Jelemiya
31 Yehova nendeka ngwendi: “Ha simbu oyo, njikapwa Njambi ya binaanga byoshe bya Isalele, co bakebo bakapwa banu bange.”
2 Yehova nendeka ngwendi:
“Banu baje bobokele ku mukwale bawanene kutetela mu mambo
Omwo Isalele wakele na kuya ku mwela wendi wa kuhwimina.”
3 Munjakele ku lifuti lya kulako, Yehova washolokele kuli yange na kwendeka ngwendi:
“Njinakuzeme na cizemo ca myaka yoshe.
Mukemwo njinakukokela kuli yange na cizemo cije kucesi kutenguluka.*
4 Oloni njikakutungulula lalo, co ukapwa muyati lalo.
Obe mumbanda wa Isalele uje kanda alilaleho laja na munalume, ukambata lalo tungoma twobe
Na kuya na kukina mu kubwahelela.*
5 Ukakuna lalo mahya a binyu ku minkinda ya ku Samaliya.
Baka-kukuna bakakuna na kulikuwa bushuka.
6 Mwafwa litangwa lili na kwija omwo baka-kunyunga ku minkinda ya Efremu bakatambeka ngwabo:
‘Katukeni, tuyeni ku Siyone kuli Yehova Njambi yetu.’”
7 Mwafwa Yehova nendeka ngwendi:
“Tambekeni mu kubwahelela kuli Jakobu.
Tambekeni mu kubwahelela mwafwa muli helu lya mafuti.
Ambululeni ou muzimbu, shangazaleni Njambi na kwendeka ngweni,
‘Obe Yehova obola banu bobe baje banasalako ku banu ba Isalele.’
8 Njikabelwisa kutunda ku lifuti lya ku kunto.
Njikabakungulwila hamo kutunda ku mitambela ya kulako ya ha lifuti-libu.
Hakati kabo hakakala tupuputwa na biyanga
Banakazi bali na memo na baje bashaka kupapa, boshe bakakala hamolika.
Bakeluka kuno oku banapu mbunga yakama.
9 Bakaija oku balila.
Njikabatwamenena oku bali na kulomba ngwabo njibatetele.
Njikabatwamenena ku bana ba bindonga,
Mu ngila ya kulambesa muje kubakatanuka.
Mwafwa nji Ishe ya Isalele, co Efremu napu ntwatwa yange.”
10 Eni baka-mafuti, tolilileni ku lijwi lya Yehova,
Co lyambululeni ku mañanda ali kulako, ngweni:
“Uje washandwele Isalele amukungulwila hamo.
Amunyunga ngwe kanyungi mwakanyungila butanga bwendi.
11 Mwafwa Yehova akapatula Jakobu
Na kumwobola mu liboko lya uje namutubakana ku nzili.
12 Bakaija na kutambeka ha munkinda wa Siyone,
Co bakasikima mwafwa ya bubwa* bwa Yehova,
Na binona na binyu byabiha na mazi,
Co lalo mwafwa ya bana ba bimanga na bingombe.
Bakapwa ngwe lihya libanashangelela mwamubwa,
Co kubakayanda lalo.”
13 “Ha simbu oyo, mumbanda uje kanda alilaleho laja na munalume akakina mu kubwahelela,
Co lalo bakwenje na banalume ba kukola bakakina hamolika.
Njikatengulula busiwa bwabo kupwa kulisamba.
Njikabazembeleka na kubalingisa bapwe ba kubwahelela kutubakana kukala mu busiwa.
14 Njikakutisa tupilistu na byakulya byabingi,
Co banu bange bakakuta na byuma byabibwa binjikabana,” mukemwo mwanendeka Yehova.
15 “Yehova nendeka ngwendi:
‘Ku Lama kuli na kuzibika lijwi, kuli na kuzibika mbimbi na kulila manene.
Recho ali na kulila bana bendi.
Nabyana kumuzembeleka ha bana bendi,
Mwafwa bana bendi bahyoni.’”
16 Yehova nendeka ngwendi:
“‘Oloka, keti ulile na kundwekesa lalo misozi,
Mwafwa njikwana cikandelela mwafwa ya cipangi ciunalingi,’ mukemwo mwanendeka Yehova.
‘Bana bobe bakeluka kutunda ku lifuti lya citozi.’
17 Yehova nendeka ngwendi, ‘Byuma bikala mwamubwa kulutwe.
Bana bobe bakeluka mu lifuti lyabo.’
18 “Njinazibi Efremu añuñuta ngwendi,
‘Njapwile ngwe muna ngombe uje kubalongesele.
Unanjolola, co njinoloka.
Njilwise, co njiluka
Mwafwa yobe Yehova Njambi yange.
19 Munjelukile kuli yobe, njazibile kubihya ku mbunge mwafwa byuma binjalingile,
Co muwanjikwasele kuzibisisa, njalipupile ha litafu mu busiwa.
Njapayele na kuziba shwamwa
Mwafwa ya byuma binjalingile ku bwanike bwange.’”
20 “Kuma Efremu kapwile munange wa seho injazema ndi?
Mwafwa nameme njimulinge mwamubi, anga njicimwanuka,
Mukemwo njili na kumuzibila ngozi,
Co cili bene njikamuzibila ngozi,” mukemwo mwanendeka Yehova.
21 “Lishimbikile bizibukiso ku ngila,
Co lyakele bimweso.
Aka mbunge ku tapalo yakama muje muuya.
Iluka obe mumbanda, obe Isalele uje kanda alilaleho laja na munalume. Iluka ku binganda byobe.
22 Obe mwana wa munakazi wa kujeneka kulongwa, wambata simbu ya kupwa hali oku utalyangela?
Mwafwa Yehova natanga cuma caciha ha lifuti-libu:
Munakazi akashakezeka manene munalume.”
23 Yehova wa maswalale, Njambi ya Isalele nendeka ngwendi: “Bakendeka lalo awa majwi mu lifuti lya Juda na mu binganda byalyo munjikakungulula banu bamwo baje banai mu bufunge. Bakendeka ngwabo: ‘Yehova akubezikise, obe mwela mwakala kusungama, obe lilundu lya kujela.’ 24 Baje bakala mu binganda na bandimi na tunyungi, bakakala hamo mu Juda, munu na munu mu mwela wendi. 25 Mwafwa njikahwimisa uje najuka na kukutisa uje natsi njala.”
26 Co njanyangumukile na kutona. Njalikuwile kulala tulo.
27 Yehova nendeka ngwendi: “Taleni! Litangwa lili na kwija omwo njikatumisa baje bali mu njibo ya Isalele na baje bali mu njibo ya Juda. Njikatumisa lalo bimuna babo.”
28 “Ngecilika munjakele mbunge ku kubatukula, ku kubasiula, ku kubabujula, na ku kubanyongesa, na ku kubalinga mwamubi, mukemwo munjikakela mbunge ku kubatunga na kubakuna,’ mukemwo mwanendeka Yehova. 29 “Mu matangwa owo kubakendeka lalo ngwabo, ‘Bisemi ba banalume bakebo banali bushuka bwa binyu bwa kungangamena, oloni mayo a bana babo akewo anatsi.’ 30 Oloni munu na munu akatsila bubi bwendi babenya. Co woshe uje akalya bushuka bwa binyu bwa kungangamena ikeye akatsa ku mayo.”
31 Yehova nendeka ngwendi: “Taleni! Matangwa ali na kwija anjikalinga cikumiiyo caciha na bakunjibo ya Isalele na bakunjibo ya Juda. 32 Eci cikumiiyo kucikapu ngwe cije cinjalikumiiye na bakukulwila babo ha litangwa linjabakwatele ku liboko lyabo na kubatundisa mu lifuti lya Ijipiti. Yehova nendeka ngwendi, ‘Bapokwele cikumiiyo cange nameme njapwile shukulu yabo bene.’”*
33 “Mwafwa eci cikeco cikumiiyo cinjikalikumiiya na bakunjibo ya Isalele munima yowo matangwa,’ mukemwo mwanendeka Yehova. Njikaka lishiko mu bimbunge byabo na kulisonekamo. Njikapwa Njambi yabo, co bakebo bakapwa banu bange.”
34 “Co kukukakala munu akalongesa mukwabo yatunga nendi nambe ndolome yendi ngwendi, ‘Zibuka Yehova.’ Mwafwa boshe bakanjizibuka, kutunda ku wamundondo kutwala ku wakama,’ mukemwo mwanendeka Yehova. “Mwafwa njikabakonekela kusebuka kwabo, co kunjikanuka lalo bubi bwabo.”
35 Ebi bikebyo byanendeka Yehova,
Uje akalingisa litangwa litwe ceke mutanya,
Na kwana ngonde na bingongonosi mashiko ngwendi bitwe ceke butsiki,
Uje akangwanjanga kalunga-ndonga na kulingisa mankimba endi atenuke,
Uje lizina lyendi ikeye Yehova wa maswalale, nendeka ngwendi:
36 “‘Mwafwa awa mashiko akatwalelelaho kupanga,’ mukemwo mwanendeka Yehova,
‘Na banu ba Isalele bakatwalelelaho kupwa muyati kulutwe lwange.’”
37 Yehova nendeka ngwendi: “Omwo naumo wahi asa kuseteka melu, co lalo naumo wahi asa kuwana hakala lubula lwa lifuti-libu, ngeci nange kunjasa kumbila kuti bakunjibo ya Isalele boshe mwafwa ya byuma byoshe bibanalingi,’ mukemwo mwanendeka Yehova.
38 Yehova nendeka ngwendi: “Taleni! Matangwa ali na kwija omwo bakatungila Yehova nganda kutunda ku Kaposhi ka Hananeu kutwala ku Cikolo ca mu Mbango. 39 Co mukole wa kusetekesa ukaya bene na ku lilundu lya Galebu, co ukatalesa ca Gowa. 40 Co cingulunga muje mubakombila bibimbi na muje mubakombila lito* na kuketa ku mihanga yoshe ya Cingulunga ca Kidroni, kuketa na mu mbango ya Cikolo ca Tubalu ca ku butuhukilo bwa litangwa, ei mitambela yoshe ikapwa ya kujela kuli Yehova. Kubakainyongesa nambe kuibiisa lalo.”