Ezekiele

20 Co mu mwaka wa bu 7, mu ngonde yamucitanu, ha litangwa lya bu 10 omu mu ngonde, bakulunu bamo ba Isalele bezile na kutumama kulutwe lwange mangana bakwihule Yehova. 2 Co Yehova wanjilekele ngwendi: 3 “Muna munu, simutwiya na bakulunu ba Isalele ubaleke ngwobe, ‘Mwata Wahakamwa ya Byoshe Yehova nendeka ngwendi: “Kuma munaija na kunjihula ndi? ‘Njilisinga ha kuyoya kwange ngwange kunjimikumbulula,’ ngwendi Mwata Wahakamwa ya Byoshe Yehova.”’

4 “Muna munu, kuma walibwahesela kubasompa ndi? Kuma walibwahesela kubasompa ndi? Baleke byuma bya bunyengwe bibalingile bakukulwila babo. 5 Baleke ngwobe, ‘Mwata Wahakamwa ya Byoshe Yehova nendeka ngwendi: “Ha litangwa linjangwile Isalele njalisingile lalo na ku bana* ba ku njibo ya Jakobu, co njalizimbwile kuli bakebo mu lifuti lya Ijipiti. Eyo, njalisingile kuli bakebo ngwange, ‘Yange Yehova Njambi yeni.’ 6 Ha litangwa lije, njalisingile ngwange njikabatundisa mu lifuti lya Ijipiti na kubatwala mu lifuti linjabatondelele,* mu lifuti muje mwalisala mabele na buki. Eli lifuti lyapwile lyalibwa manene kutubakana mafuti oshe. 7 Co njabalekele ngwange, ‘Umo na umo weni napande kumbila kuti byuma bya bunyengwe* bije biwali na kushungwiya mesho endi. Keti mulijwalese na tumponya ba bunyengwe ba Ijipiti. Yange Yehova Njambi yeni.’

8 “‘“Oloni banjitengulukilile, co kubashakele kunjitolilila. Kubombilile kuti byuma bya bunyengwe bije biwashungwiiye mesho abo, co lalo kubasezele tumponya ba bunyengwe ba Ijipiti. Ngeci njabalekele ngwange njibetila butenu bwange na kubajukwila kulubala kwange kwoshe mu lifuti lya Ijipiti. 9 Oloni binjalingile, njabilingile mwafwa ya lizina lyange mangana keti balijwalese mukati ka baka-mafuti muje mubakele na kuyoya, mwafwa njalizimbwile kuli bakebo* kulutwe lwa aba baka-mafuti munjabatundisile* mu lifuti lya Ijipiti. 10 Mukemwo njabatundisile mu lifuti lya Ijipiti na kubatwamenena mu mambo.

11 “‘“Ngeci njabanene mashiko ange, co njabalekele kusompa kwange mangana uje abikabangeya ase kuyoya. 12 Co lalo Njabanene bisabata byange mangana bipwe cizibukiso mukati kange nabo mangana base kuzibuka ngwabo yange Yehova, yange njili na kubajelesa.

13 “‘“Oloni bakunjibo ya Isalele banjitengulukile mu mambo. Kubakabangeyeye mashiko ange, co babyanene kusompa kwange kuje kulingisa munu ayoye nga abikabangeya. Bajwalesele bisabata byange, ngeci njabalekele ngwange njibetila butenu bwange mu mambo mangana njibanyongese. 14 Oloni binjalingile, njabilingile mwafwa ya lizina lyange mangana keti balijwalese mukati ka baka-mafuti baje babamwene munjabatundisile* mu Ijipiti. 15 Co lalo njalisingile kuli bakebo mu mambo ngwange kunjibakobelesa mu lifuti linjabanene, mu lifuti muje mwalisala mabele na buki, lifuti lyalibwa manene kutubakana mafuti oshe. 16 Mwafwa babyanene kusompa kwange, co kubakabangeyeye mashiko ange, co lalo bajwalesele bisabata byange mwafwa bimbunge byabo byakele na kukaba tumponya babo ba bunyengwe.

17 “‘“Oloni njabazibilile ngozi, co kunjabanyongesele, kunjabanyongeselele mu mambo. 18 Njalekele bana babo mu mambo ngwange, ‘Keti mukabangeye mashiko a bakukulwila beni nambe kukabangeya kusompa kwabo nambe kulijwalesa na tumponya babo ba bunyengwe. 19 Yange Yehova Njambi yeni. Kabangeyeni mashiko ange na kukabangeya kusompa kwange, co byononokeni. 20 Jeleseni bisabata byange, co bipwa cizibukiso mukati kange neni mangana muzibuke ngweni yange Yehova Njambi yeni.’

21 “‘“Oloni bana babo banjitengulukilile. Kubakabangeyeye mashiko ange, co babyanene kukabangeya kusompa kwange kuje kulingisa munu ayoye nga abikabangeya. Bajwalesele bisabata byange, ngeci njabalekele ngwange njibetila butenu bwange na kubajukwila kulubala kwange kwoshe mu mambo. 22 Oloni kunjalingile ngoco. Njalingile binjalingile kutewa lizina lyange balishaula ku mesho a baka-mafuti baje babamwene munjabatundisilemo. 23 Co lalo njalisingile kuli bakebo mu mambo ngwange njikabashandwela mukati ka baka-mafuti na kubashandanganena mu mafuti, 24 mwafwa kubononokele kusompa kwange, co babyanene mashiko ange. Bajwalesele bisabata byange, co bakabangeyeye tumponya ba bunyengwe ba bakukulwila babo. 25 Co lalo njabecelelele bakabangeye mashiko aje kuwapwile amabwa na kusompa kuje kukwasa kubayoyesa. 26 Njabecelelele mangana balijwalese na milambu yabo babenya omwo benyekele bantwatwa babo boshe mu tuhya mangana banyonge ngeci bazibuke ngwabo yange Yehova.”’

27 “Ngeci obe muna munu, simutwiya na bakunjibo ya Isalele na kubaleka ngwobe: ‘Mwata Wahakamwa ya Byoshe Yehova nendeka ngwendi: “Omu mukemwo lalo mubanjishawile bakukulwila beni omwo bonowele kupwa ba kulongwa kuli yange. 28 Njabatwalele mu lifuti linjalisingile ngwange njibana. Mubamwene malundu oshe amalaha na miti ya maputa amangi bashangumukile kwana milambu na bwana bwabo buje bwanjilubalesele. Banene milambu yabo ya lwengo lwalubwa na kwitila bwana bwabo bwa byakunwa. 29 Ngeci njabehwile ngwange: ‘Ou mwela wa kulunduka kumukai wa bika? (Na lelo lino bacili na kuusana ngwabo Mwela wa Kulunduka.)’”’

30 “Co ya ukaleke bakunjibo ya Isalele ngwobe, ‘Mwata Wahakamwa ya Byoshe Yehova nendeka ngwendi: “Kuma muli na kulijwalesa ngwe mubalijwalesele bakukulwila beni omwo bakele na kukabangeya tumponya babo ba bunyengwe mangana balinge nabo buhule bwa ku sipilitu ndi? 31 Kuma mucili na kulijwalesa lalo kweta na lelo lino ha kwana milambu tumponya beni boshe ba bunyengwe omwo muli na kwenyeka bana beni boshe ba banalume mu tuhya ndi? Eni bakunjibo ya Isalele, kuma njinapande kumikumbulula oku muli na kulinga ebi ndi?”’

“Mwata Wahakamwa ya Byoshe Yehova nendeka ngwendi,‘Njilisinga ha kuyoya kwange ngwange kunjimikumbulula. 32 Co bimukasinganyeka kubikalingiwa mumukendeka ngweni, “Tuyeni tupwe ngwe baka-mafuti, ngwe binaanga bya mafuti eka bije bikalombela* miti na mamanya.”’”

33 “Mwata Wahakamwa ya Byoshe Yehova nendeka ngwendi, ‘Njilisinga ha kuyoya kwange ngwange njimiyula ngwe mwene na liboko lyange lya nzili na kukanyama na kumitila butenu bwange. 34 Njikamitundisa mukati ka miyati ya banu na kumikungulwila hamo kutunda mu mafuti muje mumwashandokelele. Njikalinga ngoco na liboko lya nzili lya kukanyama na butenu. 35 Njikaminena mu mambo ya baka-mafuti, co yange bene njikamisompesa.

36 “‘Ngecilika munjasompesele bakukulwila beni mu mambo ya mu lifuti lya Ijipiti, neni njikamisompesa,’ ngwendi Mwata Wahakamwa ya Byoshe Yehova. 37 ‘Njikamilingisa mwite mwisi ya mulamu wa kanyungi na kumilingisa munyunge cikumiiyo. 38 Oloni njikatundisa baka-kutengulukila hakati keni na baje bali na kulinga bubi kuli yange, mwafwa njikabatundisa mu lifuti lyambala mubakele, oloni kubakakobela mu lifuti lya Isalele, co mukazibuka ngweni yange Yehova.’

39 “Oloni yeni bakunjibo ya Isalele, Mwata Wahakamwa ya Byoshe Yehova nendeka ngwendi, ‘Umo na umo weni aye akapangele tumponya bendi ba bunyengwe. Oloni zibukeni ngweni nga kumushangumuka kunjononoka, simbu ikaija omwo kumukajwalesa lalo lizina lyange lya kujela na milambu yeni na tumponya beni ba bunyengwe.’

40 “Mwata Wahakamwa ya Byoshe Yehova nendeka ngwendi: ‘Bakunjibo ya Isalele boshe, boshe bakanjipangela ku munkinda wange wa kujela, ha munkinda waulaha wa Isalele mu lifuti lya Isalele bakanjizibisa kubwaha, co njikatonda milambu yeni na bushuka bwa kulibanga bwa bwana bweni na byuma byeni byoshe bya kujela. 41 Mukanjizibisa kubwaha mwafwa ya lwengo lwalubwa. Ebi bikalingiwa munjikamitundisa mukati ka baka-mafuti na kumikungulwila hamo kutunda mu mafuti mwoshe mumwashandokelele. Njikamimwesa ngwange njapwa nji wa kujela, co baka-mafuti nabo bakamona ngwabo njapwa nji wa kujela.’

42 “‘Co mukazibuka ngweni yange Yehova munjikaminena mu lifuti lya Isalele, mu lifuti lije linjalisingile kuli bakukulwila beni ngwange njibanalyo. 43 Co mumuketa kuje mukanuka futisi yeni na bilinga byeni byoshe bimwalijwalesele nabyo, co mukalizinda yeni babenya mwafwa ya byuma byabibi byoshe bimwalingile. 44 Co mukazibuka ngweni yange Yehova munjikalinga ebi byuma mwafwa ya lizina lyange, keti kwesekesa na futisi yeni yaibi nambe kwesekesa na bilinga byeni byabibi, eni bakunjibo ya Isalele,’ ngwendi Mwata Wahakamwa ya Byoshe Yehova.”

45 Co Yehova wanjilekele lalo ngwendi: 46 “Muna munu, talesa ku mbwela,* co endeka ku mbwela na kupolofwetela shwata ya ku mbwela. 47 Leka shwata ya ku mbwela ngwobe, ‘Tolilila lijwi lya Yehova. Mwata Wahakamwa ya Byoshe Yehova nendeka ngwendi: “Njikushwamekela tuhya. Otu tuhya tukenyeka miti yobe yoshe ya kutonola na miti yobe yoshe ya kuma. Milangi yatwo kubakasa kuizima, co tukababula bihanga byoshe kutunda ku mbwela* kuya ku kunto.* 48 Co banu boshe bakamona ngwabo yange Yehova, yange njatushwameka, co wahi akasa kutuzima.”’”

49 Co njendekele ngwange: “Kekange, Mwata Wahakamwa ya Byoshe Yehova! Bali na kunjendeka ngwabo, ‘Ali na kwendeka mu binguli.’”