Samu
91 Woshe uje wakala mu mwela wa bushweke wa Wahakamwa Manene
Akala mu munzinze wa Muka-nzili Yoshe.
2 Njileka Yehova ngwange: “Yobe butewelo bwange na cimpaka cange,
Njambi yange uje injakulahela.”
3 Mwafwa akwamena ku muheto wa muka-kuta tuzila
Na ku mushongo wa kulitambwisa uje unyongesa.
4 Akufwika na mambaba endi,
Co utewela mwisi ya mambaba endi.
Kulongwa kwendi kupwa ngwe ntelo yakama na cibumbe cije cikunyungilila.
5 Kuutewe cuma coshe-coshe butsiki
Nambe kutewa mikili ije ita mutanya,
6 Nambe mushongo wa kulitambwisa uje ulibemba mu lisusulungu
Nambe kunyonga cije cija mutanya-mwelu.
7 Banu 1,000 bakawila kumukulo wobe,
Co banu 10,000 bakawila ku liboko lyobe lya cilyo,
Oloni yobe, ebi byuma kubikashwene kuli yobe.
8 Ukalimwenabyo lika na mesho obe
Na kulimwena banu bababi mubabana kashitiko.
9 Mwafwa wendekele ngwobe: “Yehova ikeye butewelo bwange.”
Unalingisa Wahakamwa Manene apwe mwela wobe wa kukala.*
10 Kukwesi bukalu bukakwizila,
Co kukwesi cuma cacibi cikaija kuyehi na tenti yobe.
11 Mwafwa akashika tungelo bendi
Mangana bakunyungilile mu bingila byobe byoshe.
12 Bakakukabwila mu maboko abo
Mangana limanya keti likapwesule lindi lyobe.
13 Ukalyatangela muna ndumba na lishuko
Na kulyatangela muna ndumba wa kukola na linyoka wakama.
14 Njambi wendekele ngwendi: “Njimwamena mwafwa wanjizema.
Njimunyungilila mwafwa azibuka lizina lyange.
15 Akatambeka kuli yange, co njikamukumbulula.
Njikakala nendi mu simbu ya bukalu,
Njikamwamena na kumwamesa.
16 Njikamulingisa ayoye myaka yaingi
Na kumulingisa amone bilinga byange bya kwobola.”*