Jelemiya
30 Yehova walekele Jelemiya ngwendi: 2 “Yange Yehova Njambi ya Isalele ngwange, ‘Soneka mu libulu awa majwi oshe anjikuleka, 3 mwafwa yange Yehova njinendeka ngwange, “taleni, matangwa ali na kwija omwo njikakungulula banu bange ba mu Isalele naba mu Juda baje banai mu bufunge, co njikabelwisa ku lifuti lije linjanene bakukulwila babo, co likapwa lalo lyabo.” Omu mukemwo munjinendeka yange Yehova.’”
4 Yehova wendekele awa majwi kuli Isalele na Juda.
5 Yehova nendeka ngwendi:
“Tunazibi miyoyo ya banu bali na kujaja.
Bali na kuziba lyoba, co kubesi mu kwoloka.
6 Njimilomba mwihule indi munalume asa kupapa.
Co bikoni bibanalikwatela ha mafu banalume ba nzili
Ngwe munakazi uje ashaka kupapa?
Mwafwa bika bihanga byabo binazeye?
7 Kekange! Eli litangwa likapwa lya kutewesa,
Kukwesi litangwa lyakulifwa nalyo,
Ikapwa simbu yaikalu kuli Jakobu.
Oloni njikamwobola.”
8 Yehova wa maswalale nendeka ngwendi: “Co ha litangwa olyo njikapokola joko na kuitundisa ha singo ya banu bange na kubatula mikole yabo hakati, co banu beka kubakabapwisa lalo bindungo. 9 Bakapangela Yehova Njambi yabo na mwene yabo Devidi uje injikabangwila.”
10 Yehova nendeka ngwendi: “Co yobe ngamba yange Jakobu keti uzibe lyoba,
Co keti utewe, obe Isalele.
Mwafwa njikakwobola ku lifuti lya kulako
Co bana bobe njikabobola mu lifuti mubanai mu bufunge.
Jakobu akeluka, akakala mu kwoloka, co wahi akamupindisa,
Naumo wahi akamuzibisa lyoba.”
11 Yehova nendeka ngwendi: “Njili hamo nobe mangana njikwobole.
Oloni njikanyongesa miyati yoshe kuje kunjinashandwela banu bobe,
Oloni yobe kunjikakunyongesa.
Njikakwolola mu ngila inakupande,
Co kunjikakuseze ngoco kwa kujeneka kukwana kashitiko.”
12 Mwafwa Yehova nendeka ngwendi:
“Kubetwa ciunabetwa kubasa kucisaka,
Mbandu yobe kuyasa kwola.
13 Naumo wahi ali na kwimanena ñanda yobe,
Mangana mbandu yobe yole.
Kuyesi na bumbanda.
14 Mapangala bobe boshe banakwibala,
Banecela kukushakezeka.
Mwafwa njinakupupu ngwe citozi ali na kukupupa,
Njinakwana kashitiko ngwe cikenya ali na kukwana kashitiko,
Mwafwa ya milonga yobe yakama na bubi bwobe bwabwingi.
15 Kuma unapande kulila mwafwa ya kubetwa kwobe ndi?
Kubabala kwobe kukwasa kuhwa.
Njinakulingi ngacije
Mwafwa ya milonga yobe yakama na bubi bwobe bwabwingi.
16 Ngeci, boshe bali na kukubwonda, nabo bakababwonda,
Co bitozi bobe boshe nabo bakaya mu bufunge.
Baje bali na kukwibila nabo bakabebila,
Co baje bali na kukupukula nabo bakabapukula.”
17 Yehova nendeka ngwendi: “Oloni njikakukangwisa na kwolesa bimbandu byobe,
Nameme bakubyanene na kukusana ngwabo,
‘Siyone, mwela uje kubatondo banu.’”
18 Yehova nendeka ngwendi:
“Hano njikungulula bafunge ba mu bitenti bya Jakobu,
Co njizibila ngozi bitabanakele byendi.
Nganda bakaitungulula ha lilundu,
Co kaposhi ka kukola kakemana mu mwela wako unapande.
19 Co bakakandelela na kujolelela.
20 Bana bendi bakapwa babangi ngwe mubapwile kunima,
Co mbunga yendi ikazameka kulutwe lwange.
Co baka-kumulwisa boshe njikalimona nabo.
21 Wabulemu wendi akatunda kuli ikeye,
Co muka-kuyula akatunda kuli ikeye.
Njikamulingisa aije kuyehi nange, co akanjishwena.”
“Mwafwa iya asa kukaluka kunjishwena?” mukemwo mwanendeka Yehova.
22 “Mukapwa banu bange, co yange njikapwa Njambi yeni.”
23 Taleni! Lihunzi lyakama lya Yehova likahuwa mu kutenuka,
Likahuwila ha mitwe ya baka-bubi ngwe kankumba kakama.
24 Butenu bwa Yehova buje buli na kushukuma kubukahu
Kubanga noho nalingi na kushulisilila byuma byanayongola mu mbunge yendi.
Mukazibisisa eci cuma mu matangwa a mamaneselelo.