Samu
146 Shangazaleni Jah!*
Mubila* wange woshe ushangazale Yehova.
2 Njishangazala Yehova mu kuyoya kwange kwoshe.
Njimbila Njambi yange myaso ya kumushangazala simbu njiciyoya.
3 Keti mukulahele bamyata*
Nambe kukulahela muna munu uje kasa kunena kwoboka.
4 Sipilitu yendi* ituhuka, eluka ku likungu,
Ha litangwa lije bene bisinganyeka byendi binyonga.
5 Nabwahelela munu uje Njambi ya Jakobu napu mukwasi wendi,
Uje nalabelela kuli Yehova Njambi yendi,
6 Uje watangele lilu na lifuti-libu,
Kalunga-ndonga na byoshe bilimo,
Uje wapwa wa kulongwa simbu yoshe,
7 Uje akakula mwamubwa baje babanapukula,
Uje akana byakulya baje banatsi njala.
Yehova apatula mapanditi.*
8 Yehova atonesa mesho a tupuputwa.
Yehova andula baje banakulama.
Yehova wazema banu ba kusungama.
9 Yehova ali na kunyungilila banu ba kutunda ku mafuti eka.
Akwasa mwana uje kesi na ishe na fwile,
Oloni atanganesa matumbe a banu bababi.*
10 Yehova apwa Mwene myaka yoshe,
Njambi yobe, obe Siyone, apwa Mwene ku bisemwa byoshe.
Shangazaleni Jah!*