Daniele
6 Daliasi wamwene ngwendi cacibwa kwangula baka-kwimanenako mwene 120 mu bumwene bwoshe. 2 Mwene wangwile bamyata bakama batatu ba kubatwamenena, umo wabo wapwile Daniele, co baka-kwimanenako mwene bakele na kunena mizimbu kuli bakebo mangana byuma bya mwene keti bibihye. 3 Oloni Daniele walisezele na bamyata bakwabo bakama na baka-kwimanenako mwene, mwafwa wakele na cashu ca kulitila, co mwene wayongwele kumujundula mu bumwene bwendi bwoshe.
4 Ha simbu oyo aba bamyata bakama na baka-kwimanenako mwene bakele na kushakezeka ha kwanena Daniele mulonga kutalesa ku biñanda bya lifuti,* oloni kubawanene ha kumwanena mulonga nambe cuma cimo ca kuhenga kuli ikeye, mwafwa wapwile wa kulongwa, wakele na kwaka mbunge ku byuma, co lalo kakele na kulinga byuma bya kuhenga. 5 Aba banalume bendekele ngwabo: “Kutuwana ha kwanena Daniele mulonga, kubanga nga tumukwatela mu lishiko lya Njambi yendi.”
6 Ngeci, aba bamyata bakama na baka-kwimanenako mwene balikungulwile na kuya kuli mwene, co bakamulekele ngwabo: “Obe Mwene Daliasi, yoya myaka yoshe. 7 Bamyata ba bumwene, na bamyata bakwabo na baka-kwimanenako mwene, na bamyata bakama, na bangubulu boshe banaliyongola na kulizibasana ngwabo kukale lishiko litunda kuli mwene lya kubindika banu kulomba kuli njambi woshe-woshe nambe kuli munu woshe-woshe ha matangwa 30, kubanga kuli yobe, obe mwene, co woshe apokola eli lishiko banapande kumumbila mu bwina bwa bindumba. 8 Ngeci, obe mwene, tunga lishiko na kusainako mangana keti litenguluke, kwesekesa na lishiko lya baMede na baPelesha, lije kulyasa kutenguluka.”
9 Ngeci Mwene Daliasi wasainile kuje ku lishiko.
10 Oloni Daniele mwazibile lika ngwendi mwene nasaina kuje ku lishiko, waile ku njibo yendi, ije yakele na mulili wa helu uje wakele na mawindo a kushokoloka aje atalesele ku Jelusalema. Co lutatu ha litangwa, watsikamene ha mabuli na kulombela na kushangazala Njambi yendi ngwe mwakele na kulingila simbu yoshe, simbu kanda batunge eli lishiko. 11 Ha simbu ije, baje banalume bakobelele mu kukasumuna, co bawanene Daniele ali na kulomba na kulambelela Njambi yendi amuzibileko ngozi.
12 Ngeci baile kuli mwene na kukamwanukisa bya lishiko lyatungile ngwabo: “Kuma kuwasainile lishiko lije limwesa ngwalyo ha matangwa 30 munu woshe-woshe uje alomba kuli njambi woshe-woshe nambe kuli munu woshe-woshe kutubakana kulomba kuli yobe, obe mwene, banapande kumumbila mu bwina bwa bindumba ndi?” Mwene wabakumbulwile ngwendi: “Oyo ñanda twaizameka kwesekesa na lishiko lya baMede na baPelesha lije kulyasa kutenguluka.” 13 Oho bene balekele mwene ngwabo: “Daniele, umo wa bafunge ba ku Juda, kakusingimikile obe mwene, nambe kusingimika lishiko liunasainile, mwafwa akalombela lutatu ha litangwa.” 14 Mwene mwazibile ngoco, wakele mu citanga, co washakele kuwana ngila ya kwamena Daniele. Ngeci, walifwitile kuwana ngila ya kumwobwelamo kweta noho halyalahukilile litangwa. 15 Mamaneselelo aba banalume balikungulwile na kuya kuli mwene, co bakamulekele ngwabo: “Obe mwene, anuka ngwobe lishiko lya baMede na baPelesha limwesa ngwalyo lishiko lyoshe lyatunga mwene kubapandele kulitengulula.”
16 Ngeci mwene washikile ngwendi banene Daniele, co bamunenele na kumumbila mu bwina bwa bindumba. Mwene walekele Daniele ngwendi: “Njambi yobe uje iuli na kutwalelelaho kupangela akwamena.” 17 Banenele limanya na kulifwika ku cikolo* ca bwina, co mwene waganteleho na riñi yendi ya kugantesa na riñi ya kugantesa ya banu bendi ba bulemu, mangana keti kukale umo atengulula bibayongwele kutalesa kuli Daniele.
18 Mwene welukile ku lipela lyendi. Butsiki bwoshe walibindikile kulya na kubyana kumushubulwisa,* co kamwene tulo. 19 Lyamukwabo, mukwalingile bene muje njwa, mwene wendukile na kuzambwila ku bwina bwa bindumba. 20 Mwashwenene kuyehi na bwina, watambekelele Daniele na lijwi lya busiwa. Mwene wehwile Daniele ngwendi: “Obe Daniele, ngamba ya Njambi wa kuyoya, kuma Njambi yobe uje iuli na kutwalelelaho kupangela na kwamena ku bindumba ndi?” 21 Daniele wakumbulwile mwene oho bene ngwendi: “Obe mwene, yoya myaka yoshe. 22 Njambi yange natumine kangelo kendi kwa kushoka tunwa twa bindumba, co kubanjibulumwine, mwafwa kunjesi na mulonga ku mesho endi. Co lalo kunjakubiisilile, obe mwene.”
23 Mwene wabwahelelele manene, co washikile ngwendi batundise Daniele mu bwina. Daniele mubamutundisile mu bwina, nahamo hahi habulumukile, mwafwa wakulahelele Njambi yendi.
24 Mwene washikile ngwendi banene banalume baje babangeyeye Daniele, co babombilile mu bwina bwa bindumba, hamo na bana babo na banakazi babo. Simbu kanda bete ha masima a bwina, bindumba babakabwilile na kupokozola bitsiya byabo byoshe.
25 Co Mwene Daliasi wasonekelele miyati yoshe ya banu, na mafuti, na bindaka bya kuliseza-seza bya banu baje bakala ha lifuti-libu hoshe ngwendi: “Kaleni mu kwoloka kwakama! 26 Njili na kushika ngwange mu mitambela yoshe ya bumwene bwange, banu bazibile lyoba Njambi ya Daniele na kumusingimika. Mwafwa wapwa Njambi wa kuyoya, co wakalako myaka yoshe. Bumwene bwendi kubakabunyongesa, co ciyulo cendi ca myaka yoshe. 27 Akamena na kwobola, na kulinga bizibukiso na bikomokeso mu melu na ha lifuti-libu, mwafwa namena Daniele ku byala bya bindumba.”
28 Ngeci, byuma byendelele mwamubwa Daniele mu bumwene bwa Daliasi na mu bumwene bwa Sailasi kaPelesha.