Samu
MUKANDA WAMUCITANU
(Bisamu 107-150)
107 Kandeleleni Yehova mwafwa wapwa wamubwa.
Cizemo cendi cije kucesi kutenguluka cakalako myaka yoshe.
3 Baje bakungulwile kutunda mu mafuti eka,
Kutunda ku butuhukilo bwa litangwa na ku bulahukilo bwa litangwa,
4 Bayebangelele mu mambo, mu lifuti lya kujeneka banu.
Kubawanene ngila iya ku nganda kubapandele kukakala.
5 Bazibile njala na lihwila.
Balezumukile mwafwa ya kujuka.
6 Batwaleleleleho kutambeka kuli Yehova mubakele mu bukalu.
Wabamenene mu bukalu bwabo.
7 Wabatwamenenene mu ngila ya kusungama
Mangana baye mu nganda mubapandele kukakala.
8 Banu bakandelele kuli Yehova mwafwa ya cizemo cendi cije kucesi kutenguluka,
Mwafwa ya bipangi byendi bya kukomokesa byanalingila bana ba banu.
9 Mwafwa nana mema uje natsi lihwila
Na kwana uje natsi njala byakulya byabibwa.
10 Bamo bakele na kuyoya mu lisusulungu lyakama manene,
Mapanditi baje bakele na kuyanda, co lalo babakutile mu bikubo.
11 Mwafwa balwisile lijwi lya Njambi,
Kubasingimikile kunangula kwa Wahakamwa Manene.
12 Wabecelelele bayande mangana bimbunge byabo bilikehese.
Batanukile, co kukwakele munu wa kubakwasa.
13 Batambekele kuli Yehova mubakele mu bukalu.
Wabobwele mu bukalu bwabo.
14 Wabatundisile mu lisusulungu lyakama manene
Na kubatozola malyenge abo.
15 Banu bakandelele kuli Yehova mwafwa ya cizemo cendi cije kucesi kutenguluka,
Mwafwa ya bipangi byendi bya kukomokesa byanalingila bana ba banu.
16 Mwafwa napokola bikolo bya kopa
Na kubatula tupateso twa bikubo.
17 Bapwile bilema, co bayandele
Mwafwa ya milonga yabo na kusebuka kwabo.
18 Bakele na lifutu lya kulya* byakulya byoshe-byoshe.
Bashwenene ku bikolo bya kutsa.
19 Bakele na kutambeka kuli Yehova mubakele mu bukalu.
Wakele na kubobola mu bukalu bwabo.
20 Wakele na kutuma lijwi lyendi na kubakangwisa
Na kubamena mu mena mubawililile.
21 Banu bakandelele kuli Yehova mwafwa ya cizemo cendi cije kucesi kutenguluka,
Mwafwa ya bipangi byendi bya kukomokesa byanalingila bana ba banu.
22 Bane milambu ya kukandelela
Na kwambulula bipangi byendi mu kubwahelela.
23 Baje bakende mu mato ha kalunga-ndonga,
Baje bakalingi mingoso yabo ha mema amangi,
24 Banalimwena bipangi bya Yehova
Na bipangi byendi bya kukomokesa bya mu kalunga-ndonga.
25 Banalimwena lijwi lyendi mulikakatwila lihunzi lyakama,
Kukatula mankimba mu kalunga-ndonga.
26 Mankimba abashela mwilu
Na kubatwala ku masima.
Kusimpa kwabo kuhwa mwafwa ya bukalu buje bubezila.
27 Bali na kupelyangela na kutalyangela ngwe uje napende,
Co butongwe bwabo bwoshe bupwa bwangoco.
28 Ngeci, batambeka kuli Yehova mu bukalu bwabo,
Co abamena mu bukalu bwabo.
29 Olwesa lihunzi lyakama.
Mankimba a mu kalunga-ndonga oloka kulu.
30 Babwahelela mubyoloka kulu,
Co abatwamenena ku cikuma cibashaka.
31 Banu bakandelele kuli Yehova mwafwa ya cizemo cendi cije kucesi kutenguluka,
Mwafwa ya bipangi byendi bya kukomokesa byanalingila bana ba banu.
32 Bamuzumbangeye mu cikungulukilo ca banu,
Na kumushangazala mu munga ya* bakulunu.
33 Atengulula bindonga kupwa mambo
Na tubwelubwelu twa mema kupwa libu lya kuma.
34 Atengulula libu lya bwilo kupwa libu lya kushamuka
Mwafwa ya bilinga byabibi bya baje bakalaho.
35 Atengulula mambo kupwa bihongo bya mema.
Na libu lya kuma kupwa tubwelubwelu twa mema.
36 Alingisa baje bali na njala bakalemo
Mangana batunge nganda mubasa kukala.
37 Bakuna miti ya bushuka bwa binyu
Na bimbuto bikwabo bije bima manene.
38 Ababezikisa, co batuma manene
Kecelela bingombe babo batepuluke.
39 Oloni batepuluka lalo na kubazibisa shwamwa
Mwafwa ya kubalyatelelela, na bukalu na busiwa.
40 Alingisa banu ba bulemu bashauke
Na kubalingisa bayebangele mu mambo mwa kujeneka ngila.
41 Oloni anyungilila tuhutu ku kubalyatelela
Na kulingisa binaanga byabo bitume ngwe butanga.
42 Baka-kusungama bamona ebi byuma, co babwahelela.
Oloni baka-kujeneka kusungama boshe bashoka tunwa twabo babenya.
43 Woshe ali na mana anyunga ebi byuma
Na kusinganyekesesa mwamubwa bilinga bya Yehova bya cizemo cije kucesi kutenguluka.