Samu
Samu. Mwaso wa litangwa lya Sabata.
92 Kwakubwa kukandelela kuli Yehova
Na kwimba myaso ya kushangazala lizina lyobe, obe Wahakamwa Manene,
2 Kwambulula cizemo cobe cije kucesi kutenguluka, ku mutondo
Na kulongwa kwobe ku butsiki,
3 Oku njikwimbila na cisanzi ca mikole 10 na cisanzi cikwabo ca mikole
Na cilumo cacibwa ca kalyalya.
4 Unanjilingisa njibwahelele, obe Yehova, mwafwa ya bilinga byobe,
Njitambeka mu kubwahelela mwafwa ya bipangi bya maboko obe.
5 Bipangi byobe byapwa byakama manene, obe Yehova!
Bisinganyeka byobe byapwa bya kuloba manene!
6 Munu wa kujeneka kuzibisisa kasa kubizibuka,
Co cilema kasa kuzibisisa ebi:
7 Banu bababi bamena ngwe shaku.
Baka-kulinga byuma byabibi, byuma bibendela bwino
Mangana babanyongese, co kubakakalako lalo.
8 Oloni yobe bakuzumbangeya myaka yoshe, obe Yehova.
9 Cili bene, tala bitozi bobe mubabafungulula, obe Yehova,
Tala bitozi bobe mubanyonga.
Baka-kulinga byuma byabibi boshe bakalishandangana.
10 Oloni wamesa nzili* yange ngwe nzili ya ngombe wa nkomba wa mu shwata.
Njononwesa cikanda cange na mazi amabwa.
11 Mesho ange akatala bitozi bange mubabafungulula.
Matwi ange akaziba kulindumuka kwa banu bababi baje bali na kunjilwisa.
12 Oloni banu ba kusungama bakasikima ngwe muti wa mashakabale.
Bakakola na kupwa bakama ngwe muti wa sida wa mu Lebanoni.
13 Banabakunu mu njibo ya Yehova.
Bali na kusikima mu malapa a Njambi yetu.
14 Nameme mu bukulukazi* bwabo anga batwalelelaho kusikima.
Batwalelelaho kukala na nzili na bukangule.
15 Co bambulula ngwabo Yehova wapwa wa kusungama.
Ikeye Limanya lyange, kesi kulinga byuma bya kujeneka kusungama.