Jelemiya
22 Yehova nendeka ngwendi: “Ya ku njibo ya mwene wa Juda ukamuleke ou muzimbu. 2 Ukamuleke ngwobe, ‘Tolilila ku lijwi lya Yehova, obe Mwene wa Juda, yobe unatumama ha litanda lya Devidi, yobe na bangamba bobe na banu bobe baje baketi muno mu bikolo. 3 Yehova nendeka ngwendi: “Akuleni banu mwamubwa na kupwa ba kusungama. Oboleni banu mu maboko a baje bali na kubebila. Keti muyandese muka-kwija, co lalo keti mulinge mwamubi mwana wa kujeneka ishe, nambe fwile. Co keti mwitile maninga a kujeneka mulonga muno mu mwela. 4 Mwafwa nga mwononoka awa majwi oshe, co bimyene baje batumama ha litanda lya Devidi baketa mu bikolo byei njibo oku banalondo mu matemba na ha tubalu, bakebo na bangamba babo na banu babo.”’
5 Yehova nendeka ngwendi: “‘Oloni nga kumwononoka awa majwi, njilisinga hali yange babenya ngwange ei njibo ikanyonga.’
6 “Mwafwa ebi bikebyo byanendeka Yehova kutalesa ku njibo ya mwene wa Juda ngwendi,
‘Unapu ngwe Giliyadi kuli yange,
Unapu ngwe mutwe wa munkinda wa Lebanoni.
Oloni njikakupwisa ngwe mambo.
Naimo nganda yobe ibakakalamo banu yahi.
7 Co njikangula baje bakaija na kukunyongesa,
Umo na umo wabo akaija na bitwa byendi.
Bakuteta miti yobe yaibwa ya sida
Na kuiwisila mu tuhya.
8 “‘Co banu ba ku miyati yaingi bakaita kuyehi nei nganda bakalihula umo na mukwabo ngwabo: “Mwafwa bika Yehova nalingi cuma ca kufwa ngacije kuli ei nganda?” 9 Co bakalikumbulula ngwabo: “Mwafwa bapokwele cikumiiyo cibalikumiiye na Yehova Njambi yabo na kutsikamena binjambi beka na kubapangela.”’
10 Keti mulile mutsi,
Keti mulinyengeleye.
Oloni lileni uje ali na kuya,
Mwafwa kakeluka lalo kwa kumona lifuti mwanasemukila.
11 “Mwafwa ebi bikebyo byanendeka Yehova kutalesa kuli Shalamu* muna Josiya, mwene wa Juda, uje nengi ishe Josiya ha litanda, uje lalo natundu muno mu mwela, ngwendi: ‘Kakelukamo lalo. 12 Mwafwa akatsila ku mwela kubanamutwala mu bufunge, co kakamono lalo lino lifuti.’
13 Unabindama yobe utunga njibo yobe kwa kujeneka kusungama
Yobe utunga milili yobe ya helu kwa kujeneka kwakula mwamubwa,
Yobe upangesa mukweni kwa kujeneka kumwanako bimo,
Yobe ubyana kufweta mukweni.
14 Yobe uli na kwendeka ngwobe, ‘Njilitungila njibo ije ili na milili yaingi,
Ije ili na milili yakama ya kwilu.
Njiyaka mawindo
Na kuyaka mabaya a sida na kuikwita bulombo bwa kubenga.’
15 Kuma utwalelelaho kuyula mwafwa unatubakana bakweni mu kupangesa miti ya sida ndi?
Isho nendi walile na kunwa,
Oloni wakele na kwakula mwamubwa na kulinga byuma mu kusungama,
Co byuma byamwendelele mwamubwa.
16 Wakele na kwimanena baje babakele na kuyandesa, na tuhutu mangana babasompe mu kusungama,
Mukemwo byuma byendele mwamubwa.
‘Kuma ebi keti bikebyo bikulumbununa kunjizibuka ndi?’ mukemwo mwanendeka Yehova.
17 ‘Oloni yobe simbu yoshe uli na kusinganyeka na kutonda-tonda bingila bya kuwanenamo byuma mu linyanyamena,
Na kwitila maninga a kujeneka mulonga,
Na kwibila banu na kubalyapula.’
18 “Ngeci, ebi bikebyo byanendeka Yehova kutalesa kuli Jehoyakimu muna Josiya, mwene wa Juda ngwendi,
‘Kubakamulili ngwabo:
“Nani ndolome yange. Nani ndokazi yange.”
Kubakamulili ngwabo:
“Nani, shukulu yange. Nani mwene yange.”
20 Ya ku Lebanoni ukalile,
Tambeka mu Bashani,
Co ya ukalilile ku Abalimu,
Mwafwa mapangala bobe banabatiki.
21 Njakunangwile muwakele na kuliziba ngwobe banakunyungilila.
Oloni yobe wakumbulwile ngwobe, ‘Kunjononoka.’
Obu bukebwo buyoye bwobe kushwa ku bwanike bwobe,
Mwafwa kuwononokele lijwi lyange.
22 Lihunzi likapekumuna tunyungi bobe boshe,
Co mapangala bobe bakaya mu bufunge.
Co ukapaya na kuziba shwamwa mwafwa yobu bukalu bwoshe.
23 Obe wakala mu Lebanoni,
Yobe wakala mwamubwa mu miti ya sida,
Ukakemanga omwo mushongo ukakuwana,
Ukaziba manene kubabala ngwe munakazi ali na kupapa.”
24 Yehova nendeka ngwendi, “‘Njilisinga ha kuyoya kwange ngwange, ‘nameme bene ngwe yobe Koniya,* muna Jehoyakimu, mwene wa Juda, ngwe yobe wapwile riñi ya cizibukiso ku liboko lyange lya cilyo, ngwe njikutundisako. 25 Njikakwana mu maboko a baje bashaka kukutsiya, mu maboko a baje baukazibila lyoba, mu maboko a Nebukadineza* mwene wa Babiloni na mu maboko a baKaudiya. 26 Co yobe na noko uje wakukitile njikamindamwina mu lifuti lije kumwasemukilile, co mukemwo mumukatsila. 27 Kumukeluka lalo ku lifuti limuli na kushungwiya.
28 Kuma Koniya napu lika ngwe ndeho ya kutsa ibali na kwombwanesa,
Ndeho ya buma ije kubatondo banu ndi?
Mwafwa bika ikeye na batekulwila bendi bababandamwina hasi
Na kubombila mu lifuti lije kubazibuka?’
29 Obe lifuti-libu, obe lifuti-libu, obe lifuti-libu, tolilila ku lijwi lya Yehova.
30 Yehova nendeka ngwendi:
‘Sonekeni ou munalume ngweni kesi na mwana,
Ngweni kakalingiho cimo mu kuyoya kwendi,
Mwafwa ku bana bendi naumo wahi akasa
Kutumama ha litanda lya Devidi na kuyula lalo mu Juda.’”