litangwa lya bu 15 omu mu ngonde, Yehova wanjilekele ngwendi: 18 “Muna munu, lila mbunga ya Ijipiti na kuleka Ijipiti ngwobe akaya mu libu, ikeye na bana ba banakazi ba miyati ya nzili, hamolika na baje bali na kuya mu bwina.*
19 “‘Obe Ijipiti, kuma usinganyeka ngwobe u wamubwa manene kutubakana bakweni ndi? Ya mu libu, co yaukalale hamolika na baje kubaile ku mukanda.’
20 “‘Bakawila mukati ka baje banatsi ku mukwale. Banamutsii na mukwale. Mupulunye atunde hano hamolika na mbunga yendi yoshe.
21 “‘Baka-kulwa ba nzili manene bakendeka nendi na bakwasi bendi oku ali mu Cihilo.* Bakaya bene mu cihilo, bakabatsiya na mukwale, co bakalala ngwe baje kubaile ku mukanda. 22 Asiria kwali hamolika na mbunga yendi yoshe. Bihilo byabo binamuzengeleka, boshe banatsi ku mukwale. 23 Bihilo byendi bili mu bwina bwa kuloba manene, co mbunga yendi yoshe inazengeleka cihilo cendi, boshe banatsi ku mukwale, mwafwa mubakele na kuyoya bazibisile bakwabo lyoba.
24 “‘Elamu kwali hamolika na mbunga yendi yoshe ije inazengeleka cihilo cendi, boshe banatsi ku mukwale. Baje bazibisile bakwabo lyoba mubakele na kuyoya banai mu libu kwa kujeneka kuya ku mukanda. Hanwoni baziba shwamwa hamolika na baje baya mu bwina.* 25 Banamubwahesela mwela mukati ka bibimbi, hamolika na mbunga yendi yoshe ije inazengeleka bihilo byendi. Boshe kubaile ku mukanda banatsi ku mukwale, mwafwa mubakele na kuyoya bazibisile bakwabo lyoba. Co bakaziba shwamwa hamolika na baje baya mu bwina.* Banamwaka hamo na bibimbi.
26 “‘Kuje kukekwo kwali Mesheki na Tubau na mbunga yabo* yoshe. Bihilo byendi byoshe binamuzengeleka. Boshe baje kubaile ku mukanda banabatubu mukwale, mwafwa mubakele na kuyoya bazibisile bakwabo lyoba. 27 Bakalala hamolika na baka-kulwa ba nzili ba kujeneka kuya ku mukanda baje banau, baje baile mu Cihilo* na bitwa byabo bya nzita. Co bakaka mikwale yabo kwisi ya mitwe* yabo, co bubi bwabo bakabwaka ha bitsiya byabo, mwafwa aba baka-kulwa ba nzili mubakele na kuyoya, bazibisile bakwabo lyoba. 28 Oloni yobe bakakunyongesela mukati ka baje kubaile ku mukanda, co ukalala hamolika na baje banatsi ku mukwale.
29 “‘Edomu na bimyene bendi na bamyata bendi boshe kubali kuje, nameme bakele na nzili, oloni babalangekele hamolika na baje batsile ku mukwale. Nabo bakalala hamolika na baje kubaile ku mukanda na baje bali na kuya mu bwina.*
30 “‘Kuje kukekwo kubali bamyata* boshe ba ku kunto hamolika na baka-Sidoni boshe, baje banai mu cihilo na shwamwa na bibimbi nameme bazibisile bakwabo lyoba mwafwa ya nzili yabo. Bakatsa kwa kujeneka kuya ku mukanda hamolika na baje banatsi ku mukwale, co bakaziba shwamwa hamolika na baje baya mu bwina.*
31 “‘Falo akamona byoshe ebi, co akasimpilaho mwakamona byuma byoshe binalingiwa ku mbunga yendi. Falo na maswalale bendi boshe bakabatsiya na mukwale,’ ngwendi Mwata Wahakamwa ya Byoshe Yehova.
32 “‘Omwo Falo wazibisile bakwabo lyoba mwakele na kuyoya, ikeye na mbunga yendi yoshe bakabatsinda hamo na baje kubaile ku mukanda, baje babanatsii na mukwale,’ ngwendi Mwata Wahakamwa ya Byoshe Yehova.”