Samu
Kuli muka-kutwamenena. Mwaso wa Devidi ngamba ya Yehova.
36 Kupokola mashiko kuli na kutwamenena mbunge ya munu wamubi,
Co kesi kuzibila Njambi lyoba.
2 Mwafwa walimona kupwa wa seho manene,
Co kesi kunanguka bubi bwendi na kubuzinda.
3 Majwi a mu kanwa kendi azibisa kubabala ku mbunge, co apwa a makuli.
Kesi kuzibisisa mwakulingila byuma byabibwa.
4 Akayongola kulinga byuma byabibi nameme ali ha mwela wendi.
Ali na kwenda mu ngila yaibi.
Kesi kubyana byuma byabibi.
5 Obe Yehova, cizemo cobe cije kucesi kutenguluka cinete na mwilu.
Kulongwa kwobe kunete na mu mashelwa.
6 Kusungama kwobe kunapu ngwe minkinda yakama.
Kusompa kwobe kunapu ngwe nzinga* ya mema amangi.
Obe Yehova, ukanyungu* munu na kasitu.
7 Cizemo cobe cije kucesi kutenguluka capwa ca seho manene, obe Njambi!
Bana ba banu batewela mu munzinze wa mambaba obe.
8 Banwa byuma byabingi byabibwa bya mu njibo yobe na kupwisamo.
Co ubalingisa banwe byuma byobe byabibwa bije byapwa byabingi ngwe mema a mu muta.
9 Yobe nsina ya kuyoya.
Tumona ceke mwafwa ya ceke cobe.
10 Twalelelaho kumwesa cizemo cobe cije kucesi kutenguluka kuli baje bakuzibuka.
Na kumwesa kusungama kwobe kuli baje bapwa ba kusungama mu bimbunge.
11 Keti utabese lindi lya munu wa kulyalesa linjilyatangele
Nambe liboko lya munu wamubi linjisheke.
12 Baka-kulinga byuma byabibi baje banawila haje,
Banabalindumwina hasi, co kubasa kwimana.