Jelemiya
50 Awa akewo majwi endekele Yehova kutalesa ku Babiloni, kutalesa ku lifuti lya baKaudiya kwitila muli kapolofweto Jelemiya, ngwendi:
2 “Ambululeni ou muzimbu mukati ka mafuti na kuwendeka.
Shimbikeni cimweso* na kucambulula.
Keti mushweke cuma nambe cimo.
Endekeni ngweni, ‘Babiloni banaifungulula.
Beu banamuzibisa shwamwa.
Melodaki nazibi lyoba.
Tumponya bendi banabazibisa shwamwa.
Tumponya bendi ba bunyengwe* banazibi lyoba.’
3 Mwafwa muyati unaija na kumulwisa kutunda ku kunto.
Unalingisa lifuti lyendi lipwe cuma ca kukomokesa.
Wahi alimo.
Banu na tusitu banatewemo.
Banatundumo.”
4 Yehova nendeka ngwendi, “Mu matangwa owo na ha simbu oyo, banu ba Isalele na banu ba Juda bakalikungulula hamo. Bakalila oku bali na kwenda, co boshe bakashakezeka Yehova Njambi yabo. 5 Bakehula ngila iya ku Siyone, co bakatalesako na kwendeka ngwabo, ‘Ijeni, co tuyeni tupwe lalo banu ba Yehova mu cikumiyo ca myaka yoshe cije kutukebala.’ 6 Banu bange banapu ngwe butanga bwa bimanga ba kuzimbala. Tunyungi babo banabalingisa bazimbale. Banabongumwina ha minkinda, co banabahelyangelesa ha minkinda na ha malundu. Banebala mwela wabo wa kuhwimina. 7 Boshe babawanene bababwondele, co bitozi babo bendekele ngwabo, ‘Kutwesi na mulonga mwafwa balingile bubi kuli Yehova. Babiisilile Yehova uje wapwa mwela wa kusungama na lilabelelo lya bakukulwila babo.’”
8 “Teweni mu Babiloni,
Tundeni mu lifuti lya baKaudiya,
Co pweni ngwe bimuna baje bakatwamenena bakwabo.
9 Mwafwa njikakungulula cibunga ca baka-mafuti kutunda ku lifuti lya ku kunto
Na kucituma cikalwise Babiloni.
Bakaija kuli ikeye ngwe cendo ca maswalale baje baija na kulwa nzita,
Co bakamufungulula.
Mikili yabo inapu ngwe mikili ya muka-kulwa
Ije itsiya bana.
Kuyasa kwiluka kwa kujeneka kulingako bimo.
10 Kaudiya bakamupukula.
Boshe baje bakambata byuma bya kupukula muli ikeye bakajauka,” mukemwo mwanendeka Yehova.
11 “Mwafwa wakele na kulisamba na kubwahelela
Muwakele na kwiba buswana bwange.
Mwafwa wakele na kujombozoka ngwe muna ngombe wa lwabo uje ali na kujombozoka mu mwila,
Co wakele na kuhwimasana ngwe tubalu.
12 Noko banamuzibisa shwamwa.
Uje wakukitile napaye.
Tala! Ikeye wamundondo ku mafuti,
Napu mambo ya kujeneka mema.
13 Banu kubakakalamo mwafwa ya butenu bwa Yehova.
Akapwa ngundu.
Boshe bakaita ku Babiloni bakalikomokela,
Co bakakumba milozi mwafwa ya bukalu bwoshe bunamwizila.
14 Zengelekeni Babiloni na kumulwisa,
Yeni boshe baka-kwasha mata a lusipa.
Mwasheni mikili, co keti musezeko nambe umo,
Mwafwa nalingi bubi ku mesho a Yehova.
15 Tambekeni mu mitambela yoshe na kumulwisa.
Nalyana mu maboko a baje banaija na kumulwisa.
Bingunzi byendi binau, co bibumbe byendi banabibujula,
Mwafwa Yehova namwilwisila bubi bwendi.
Mwilwisileni bubi bwendi.
Mulingeni ngwe mwanamilingi.
16 Tsiyeni muka-kukuna mbuto mu Babiloni
Na muka-kupangesa cekesi ha simbu ya kuteja.
Munu na munu eluka ku banu bendi mwafwa ya mukwale ubanapangesa mu kukenyuka,
Munu na munu atewela ku lifuti lyendi.
17 Banu ba Isalele banapu ngwe bimanga babanashandangana. Bindumba banabashandola. Ha kulibanga mwene wa Asiria wababwondele, co mwene Nebukadineza* wa Babiloni wambulukutile bitsiya byabo. 18 Ngeci, Yehova wa maswalale Njambi ya Isalele nendeka ngwendi: ‘Njana kashitiko mwene wa Babiloni na lifuti lyendi ngwe munjanene kashitiko mwene wa Asiria. 19 Co njikelwisa Isalele mu bulilo bwendi, co akalya mwila ha munkinda wa Kameu na ha munkinda wa Bashani na ha munkinda wa Efremu na wa Giliyadi, co akakuta.’”
20 Yehova nendeka ngwendi: “Co mu matangwa owo na ha simbu oyo,
Bakatonda milonga ya Isalele,
Oloni kubakaiwana,
Co kubakawana milonga ya Juda,
Mwafwa njikakonekela baje banjikasezaho.”
21 “Ya ukalwise lifuti lya Melathaimu na banu baje bakala mu Pekodi.
Batsiye na kubanyongesa,” mukemwo mwanendeka Yehova.
“Linga byoshe binjinakushiki.
22 Mu lifuti muli na kuzibika miyoyo ya nzita,
Muli bukalu bwakama.
23 Sando ibakatikisa banu boshe ba ha lifuti-libu banaipokozola na kuibwabwanya.
Babiloni inapu cuma ca kukomokesa hakati ka mafuti.
24 Njinakutela muheto, co unatsimo obe Babiloni,
Oloni yobe kuwazibukile.
Njakuwanene na kukukwata,
Mwafwa wakele na kulwisa yange Yehova.
25 Yehova nashokolola mu cishete cendi,
Tunambatamo bitwa byakapangesa mu kumwesa kulubala kwendi.
Mwafwa Mwata Wahakamwa ya Byoshe, Yehova wa maswalale
Ali na cipangi mu lifuti lya baKaudiya.
26 Ijeni na kulwisa Babiloni kutunda ku mitambela ya kulako.
Shokololeni mu bishete byendi.
Mulundikeni ngwe mitumbo ya binona.
Munyongeseni.
Keti kusaleko nambe munu umo.
27 Tsiyeni bingombe bendi boshe ba nkomba.
Baye na kubatsiya.
Lubinda lwabo mwafwa litangwa lyabo linaija.
Simbu ya kubelwisila bubi bwabo inete.
28 Kuli na kuzibika miyoyo ya banu bali na kutewa,
Miyoyo ya banu bali na kushatuka kutunda mu lifuti lya Babiloni,
Mangana bakambulule mu Siyone ngwabo Yehova Njambi yetu ali na kulinga shambandinga.
Ali na kulingila tempele yendi shambandinga.
29 Saneni baka-kwasha na mata a lusipa bakulwise Babiloni,
Saneni boshe baka-kunana mata a lusipa bakumuzengeleke.
Co keti kukale munu atewa.
Mwilwisileni bubi bwendi kwesekesa na bilinga byendi.
Mulingeni ngwe mwanamilingi
Mwafwa nalyalesela Yehova.
Nalyalesela Wakujela wa Isalele.
30 Bakwenje bendi bakatsila mu myela ya mbunga,
Co maswalale bendi boshe bakanyonga* ha litangwa olyo,” mukemwo mwanendeka Yehova.
31 Mwata Wahakamwa ya Byoshe, Yehova wa maswalale nendeka ngwendi: “Tala! Nji citozi cobe obe muka-kulwisa,
Mwafwa litangwa lyobe linapande kwija, Simbu injikakwana kashitiko ili na kwija.
32 Obe muka-kulwisa ukatanuka na kuwa,
Co naumo wahi akakukatula.
Co njikenyeka binganda byobe na tuhya,
Co otu tuhya tukenyeka byoshe binakuzengeleka.”
33 Yehova wa maswalale nendeka ngwendi:
“Banu ba Isalele na banu ba Juda bali na kubayandesa,
Co boshe baje banabakwata bundungo anga banabakwatelela.
Banabyana kubecela.
34 Oloni Muka-kubasokola wapwa wa kukanyama.
Lizina lyendi ikeye Yehova wa maswalale.
Akatala ñanda yabo
Mangana anene kwoloka mu lifuti
Na kulingisa banu bakala mu Babiloni balishoshomwene.”
35 “Mukwale ulwisa baKaudiya,” mukemwo mwanendeka Yehova,
“Na banu baje bakala mu Babiloni na bamyata bamwo na banu bamwo ba mana.
36 Mukwale ulwisa baka-kumbamba lika ngoco,* co balinga byuma bya bulema.
Mukwale ulwisa baka-kulwa ba Babiloni, co baziba lyoba.
37 Mukwale ulwisa tubalu babo na matemba abo a nzita,
Ulwisa banu boshe balimo ba kuliseza-seza,
Co bakapwa ngwe banakazi.
Mukwale ulwisa bufuko bwendi na kubupukula.
38 Mema endi anabihya, co oma.
Eli lifuti linashulu na tumponya,
Co lalo banu bali na kumona bimona bya kutewesa, mukemwo bali na kulinga ngwe banu ba kuzaluka.
39 Ngeci byakutanga bya mu mambo bikakala hamo na tusitu baje bakolula,
Co mukakala lalo banyamalanda.
Kumukakala lalo munu,
Co na umo wahi akatungamo ku bisemwa byoshe.”
40 Ngecilika Njambi mwanyongesele Sodoma na Gomola na binganda bije byakele hayehi nabyo, “naumo wahi akakalamo, co wahi akatungamo,” mukemwo mwanendeka Yehova.
41 Taleni! Muyati wa banu uli na kwija kutunda ku kunto.
Muyati wakama na bimyene ba nzili bakaija
Kutunda ku mamaneselelo a lifuti-libu.
42 Bakapangesa mata a lusipa na kwasha makunga.
Bapwa bikenya, co kubakakuzibila ngozi.
Cilumo cabo mubaija ha tubalu,
Cizibika ngwe cilumo ca kalunga-ndonga uje ali na kucuma.
Banemana mu mukana ngwe munu umo oku banalibwahesela kukulwisa, obe mwana wa munakazi wa Babiloni.
43 Mwene wa Babiloni nazibi muzimbu wabo,
Co maboko endi anazeye.
Lyoba lyamuwana,
Co ali na kuziba kubabala ngwe munakazi uje ali na kupapa.
44 Taleni! Munu umo akaija na kubiisa bulilo bubananyungilila mwamubwa ngwe ndumba uje ali na kutunda mu shwata ya kuzika ya ku Jodani, oloni njikamulingisa atewe mu lifuti lyabo. Co njikangula ntwama injinangula mangana atwamenene eli lifuti. Mwafwa iya nalifu nange, co iya asa kulwa nange? Kanyungi muka asa kwimana kulutwe lwange? 45 Ngeci, eni banu tolilileni byuma byanangula kulinga Yehova kutalesa kuli Babiloni na byuma byanayongola kutalesa ku lifuti lya baKaudiya.
Cili bene bana ba bimanga bakabapulunya.
Akalingisa myela ibakala ipwe bingundu mwafwa ya byuma bibanalingi.
46 Cilumo ca kufungula Babiloni cikalingisa lifuti-libu liningange,
Co miteto yabo bakaiziba mu mafuti oshe.”