Samu
104 Njishangazala* Yehova.
Obe Yehova Njambi yange, uwakama manene.
Unazala bukama* na bulemu.
2 Walifwiki ceke ngwe nanga.
Ujangumuna lilu ngwe tenti.
3 Aka mikambo ya milili yendi ya helu mu mema a mwilu,
Apwisa mashelwa litemba lyendi.
Enda ha mambaba a lihunzi.
4 Akalingisa tungelo bendi bapwe ba nzili,*
Baka-kumupangela bapwe tuhya tuje tunyongesa.
5 Nazameka lifuti-libu ha lubula lwalyo.
Kulikatundu mu mwela walyo myaka yoshe.
6 Walifwikile na mema amangi ngwe uje alifwika na nanga.
Mema afwikile minkinda.
7 Muwatenukile, atewele.
Alijujukilile na kutewa muwazibile cilumo ca cililimo cobe.
8 Aile ku mwela kuje kuwawabwaheselele,
Co minkinda yakandukile, binema byanyekamene.
9 Wawakelele nginga ije kuwapandele kujomboka
Mangana keti afwike lalo lifuti-libu.
10 Njambi atuma tubwelubwelu mu binema.
Twita mu minkinda.
11 Twana mema ku tusitu ba mu shwata.
Bimulu ba mu shwata bamaneselamo lihwila lyabo.
12 Tuzila batungila mashwa ku miti ili ku ngenge yotu tubwelubwelu.
Baimba oku bali ku miti ya kuzika.
13 Ali na kutukumwina minkinda oku ali mu milili yendi ya helu.
Lifuti-libu likuta bushuka bwa bipangi byobe.
14 Ali na kumenesa mwila wa bingombe
Na bimena bibapangesa banu
Mangana hasi hakale byakulya
15 Na binyu bije bilingisa mbunge ya munu ibwahelele
Na mazi aje alingisa cihanga ca munu cileleme
Na byakulya bije bikanyamesa mbunge ya munu.
16 Miti ya Yehova inakuta mema,
Miti ya sida yakunine mu Lebanoni,
17 Kuje kubakatungila tuzila mashwa.
Njibo ya kanyangenyange yakala mu miti ya junipa.
18 Minkinda yailaha yapwa minkinda ya bimembe ba ha minkinda.
Mamanya apwa butewelo bwa mashea.
19 Natanga ngonde mangana imwese bisimbu.
Litangwa lizibuka mwamubwa simbu ya kulahuka.
20 Unena lisusulungu, co butsiki bwija.
Ikeyo simbu ibakendangana tusitu ba mu shwata boshe.
21 Bana ba bindumba* babuluma oku bayomba
Batonda byakulya byabo kuli Njambi.
22 Oloni litangwa mulikya,
Beluka ku mena abo na kulala.
23 Munu aya ku bipangi byendi,
Co afwitangana kweta ku mangwezi.
24 Bipangi byobe byapwa byabingi manene, obe Yehova!
Byoshe unabitanga mu ngila ya mana.
Lifuti-libu linashulu byuma biunatanga.
25 Kuli kalunga-ndonga wakama wa kujanjabala
Muje munashulu byuma bya kuyoya byabingi, byakama nebi byabindondo.
26 Mato aketimo,
Co lalo mwakala Leviatani* uje iwatangele ngwobe ehelemo.
27 Byuma byoshe bya kuyoya binabandamena kuli yobe
Mangana ubyane byakulya ha simbu inapande.
28 Bikakungulula byuma byoshe biukana.
Muujangumuna liboko lyobe, bikuta na byuma byabibwa bitundamo.
29 Nga ushweka cihanga cobe bilijujukila.
Nga ubinyeka sipilitu yabyo, bitsa na kwiluka ku likungu.
30 Muutuma sipilitu yobe, byuma bya kuyoya bisholoka,
Co ulingisa byuma byoshe bya ha lifuti-libu bipwe byabiha.
31 Bumpau bwa Yehova bukalako myaka yoshe.
Yehova abwahelela mwafwa ya bipangi byendi.
32 Atala lifuti-libu, co lijaja.
Akwata minkinda, co ikakumuka bwisi.
33 Njimbila Yehova mu kuyoya kwange kwoshe.
Njimbila Njambi yange myaso ya kumushangazala simbu njiciyoya.
34 Bisinganyeka byange bimuzibise kubwaha.*
Njibwahelela mwafwa ya Yehova.
35 Baka-bubi bakazimangana ha lifuti-libu,
Co banu bababi kubakakalako lalo.