Samu
135 Shangazaleni Jah*
Shangazaleni lizina lya Yehova.
Mushangazaleni yeni bangamba ba Yehova,
2 Yeni munemana mu njibo ya Yehova
Mu malapa a njibo ya Njambi yetu.
3 Shangazaleni Jah mwafwa Yehova wapwa wamubwa.
Imbeni myaso ya kushangazala lizina lyendi mwafwa lyapwa lyalibwa.
4 Mwafwa Jah nalyangwila Jakobu,
Nalyangwila baIsalele kupwa banu bendi ba kulitila.*
5 Mwafwa njizibuka bwino ngwange Yehova wapwa wakama,
Mwata wetu wapwa wakama kutubakana binjambi boshe.
6 Yehova akalingi byuma byoshe byashaka kulinga
Mwilu na ha lifuti-libu, mu tulunga-ndonga na ku masima oshe a tulunga-ndonga.
7 Akakatula mashelwa* aye mwilu kutunda ku mamaneselelo a lifuti-libu.
Akatumu mihyato hamo na nyonzi.*
Akanene lihunzi kutunda mu bishete byendi.
8 Watsiile bantwatwa mu Ijipiti,
Banu na tusitu.
9 Obe Ijipiti, wakutuminine bizibukiso na bikomokeso,
Wabituminine Falo na bangamba bendi boshe.
10 Watsiile baka-mafuti babangi
Na kutsiya bimyene ba nzili.
11 Wanyongesele Sihoni mwene wa baAmoli,
Ogi mwene wa Bashani
Na bumwene bwoshe bwa mu Kanana.
12 Wanene lifuti lyabo kupwa buswana
Walyanene banu bendi baIsalele kupwa buswana bwabo.
13 Obe Yehova, lizina lyobe lyakalako myaka yoshe.
Obe Yehova, lutsimo* lwobe lwakalako ku bisemwa byoshe.
15 Tumponya ba baka-mafuti bapwa ba siuva na goldi,
Bapwa bipangi bya maboko a banu.
16 Bali na tunwa, oloni kubasa kwendeka.
Bali na mesho, oloni kubasa kumona.
17 Bali na matwi, oloni kubasa kuziba.
Mu tunwa twabo kumwasa kutunda muku.
18 Baje bakabapanga bapwa ngwe bakebo,
Na baje boshe banakulahela aba tumponya.
19 Eni bakunjibo ya Isalele, shangazaleni Yehova.
Eni bakunjibo ya Aloni, shangazaleni Yehova.
20 Eni bakunjibo ya Levi, shangazaleni Yehova.
Yeni mukazibila Yehova lyoba, shangazaleni Yehova.
21 Yehova bamushangazale mu Siyone
Uje wakala mu Jelusalema,
Shangazaleni Jah!