Samu
94 Obe Yehova Njambi muka-kulinga shambandinga,
Obe Njambi muka-kulinga shambandinga, twa ceke.
2 Katuka, obe Lyaako wa lifuti-libu.
Ilwisila baka-kulyalesa bije binabapande.
3 Obe Yehova, simbu ya kupwa hali,
Simbu ya kupwa hali ibatwalelelaho kulisamba banu bababi?
4 Byendeka byabo binapu bya kukabangela na kulijundula.
Baka-kulinga byuma byabibi boshe bakalishasha bakebo babenya.
5 Batika banu bobe, obe Yehova,
Na kulyatelela buswana bwobe.
6 Batsiya fwile na munu wa ku lifuti lyeka
Na kutsiya banu baje kubesi na baishabo.
7 Bendeka ngwabo: “Jah kamono.
Njambi ya Jakobu kanangukaho cimo.”
8 Zibisiseni ebi byuma eni baka-kujeneka kuzibisisa.
Eni bilema, tangwa lika mukamwesa ngweni mu baka-kuzibisisa?
9 Uje watangele litwi, kuma kazibi ndi?
Uje watangele lisho, kuma kamono ndi?
10 Uje akolola baka-mafuti, kuma kasa kwendekela ndi?
Ikeye akana banu mangana.
11 Yehova azibuka bisinganyeka bya banu
Ngwendi banapu lika muku.
12 Nabwahelela munu iwolola, obe Jah,
Uje iulongesa lishiko lyobe
13 Mangana umwane kwoloka ha litangwa lya bukalu
Kweta noho hakawila mu bwina munu wamubi.
14 Mwafwa Yehova kaseze banu bendi
Nambe kumbila kuti buswana bwendi.
15 Mwafwa kusompa cikapwa lalo ca kusungama,
Co banu boshe ba kusungama mu bimbunge bakacikabangeya.
16 Iya anjikwasa mangana njilwise banu bababi?
Iya anjikwasa mangana njilwise baka-kulinga byuma byabibi?
17 Ngwe Yehova kapwile mukwasi wange
Ngwe njinanyongo laja.*
18 Munjendekele ngwange: “Lindi lyange lili na kusenutuka,”
Cizemo cobe cije kucesi kutenguluka, obe Yehova, catwaleleleleho kunjikwasa.
19 Bishoti mubyanjituminine,*
Wanjizembelekele na kunjisimpisa.
20 Kuma litanda* lya lizika-kanwa lyasa kulikwatasana nobe
Oku lili na kukatula bukalu mu lizina lya lishiko ndi?
21 Bali na kulwisa manene munu wa kusungama*
Na kusompela munu wa kujeneka mulonga ngwabo bamutsiye.*
22 Oloni Yehova apwa butewelo bwange bwa kukola.
Njambi yange ikeye limanya lyange lya kutewela.
23 Alingisa bilinga byabo byabibi bibelukile.
Apangesa bubi bwabo mu kubanyongesa.*
Yehova Njambi yetu abanyongesa.*