Jelemiya
51 Yehova nendeka ngwendi:
“Njinena lihunzi lyakama
Lije linyongesa Babiloni na banu bakala mu Lebukamai.*
2 Njikatuma baka-kuleleka baye ku Babiloni,
Co bakamuleleka na kupwisa lifuti lyendi ngundu.
Bakamujemukila kutundilila ku mitambela yoshe ha simbu ya bukalu.
3 Baka-kwasha na buta bwa lusipa ba ku Babiloni kubakanana mata abo a lusipa.
Co maswalale bendi kubakemana na bizalo byabo bya buswalale.
Keti muzibile ngozi bakwenje bendi.
Nyongeseni maswalale bendi boshe.
4 Co bakatsa mu lifuti lya baKaudiya,
Bakabapulyasana na mukwale mu bitapalo byendi.
5 Mwafwa Yehova wa maswalale kasezele Isalele na Juda. Njambi yabo kabasezele.
Oloni lifuti lyabo* linashulu na milonga mu kumona kwa Wakujela wa Isalele.
6 Teweni mu Babiloni,
Oboleni myonyo yeni.
Keti mutsile bubi bwendi.
Mwafwa ino inapu simbu ya Yehova ya kumulinga shambandinga.
Ali na kumwilwisila byanalingi.
7 Babiloni wapwile ngwe nganja ya goudi mu liboko lya Yehova.
Wapendesele lifuti lyoshe.
Baka-mafuti bananu binyu byendi,
Mukemwo banazaluka.
8 Babiloni nau mu kukasumuna, co napokozoka.
Mulileni!
Ambateni mazi a bosamu mangana mukwite ha bimbandu byendi, hamo byola.”
9 “Twesekele kukangwisa Babiloni, oloni kakangukile.
Musezeni, tuyeni, munu na munu eluke ku lifuti lyendi.
Mwafwa milonga yendi inete na mwilu.
Inatumu manene, inaketa na mu mashelwa.
10 Yehova natwakula mwamubwa.
Ijeni, tuyeni twendeke bipangi bya Yehova Njambi yetu mu Siyone.”
11 Otoleni mikili. Ambateni bintelo bya muzenguluke.*
Yehova nashongangeya bimyene ba baMede baye na kulwa nzita,
Mwafwa nayongola kunyongesa Babiloni.
Mwafwa Yehova ali na kulinga shambandinga, alingila tempele yendi shambandinga.
12 Junduleni cimweso* cije cimwesa ngwaco bibumbe bya Babiloni baija na kubilwisa.
Kanyameseni baka-kunyunga, akeni baka-kunyunga mu myela yabo.
Lekeni baje babandamena kulwisa baka-Babiloni balibwahesele.
Mwafwa Yehova natumbu laja butumbe bwendi,
Co alinga byanakulahesa ngwendi abilinga ku banu bakala mu Babiloni.”
13 “Obe munakazi wakala ha mema amangi,
Yobe wakala na byuma byabingi,
Mamaneselelo obe anaija, kuupanga lalo profiti.
14 Yehova wa maswalale nalisingi hali ikeye babenya ngwendi,
‘Njikatuma banalume babangi mu nganda yobe, bakapwa babangi ngwe bimbimba,
Co bakatambeka mu kulisamba mwafwa ya kukuhyana.’
15 Ikeye watangele lifuti-libu na nzili yendi,
Ikeye wazamekele lifuti-libu kupangesa mana endi,
Co ikeye wajangumwine melu na kuzibisisa kwendi.
16 Mwatuhula lijwi lyendi,
Mema mwilu angwanjanga,
Co alingisa mashelwa* akanduke kutunda ku mamaneselelo a lifuti-libu.
Anena mihyato ya nyonzi,*
Na kulingisa lihunzi lihuwe kutunda mu bishete byendi.
17 Banu boshe bali na kulinga byuma kwa kujeneka kuzibisisa, kwa kujeneka mana.
Baka-kufula boshe bakaziba shwamwa mwafwa ya tumponya babanafulu.
Mwafwa tumponya babo ba bikubo banapu ba makuli,
Co kubesi na mwonyo.*
18 Banapu bangoco, banapu byuma bibasembulula banu.
Litangwa lya kubelwisila bubi bwabo mulikaija, bakanyonga.
19 Njambi ya Jakobu kapwile ngwe ebi byuma,
Mwafwa ikeye watangele byuma byoshe,
Co Isalele napu mulamu wendi na buswana bwendi.
Lizina lyendi ikeye Yehova wa maswalale.”
20 “Yobe unapu mbweti yange ya kulwisa, unapu citwa ca kupangesa mu nzita,
Mwafwa njikupangesa mu kunyongesa mafuti.
Njikupangesa mu kunyongesa bumwene.
21 Njikupangesa mu kunyongesa tubalu na baka-kulonda tubalu.
Njikupangesa mu kunyongesa matemba a nzita na baka-kulondamo.
22 Njikupangesa mu kunyongesa banalume na banakazi.
Njikupangesa mu kunyongesa tukulukazi na banike.
Njikupangesa mu kunyongesa bakwenje na bambanda.
23 Njikupangesa mu kunyongesa tunyungi na matanga abo.
Njikupangesa mu kunyongesa bandimi na bimuna babo babakalimisa.
Njikupangesa mu kunyongesa bangubulu na baje banata kuli baka-kuyula.
24 Co njikelwisila bubi Babiloni na boshe baje bakala mu Kaudiya
Mwafwa ya byuma byabibi bibanalingi mu Siyone ku mesho eni,” mukemwo mwanendeka Yehova.
25 Yehova nendeka ngwendi: “Obe munkinda muka-kunyongesa njikulwisa,
Njikulwisa obe muka-kunyongesa lifuti-libu lyoshe.
Njolola liboko lyange na kukulwisa na kukwandumuna kutunda ha mamanya,
Co njikupwisa munkinda wa kwenya.”
26 “Banu kubakawana limanya lya mu mbango nambe limanya lya lubula libasa kwambata kuli yobe,
Mwafwa ukapwa ngundu myaka na myaka,” mukemwo mwanendeka Yehova.
27 “Imikeni cimweso* mu lifuti.
Ohyeseni limbinga mu mafuti.
Anguleni* mafuti mangana akamulwise.
Saneni bumwene bwa Alalati na bwa Mini na bwa Ashikenazi mangana bwakumulwise.
Tumeni muka-kusoneka maswalale mangana akatonde maswalale bakulwise Babiloni.
Tumineni Babiloni tubalu mangana bamujemukile ngwe bana ba bimbimba.
28 Anguleni mafuti mangana akamulwise,
Anguleni* bimyene ba Midia na bangubulu bayo na baje banata kuli baka-kuyula
Na mafuti oshe aje abali na kuyula.
29 Lifuti-libu likaninganga na kujaja,
Mwafwa Yehova akalinga byuma byanayongola kulinga hali Babiloni.
Akapwisa lifuti lya Babiloni cuma ca kukomokesa, co naumo wahi akakalamo.
30 Maswalale ba Babiloni banecela kulwa.
Banatumama mu bimpaka byabo.
Nzili yabo inahu.
Banapwoni ngwe banakazi.
Binjibo byendi banabyenyeka.
Tupateso twendi banatupokola.
31 Kanganda umo ashatuka na kukaliwana na kanganda mukwabo,
Co katumwa umo ashatuka na kukaliwana na katumwa mukwabo,
Mangana bakaleke mwene wa Babiloni ngwabo mitambela yoshe ya nganda banaifungulula,
32 Ngwabo myaba yoshe banaishoko,
Ngwabo mato a matebe banawenyeka na tuhya,
Co lalo ngwabo maswalale banalijujukila.”
33 Mwafwa Yehova wa maswalale, Njambi ya Isalele nendeka ngwendi:
“Muna Babiloni wa munakazi napu ngwe lijungwilo.
Simbu ya kumulyatangela manene inete.
Simbu ya kuteja ololo imwizila.”
34 “Mwene Nebukadineza* wa Babiloni nanjibwondo.
Nanjaka mu bitanga.
Nanjipwisa ngwe njaba ya mupulungwa.
Nanjilehula ngwe linyoka wakama.
Nashulisa lifu lyendi na byuma byange byabibwa.
Nanjikushungula.
35 ‘Bubi bunalingiwa kuli yange na bubi bunalingiwa ku mubila wange bukale hali Babiloni,’ ngwabo banu bakala mu Siyone.
‘Co mulonga wa maninga ange ukale ha banu bakala mu Kaudiya’ ngwendi Jelusalema.”
36 Ngeci Yehova nendeka ngwendi:
“Njikusompela ñanda yobe,
Co njikulingila shambandinga.
Njikomisa kalunga-ndonga wendi na kumisa masima endi.
37 Co Babiloni akapwa mutumbo wa mamanya
Na limbo lya bimbanje,
Akapwa cuma ca kukomokesa na cuma cije cibakumbila milozi,
Co wahi akakalamo.
38 Boshe bakonena ngwe bindumba.
Bakabuluma ngwe bana ba bindumba.”
39 “Nga bali mu senga yakama, njikabalingila cilika na kubapendesa,
Mangana balisambe,
Co bakalala tulo twa myaka yoshe,
Kubakenduka” mukemwo mwanendeka Yehova.
40 “Njikabatwala ngwe bana ba bimanga babatwala na kutsiya,
Ngwe bimanga na bimembe.”
41 “Sheshaki* banamufungulula,
Cuma cibakele na kushangazala mu lifuti lyoshe banacikwata.
Babiloni napu cuma ca kukomokesa mukati ka baka-mafuti.
42 Kalunga-ndonga naija na kufwika Babiloni.
Namufwiki na mankimba endi amangi.
43 Binganda byendi binapu cuma ca kukomokesa, binapu mwela wa kujeneka mema na kupwa mambo.
Binapu mwela muje kumukakala banu, co lalo muje kumuketi banu.
44 Njikana Beu kashitiko mu Babiloni,
Co njikamushanjesa byanalehula.
Mafuti kuwakajemukila lalo kuli ikeye,
Co cibumbe ca Babiloni cikawa.
45 Tundeni mukati kendi, eni banu bange!
Teweseni myonyo yeni ku butenu bwa Yehova buje buli na kushukuma!
46 Keti mulijujukile nambe kuziba lyoba mwafwa ya muzimbu umuziba mu lifuti.
Mu mwaka umo muzimbu ukaija,
Co mu mwaka unatako muzimbu ukwabo ukaija lalo,
Kukaija mizimbu ya lwozi mu lifuti na ya baka-kuyula baje balilwisa.
47 Ngeci, taleni! Matangwa ali na kwija
Omwo njikanyongesa tumponya ba kushonga ba Babiloni.
Lifuti lyendi lyoshe likaziba shwamwa,
Co banu bendi boshe baje babakatsiya bakawila mukati kendi.
48 Melu na lifuti-libu na byoshe bilimo
Bikatambeka mu kubwahelela mwafwa ya kuwa kwa Babiloni,
Mwafwa baka-kumunyongesa bakatunda ku kunto,” mukemwo mwanendeka Yehova.
49 “Babiloni kalingisile lika banu ba mu Isalele batse na kuwa,
Oloni Babiloni nalingisa banu boshe ha lifuti-libu batse na kuwa.
50 Yeni munoboka ku mukwale, twaleleleniho kutewa, keti mwimane.
Anukeni Yehova oku muli kulako,
Co anukeni Jelusalema mu bimbunge byeni.”
51 “Banatuzibisa shwamwa mwafwa tunazibi majwi a kushaula.
Shwamwa yetu ili na kusholoka ha bihanga byetu,
Mwafwa banu ba kweka* banaija na kulwisa myela ya kujela ya njibo ya Yehova.”
52 Yehova nendeka ngwendi: “Ngeci, taleni! Matangwa ali na kwija
Omwo njikanyongesa tumponya bendi ba kushonga,
Co mu lifuti lyendi lyoshe baje banabulumuka bakakemanga.”
53 “Nameme Babiloni akalahe kweta na mwilu,
Nameme akanyamese bimpaka bya tuposhi twendi,
Yange njikatuma baje bakaija na kumunyongesa,” mukemwo mwanendeka Yehova.
54 “Tolilileni! Kuli miteto ili na kutunda ku Babiloni,
Kuli na kuzibika miyoyo ya bukalu bwakama mu lifuti lya baKaudiya,
55 Mwafwa Yehova ali na kunyongesa Babiloni,
Akolwesa lijwi lyendi lyakama,
Co miyoyo ibakalinga bitozi bendi ikapwa ngwe mankimba a mu kalunga-ndonga.
Banu bakaziba majwi abo.
56 Mwafwa baka-kunyongesa bakezila Babiloni.
Maswalale bendi bakabakwata,
Mata abo a lusipa bakawapokozola,
Mwafwa Yehova wapwa Njambi muka-kwana kashitiko kanapande.
Cili bene akamulinga shambandinga.
57 Njikapendesa bamyata bendi na baka-mana bendi,
Na bangubulu bendi na baje banata kuli baka-kuyula na baka-kulwa bendi,
Bakalala tulo twa myaka yoshe,
Co kubakenduka,” ngwendi Mwene wa lizina lya Yehova wa maswalale.
58 Yehova wa maswalale nendeka ngwendi:
“Nameme cibumbe ca Babiloni cakala na mpimo, oloni cikabujuka,
Nameme bikolo byendi byapwa byabilaha, oloni bikenya.
Bibakafwitangana banu bikaya mwangwaco.
Bibakondangana baka-mafuti bikaya mu tuhya.”
59 Awa akewo majwi a kapolofweto Jelemiya aje endekele kuli Selaya muna Nelaya, Nelaya muna Mahaseya, mwaile na Mwene Zedekiya wa Juda ku Babiloni mu mwaka wamuciwana wa ciyulo cendi. Selaya ikeye wapwile muka-kutala byuma bya mwene. 60 Jelemiya wasonekele mu libulu limo bukalu bwoshe buje bukezila Babiloni, wasonekele awa majwi oshe a kashitiko ka Babiloni. 61 Kutundaho, Jelemiya walekele Selaya ngwendi: “Muuya ku Babiloni, co muukaimona, unapande kukatanda awa majwi oshe mu kutambeka. 62 Kutundaho ukendeke ngwobe, ‘Obe Yehova, unendeka kutalesa kuli ou mwela ngwobe bakaunyongesa, co kumukakala munu nambe kasitu, co lalo ngwobe ukapwa ngundu myaka yoshe.’ 63 Muukamanesa kutanda eli libulu, ukakutiiyeko limanya na kulyumbila hakati ka Ndonga ya Yufreti. 64 Co ukendeke ngwobe, ‘Omu mukemwo mwakambwitama Babiloni, co kakatufuka lalo mwafwa ya bukalu bunjimunenela, co banu ba mu Babiloni bakajuka.’”
Awa akewo majwi a Jelemiya.