Samu
Mwaso wa Devidi. Masikiu.*
32 Nabwahelela munu uje ibanakonekela mulonga wendi, uje ibanafwikila* bubi bwendi.
2 Nabwahelela munu uje Yehova kawanene na mulonga,
Uje mbunge yendi kuyesi kukwisa.
3 Munjolokele kulu kwa kujeneka kwendeka bubi bwange, bitsiya byange byazeyele mwafwa ya kuteta litangwa lyoshe lya mutunu.
4 Mwafwa mutanya na butsiki liboko lyobe* lyanjilemenene.
Nzili yange yahwile ngwe mema akakumuka na litanya lya ntondwe. (Sela)
5 Kumamaneselelwoni, njendekele bubi bwange kuli yobe.
Kunjashwekele bubi bwange.
Njendekele ngwange: “Njendeka milonga yange kuli Yehova.”
Co wanjikonekelele kusebuka kwange na bubi bwange. (Sela)
6 Mukemwo munu woshe wa kulongwa alombela kuli yobe
Simbu banu bacasa kukuwana.
Nameme mema a libazi kuwamuwana.
7 Yobe mwela wange wa kubanda.
Unjinyungilila ku bukalu.
Unjilingisa njikale mukati ka banu baje bali na kutwa bingunda bya kubwahelela mwafwa ya kwoboka. (Sela)
8 Wendekele ngwobe: “Njikwana kuzibisisa na kukulongesa ngila iunapande kwenda.
Njikunangula oku mesho ange anakutala.
9 Keti ufwe ngwe kabalu nambe donki* uje kesi kuzibisisa.
Uje alinga kubanga kumukoka na mukole
Asina ashwene kuyehi nobe.”
10 Kuli byuma byabingi bizibisa munu wamubi kubabala.
Oloni cizemo ca Njambi cije kucesi kutenguluka cizengeleka uje nakulahela Yehova.
11 Bwaheleleni muli Yehova na kujolela, yeni bakusungama.
Tambekeni mu kubwahelela yeni boshe bakusungama mu bimbunge.