Samu
Mwaso wa Devidi.
141 Obe Yehova, njitambeka kuli yobe.
Ija bwasi mangana wakunjikwase.
Tolilila mwamubwa munjitambeka kuli yobe.
2 Lilombelo lyange lipwe ngwe isense ibanabwahesela ku mesho obe.
Maboko ange anjinajundwila mwilu apwe ngwe bwana bwa binona bwa mangwezi.
3 Obe Yehova, njikwase njinyunge kanwa kange.
Njikwase njilibandeke ha byuma binjendeka.
4 Keti wecelele mbunge yange ijendamene ku cuma coshe-coshe cacibi,
Mangana keti njilinge byuma byabibi na banu bababi.
Keti njilye ku byakulya byabo byabibwa.
5 Nga muka-kusungama anjipupa, cipwa kunjimwesa cizemo cije kucesi kutenguluka.
Nga anjendekela cipwa ngwe kunjitila mazi ku mutwe
Aje mutwe wange kuubyana.
Lilombelo lyange litwalelelaho na mu simbu yabo ya bukalu.
6 Nameme maako babo babombila hasi kutunda ha mungenyangenya,*
Banu batolilila ku majwi ange mwafwa amabwa.
7 Ngwe munu mwakakekela na kutabozola libu,
Mukemwo mubanashandanganena bitsiya byetu ku kanwa ka Cihilo.*
8 Oloni mesho ange anatala kuli yobe, obe Yehova Mwata Wahakamwa ya Byoshe.
Njinatewela kuli yobe.
Keti wecelele mwonyo wange unyonge.*
9 Njinyungilile ku nzili ya miheto ibananjitela.
Njinyungilile ku miheto ya baka-kulinga byuma byabibi.
10 Baka-bubi boshe bakawila mu manda abo babenya
Oloni yange njikaita mwamubwa.