Samu
Kuli muka-kutwamenena. Mwaso wembile Devidi ngamba ya Yehova. Wembilile Yehova ou mwaso ha litangwa lyamwamenene Yehova ku bitozi bendi boshe na kuli Saulu. Wembile ngwendi:
18 Obe nzili yange Yehova, njakuzema.
2 Yehova ikeye limanya lyange na cimpaka cange, Uje anjamena.
Njambi yange ikeye limanya lyange kunjitewela,
Ikeye ntelo yange na limbinga* lyange lya kwobola,* ikeye butewelo bwange bwa kukola.
3 Njitambeka kuli Yehova, uje ibanapande kushangazala,
Co anjobola ku bitozi bange.
4 Mikole ya kutsa yanjizengazengele,
Banalume bangoco baje bafwile ngwe mema a libazi banjijujwisile.
5 Mikole ya Cihilo* yanjizengazengele,
Miheto ya kutsa yanjikwatele.
6 Njatambekele kuli Yehova munjakele mu bukalu,
Njatwaleleleleho kulilila kuli Njambi yange mangana anjikwase.
Wazibile lijwi lyange oku ali mu tempele yendi,
Kulila kwange kwa kulomba bukwasi kwetele mu matwi endi.
7 Lifuti-libu lyaningangele na kujaja,
Lubula lwa minkinda lwajajele
Co lwaningangele noku-noku mwafwa Njambi walubalele.
8 Bwisi bwatuhukile mu majulu endi,
Tuhya tuje tunyongesa twatundile mu kanwa kendi,
Manungu a tuhya atundile kuli ikeye.
9 Wajendamesele melu mwasikumukile,
Co mwisi ya bilyato byendi mwakele lisusulungu lyakama.
10 Walondele ha kerubi na kwija oku apulula.
Wasikumukile bwasi-bwasi oku ali ha mambaba a kangelo.*
11 Walifwikile lisusulungu
Lya mema a kuzibala na mashelwa a kuhima,
Lyamuzengelekele ngwe lipapela.
12 Mu lyezi lyakele halutwe lwendi
Mwatundile nyonzi ya mamanya na manungu a tuhya, co byatubile mu mashelwa.
13 Co Yehova washangumukile kuluma mwilu.
Wahakamwa Manene walingisile lijwi lyendi balizibe,
Co kwakele nyonzi ya mamanya na manungu a tuhya.
14 Washele mikili yendi na kubashandangana.
Watumine muhyato wendi na kubatanganesa.
15 Masima a bindonga* asholokele.
Obe Yehova, lubula lwa lifuti-libu lwezile hashandangala mwafwa ya kutenuka kwobe,
Na butenu bwa lihunzi lya mu majulu obe.
16 Wolwele liboko lyendi oku ali mwilu,
Wanjikwatele na kunjijabulula ha nzinga.*
17 Wanjamenene ku citozi cange wa nzili,
Kuli baje banjizinda, baje bakele na nzili kunjitubakana.
18 Banjikatukilile ha litangwa linjakele mu bukalu,
Oloni Yehova wanjikwasele.
19 Wanjinenele mu mwela wa kujeneka bushonde,
Wanjamenene mwafwa njamubwasele.
20 Yehova anjana cikandelela kwesekesa na kusungama kwange,
Anjifweta kwesekesa na kujeneka mulonga* kwa maboko ange.
21 Mwafwa njinanyungu bingila bya Yehova,
Co kunjalingile bubi bwa kuseza Njambi yange.
22 Mashiko endi oshe ali halutwe lwange,
Kunjiyeluwisa mashiko endi.
23 Njitwalelelaho kujeneka kukala na mulonga ku mesho endi,
Na kutwalelelaho kulinyunga ku bubi.
24 Yehova anjifwete kwesekesa na kusungama kwange,
Na kwesekesa na kujeneka mulonga kwa maboko ange ku mesho endi.
25 Ku munu wa kulongwa nobe upwa wa kulongwa.
Ku munu wa kujeneka hakumupayela nobe umwesa ngwobe kuwesi naha hakukupayela.
26 Ku munu wa kujela umwesa kujela kwobe,
Oloni ku munu wa kupengapenga umwesa kunyanyama kwobe.
27 Mwafwa ukobola banu ba kwisi*
Oloni ukakehesa banu ba kulyalesa.
28 Mwafwa yobe, obe Yehova, ukashwameka ndeya yange,
Njambi yange akanjitwila ceke mu lisusulungu.
29 Njasa kuhyana cibunga ca bikenya mwafwa ya bukwasi bwobe.
Mu nzili ya Njambi njasa kulonda cibumbe.
30 Ngila ya Njambi wa busunga yapwa ya kulumbunuka,
Majwi a Yehova apwa a kujela.
Wapwa ntelo ya baje boshe batewela kuli ikeye.
31 Kuma kuli Njambi atubakana Yehova ndi?
Kuma kuli limanya litubakana Njambi yetu ndi?
32 Njambi wa busunga ikeye anjana nzili,
Na kulingisa ngila yange ipwe ya kulumbunuka.
33 Akalingisa mendi ange apwe ngwe a ntaba,
Akanjilingisa njimane ha myela ya kulunduka.
34 Akalongesa maboko ange mwakulwila nzita,
Maboko ange asa kunana* buta bwa lusipa bwa kopa.
35 Wanjana ntelo yobe ya kwobola,
Liboko lyobe lya cilyo likanjikwasa,*
Co kulikehesa kwobe kunjamesa.
36 Wamesa ngila ya myanja yange,
Mendi* ange kuwasenutuka.
37 Njikaba bitozi bange na kubakwata,
Kunjiluka, kubanga njabanyongesa boshe njwa.
38 Njikabatika mangana keti base kwimana,
Njikabalyatangela na mendi ange.
39 Ukanjana nzili ya kulwa nzita,
Ukawisila bitozi bange ku mendi ange.
40 Ukalingisa bitozi bange batewe kuli yange na kwiluka munima,*
Co njikamanesa* boshe baje banjizinda.
41 Bakalili mangana babakwase, oloni wahi akabobola,
Bakalilila na kuli Yehova, oloni kesi kubakumbulula.
42 Njibatwa bafwe ngwe likungu lili na kupekumuka na lihunzi,
Njibombila kuti bafwe ngwe mandoba ali mu bitapalo.
43 Unjamena ku banu baje bashaka kunjiwanena mulonga.
Unjangula kupwa ntwama wa baka-mafuti.
Banu baje kunjizibuka bakanjipangela.
44 Mubakaziba lika byange bakanjononoka.
Banu ba ku mafuti eka bakaija kuli yange oku bajaja.
45 Banu ba ku mafuti eka bakalijujukila,*
Bakaija oku bajaja kutunda ku myela yabo ya kubanda.
46 Yehova ali na kuyoya! Tushangazaleni Limanya lyange!
Njambi yange uje akanjobola, bamuzumbangeye.
47 Njambi wa busunga akanjilingilako shambandinga,
Akaka miyati ya banu mwisi yange.
48 Akanjamena ku bitozi bange baje banalubala.
Ukanjaka helu lya baka-kunjilwisa.
Ukanjobola ku munu wa cikenya,
49 Obe Yehova, mukemwo njikakushangazala mukati ka baka-mafuti,
Na kwimba myaso ya kushangazala lizina lyobe.
50 Akalingila mwene yendi bilinga byakama bya kwobola,
Akamwesa wakubwabesa wendi cizemo cije kucesi kutenguluka,
Akabilingila Devidi na munendi* myaka yoshe.