Ezekiele

36 “Oloni yobe muna munu, polofweta kutalesa ku minkinda ya Isalele, co endeka ngwobe, ‘Eni minkinda ya Isalele tolilileni lijwi lya Yehova. 2 Mwata Wahakamwa ya Byoshe Yehova nendeka ngwendi: “Citozi namyendeka ngwendi, ‘Ewa! Na myela ya kulunduka ya kusañulu inapu buswana bwetu.’”’

3 “Ngeci, polofweta ngwobe, ‘Mwata Wahakamwa ya Byoshe Yehova nendeka ngwendi: “Omwo banamipwisa ngundu, bamilwisa kutundilila ku mitambela yoshe mangana mupwe buswana bwa baje banoboka* mukati ka baka-mafuti, co lalo banu bali na kumyendeka na kumibiisa lizina. 4 Ngeci, tolilileni lijwi lya Mwata Wahakamwa ya Byoshe Yehova, eni minkinda ya Isalele. Mwata Wahakamwa ya Byoshe Yehova nendeka ku minkinda na ku malundu na ku bana ba bindonga na ku bingulunga na ku myela ije inapu bingundu na ku binganda bibasezele bije bibapukwile, bije lalo bibashendumwine baka-mafuti aje anabizengeleka baje bobokele, 5 kuli boshe aba, Mwata Wahakamwa ya Byoshe Yehova nendeka ngwendi: ‘Njikasompa mu butenu bwange baka-mafuti baje bakoboka, na baka-Edomu boshe baje babwahelelele manene na kumishendumuna, co banendeka ngwabo lifuti lyange linapu buswana bwabo mangana bambate bulilo bwalyo na kulipukula.’”’

6 “Ngeci, polofweta kutalesa ku lifuti lya Isalele, co leka minkinda na malundu na bana ba bindonga na bingulunga ngwobe, ‘Mwata Wahakamwa ya Byoshe Yehova nendeka ngwendi: “Taleni! Njikendeka mu butenu na mu kulubala mwafwa banamizibisa shwamwa baka-mafuti.”’

7 “Ngeci Mwata Wahakamwa ya Byoshe Yehova nendeka ngwendi: ‘Njimika liboko lyange na kulisinga ngwange mafuti anamizengeleka akaziba shwamwa. 8 Oloni yeni, eni minkinda ya Isalele mukamenesa miti ije ikakala na minango yaingi na kwima bushuka bwa banu bange baIsalele, mwafwa ololo beluka. 9 Mwafwa njili hamo neni, co njikamyaka mbunge, co lalo njikamilima na kumikuna bimbuto. 10 Njikatumisa banu beni, bakunjibo ya Isalele boshe, co mu binganda mukakala banu, co mitungo ije inabihya bakaitungulula. 11 Eyo njikatumisa banu beni na bimuna beni. Bakatuma na kupwa babangi, co njikamilingisa bamitunge ngwe mubamitungile kunima. Njikamilingisa muyoye mwamubwa kutubakana mumwakele na kuyoyela kunima, co mukazibuka ngweni yange Yehova. 12 Njikalingisa lalo banu bange baIsalele bende hali yeni, co bakamiswana. Mukapwa buswana bwabo, co kumukabanyeke lalo bana babo.’”

13 “Mwata Wahakamwa ya Byoshe Yehova nendeka ngwendi: ‘Omwo bali na kumileka ngwabo, “Yeni munapu lifuti lije lili na kubwonda banu na kutsiya bana ba miyati yeni,”’ 14 ‘ngeci kumukabwondo lalo banu nambe kunyeka miyati bana,’ ngwendi Mwata Wahakamwa ya Byoshe Yehova. 15 ‘Kunjikamyecelela lalo ngwange baka-mafuti bamituka-tuke nambe kutabesa banu bamishendumune, co kumukatanwisa lalo miyati yeni,’ ngwendi Mwata Wahakamwa ya Byoshe Yehova.”

16 Co Yehova wanjilekele lalo ngwendi: 17 “Muna munu, bakunjibo ya Isalele mubakele mu lifuti lyabo balijwalesele na bingila byabo na bilinga byabo. Bingila byabo byapwile ngwe mazilo a munakazi uje ali ku ngonde. 18 Mukemwo njabetilile butenu bwange mwafwa ya maninga abetilile mu lifuti, co lalo mwafwa bajwalesele lifuti na tumponya babo ba bunyengwe.* 19 Ngeci, njabashandwelele mukati ka baka-mafuti na kubashandanganena mukati ka mafuti. Njabasompele kwesekesa na bingila byabo na bilinga byabo. 20 Oloni mubaile oku ku mafuti, banu bajwalesele lizina lyange lya kujela ha kubendeka ngwabo, ‘Aba banapu banu ba Yehova, oloni banaseze lifuti lyendi.’ 21 Ngeci, njikaka mbunge ku lizina lyange lya kujela lije libanajwalesa bakunjibo ya Isalele mukati ka baka-mafuti mubanai.”

22 “Ngeci, leka bakunjibo ya Isalele ngwobe, ‘Mwata Wahakamwa ya Byoshe Yehova nendeka ngwendi: “Kunjesi na kulinga ebi mwafwa yeni, eni bakunjibo ya Isalele, oloni njili na kubilinga mwafwa ya lizina lyange lya kujela limunajwalesa mukati ka baka-mafuti mumunai.”’ 23 ‘Cili bene njikajelesa lizina lyange lyakama lije lyajwalele hakati ka baka-mafuti, lije limwajwalesele mukati kabo. Co baka-mafuti bakazibuka ngwabo yange Yehova, munjikalijelesa mukati kabo oku banamitala,’ ngwendi Mwata Wahakamwa ya Byoshe Yehova. 24 Njikamitundisa mukati ka baka-mafuti na kumikungulwila hamo kutunda mu mafuti oshe na kuminena mu lifuti lyeni. 25 Njikamishamwina mema a kujela mangana mujele. Njikamijelesa ku mazilo eni oshe na ku tumponya beni boshe ba bunyengwe. 26 Njikamyana mbunge yaiha na kumyaka sipilitu yaiha mu mibila yeni. Njikatundisa bimbunge bya mamanya mu mibila yeni na kumyana bimbunge bya situ.* 27 Njikaka sipilitu yange mu mibila yeni, co njikamilingisa mukabangeye mashiko ange, co mukononoka na kukabangeya kusompa kwange. 28 Co mukakala mu lifuti linjanene bakukulwila beni. Mukapwa banu bange, co yange njikapwa Njambi yeni.’

29 “‘Njikamitundisa ku kujwala kweni kwoshe na kuleka bimbuto ngwange bime manene, co kunjikaminenela njala. 30 Njikatumisa bushuka bwa miti na byakulya bya mu shwata mangana keti mukazibe lalo shwamwa ya kutsa njala mukati ka baka-mafuti. 31 Co mukanuka bingila byeni byabibi na bilinga byeni bije kubyapwile byabibwa, co umo na umo weni akalizinda ikeye babenya mwafwa ya milonga yendi na bilinga byendi bya bunyengwe. 32 Oloni zibukeni eci: Kunjesi na kulinga ebi mwafwa yeni,’ ngwendi Mwata Wahakamwa ya Byoshe Yehova. ‘Oloni zibeni shwamwa na kushauka mwafwa ya bingila byeni, eni bakunjibo ya Isalele.’

33 “Mwata Wahakamwa ya Byoshe Yehova nendeka ngwendi: ‘Ha litangwa linjikamijelesa ku milonga yeni yoshe, njikalingisa mu binganda mukale banu, co mitungo ije inabihya bakaitungulula. 34 Lifuti lije lyapwile ngundu, lije libakele na kumona boshe bakele na kwita, bakalilima. 35 Co banu bakendeka ngwabo: “Lije lifuti lyapwile ngundu linapu ngwe lihya lya Edeni, co binganda bije byabihile na kupwa bingundu na kusiuka binakanyama, co muli banu.” 36 Co mafuti aje anamizengeleka aje akasalaho akazibuka ngwawo yange Yehova, yange njinatungu bije bibasiwile, co njinakunu miti mu lifuti lije libabiisile. Yange Yehova njinendekamo, co njinalingimo.’

37 “Mwata Wahakamwa ya Byoshe Yehova nendeka ngwendi: ‘Njikatabesa lalo bakunjibo ya Isalele banjilombe eci: Ngwabo njitumise mbunga yabo ngwe butanga, co njikalinga ngoco. 38 Binganda bije byabihile bikashula na mbunga ya banu ngwe mbunga ya bakujela, ngwe butanga bwa Jelusalema* ha simbu ya bilika byendi. Co bakazibuka ngwabo yange Yehova.’”