Jelemiya
5 Endangana mu Jelusalema
Talesesa mwamubwa
Tonda-tonda mu myela ya mbunga mangana tumone
Indi uwanamo munu uje washaka kulinga byuma mwamubwa,
Wa kulongwa.
Nga umuwanamo, co njikonekela ei nganda.
2 Nameme bendeka ngwabo: “Njilisinga hali Yehova wa kuyoya.”
Oloni anga balisinga bya makuli.
3 Obe Yehova, uli na kutonda-tonda banu ba kulongwa.
Wabanene kashitiko, oloni kubalilongeseleho cimo.
Wesi kubanyongesele, oloni babyanene kubanangula.
Bimbunge* byabo byakolele kutubakana mamanya,
Co babyanene kutenguluka.
4 Oloni njalyendekesele ngwange: “Cili bene aba banu banapu ba kwisi.
Bali na kulinga byuma bya bulema, mwafwa kubazibuka ngila ya Yehova,
Kubazibuka byatonda Njambi yabo.
5 Njiya ku banu ba kutsimana na kukasimutwiya nabo,
Mwafwa bazibuka ngila ya Yehova,
Bazibuka byatonda Njambi yabo.
Oloni boshe banapokola joko,
Co banambitozola mikole ije inabakutile.”
6 Mukemwo ndumba akabalwisa,
Kangunga wa mu mambo atwalelelaho kubasanyozola,
Ingwe nabutama ku binganda byabo.
Woshe atuhuka mu binganda byabo, bamusanyozola.
Mwafwa milonga yabo yaingi,
Bilinga byabo bya kujeneka kulongwa binatumu manene.
7 Njimikonekela bati ha cuma eci?
Bana beni bananjiseze,
Co bali na kulisinga ha cuma cije kucapwile Njambi.
Njabanene byuma bibatondele,
Oloni batwaleleleleho kulinga bukoi,
Co bajemukilile ku njibo ya lihule.
8 Banapu ngwe tubalu ba myeha baje bali na lishungu lyakama,
Umo na umo wabo ali na kushungwiya munakazi wa mukwabo.
9 Yehova nendeka ngwendi, “Kuma kubapandele kulitabela kuli yange mwafwa yebi byuma ndi?
Kuma kunjapandele kwana muyati wa cifwa eci kashitiko ndi?”
10 “Yeni ku lihya lya Jelusalema lya binyu na kukalibiisa,
Oloni keti mukalibiise lyoshe.
Pamozoleni minango ije ili na kujobelela,
Mwafwa keti ya Yehova.
11 Mwafwa bakunjibo ya Isalele na bakunjibo ya Juda
Kubapwile ba kulongwa kuli yange,” mukemwo mwanendeka Yehova.
12 “Banabyana Yehova, co bali na kwendeka ngwabo,
‘Byahi byalinga.*
Nabumo bukalu butwizila bwahi.
Mukwale nambe njala kubitwizila.’
13 Tupolofweto bali na kwendeka byuma byangoco,
Kubesi na kwendeka lijwi lya Njambi.
Nabo bapwa bangoco ngwe majwi abali na kwendeka.”
14 Ngeci Yehova Njambi wa maswalale ali na kwendeka ngwendi:
“Omwo aba banu bali na kwendeka ngacije,
Njikalingisa lijwi lyange lipwe ngwe tuhya mu kanwa kobe,
Co aba banu bakapwa ngwe bikuni,
Co tuhya tukatunda mu kanwa kobe tukabenyeka.”
15 Yehova nendeka ngwendi, “Eni bakunjibo ya Isalele, njiminenela muyati wa kulako,
Muyati uje unakalako simbu yailaha,
Muyati wa ku laja,
Muyati uje kumuzibuka ndaka yawo,
Co lalo byuma bibendeka kumwasa kubiziba.
16 Bingonga byabo bya mikili* binapu ngwe cihilo cije cinashama,
Boshe banapu baka-kulwa.
17 Bakabwonda byuma bimunateje na byakulya byeni.
Bakabwonda bana beni ba banalume na bana beni ba banakazi.
Bakabwonda matanga eni a bimuna.
Bakabwonda miti yeni ya binyu na miti yeni ya mikuyu.
Co bakapangesa mikwale mu kunyongesa binganda byeni bya kukola bije bimwakulahela.”
18 Yehova nendeka ngwendi: “Oloni nameme mu matangwa owo, kunjikaminyongesa mubaboshe. 19 Co nga bakwihula ngwabo, ‘Mwafwa bika Yehova Njambi yetu nalingi ebi byuma byoshe kuli yetu?’ Unapande kubakumbulula ngwobe, ‘Ngwe muje mumwanjisezele na kupangela binjambi beka mu lifuti lyeni, neni lalo mukapangela banu beka mu lifuti lije keti lyeni.’”
20 Endekeni ou muzimbu ku banu bakunjibo ya Jakobu,
Co wambululeni mu Juda ngweni:
21 “Tolilileni, eni bilema, ba kujeneka mana:
Muli na mesho, oloni kumwesi na kumona,
Muli na matwi, oloni kumwesi na kuziba.
22 Yehova nendeka ngwendi, ‘Kuma kumunjizibila lyoba ndi?
Kuma kumwapandele kujaja omwo muli kulutwe lwange ndi?
Yange njalingisile mushekesheke upwe nginga ya kalunga-ndonga.
Eli linapu lishiko lya myaka na myaka lije kasa kujomboka kalunga-ndonga.
Nameme mankimba akalyasha bati, oloni kuwasa kujomboka ei nginga.
Nameme mema a mu kalunga-ndonga atenuke bati, anga kuwasa kujomboka ei nginga.
23 Oloni aba banu banatindibala, co bananjitengulukila.
Banatundu mu ngila yange na kuya mu ngila yabo babenya.
24 Co kubesi kwendeka mu bimbunge byabo ngwabo:
“Tuzibileni oni Yehova Njambi yetu lyoba,
Uje akanyokesa nyonzi ha simbu yayo,
Nyonzi ya mashangumukilo na nyonzi ya mamaneselelo,
Uje akanyungilila byalumingo bya kuteja.”
25 Milonga yeni inonowesa ebi byuma kwija.
Bubi bweni bunalingisa byuma byabibwa bimite.
26 Mwafwa hakati ka banu bange hali banu bababi.
Bakashumbilila ngwe mwakalingi muka-kukwata tuzila nga alibemba.
Bakate miheto,
Co bakalabula banu.
27 Binjibo byabo binashulu makuli,
Ngwe camba cije cinashulu tuzila.
Mukemwo bali na nzili na bufuko.
28 Bananunu, co bali na kusikima.
Bali na kulinga byuma babibi byabingi.
Kubesi na kusompela siwa mu kusungama,
Mangana byuma bibendele mwamubwa.
Co kubesi na kwakula mwamubwa kahutu.’”
29 Yehova nendeka ngwendi: “Kuma kubapandele kulitabela kuli yange mwafwa yebi byuma ndi?
Kuma kunjapandele kwana muyati wa cifwa eci kashitiko ndi?
30 Kunalingiwa cuma cacibi ca kutewesa mu lifuti:
31 Tupolofweto bali na kupolofweta bya makuli,
Co tupilistu bali na kupangesa moko yabo mu kulyatelela bakwabo.
Co banu bange mukemwo mubashakela bene ngoco.
Co bika bimukalinga mamaneselelo muwakaija?”