Samu
Kuli muka-kutwamenena. Mwaso wa bana ba Kola. Kwesekesa na imbisi ya Alamothi.*
46 Njambi ikeye butewelo bwetu na nzili yetu.
Nalibwahesela kutukwasa simbu yoshe ituliwana na bukalu.
2 Mukemwo kutuzibi lyoba nameme lifuti-libu litenguluka,
Nameme minkinda ilundumukila kwisi ya kalunga-ndonga.
3 Nameme mema a mu kalunga-ndonga acuma na kutuhula lifulu,
Nameme minkinda ininganga mwafwa ya kutenuka kwa kalunga-ndonga. (Sela)
4 Kuli ndonga ije bana bayo balingisa nganda ya Njambi ibwahelele,
Kulumbununa tabanakele yakama ya kujela ya Wahakamwa Manene.
5 Njambi ali omu mu nganda, kubasa kuihyana.
Njambi ayamena mutondo-tondo.
6 Baka-mafuti bakele mu ciluwaluwa, bumwene babuhyanene.
Wendekele na lijwi lyakama, co lifuti-libu lyasangunukile.
7 Yehova wa maswalale ali netu.
Njambi ya Jakobu ikeye butewelo bwetu bwa kukola. (Sela)
8 Ijeni mwakumone bipangi bya Yehova,
Mwakumone mwanalingila byuma bya kukomokesa ha lifuti-libu.
9 Amanesa binzita ha lifuti-libu hoshe.
Apokola buta bwa lusipa na kutika makunga.
Enyeka matemba* a nzita na tuhya.
10 “Lyononweseni na kuzibuka ngweni yange Njambi.
Bakanjizumbangeya mukati ka baka-mafuti.
Bakanjizumbangeya ha lifuti-libu.”
11 Yehova wa maswalale ali netu.
Njambi ya Jakobu ikeye butewelo bwetu bwa kukola. (Sela)