Samu
Kuli muka-kutwamenena. Imbisi ya Jeduthani.* Mwaso wa Devidi.
39 Njendekele ngwange: “Njinyunga bilinga byange
Mangana keti njilinge bubi na ndaka yange.
Njikuta ku kanwa kange
Nga muka-bubi ali ku mesho ange.”
2 Kunjendekele nameme lijwi limo, co njolokele kulu.
Kunjendekele nameme byuma byabibwa,
Oloni njazibile manene kubabala.
3 Mbunge yange yashalukile mu nulo yange.
Munjakele na kusinganyekesesa,* tuhya twatwaleleleleho kushukuma.
Co ndaka yange yendekele ngwayo:
4 “Obe Yehova, njikwase kuzibuka mamaneselelo a kuyoya kwange,
Na ha hawanapu matangwa ange
Mangana njizibuke ngwange kuyoya kwange kwapwa kwa simbu yaindondo.
5 Cili bene unakehesa matangwa ange,
Co myaka ya kuyoya kwange inapu yangoco kuli yobe.
Cili bene munu woshe nameme asholoke ngwe banamunyungilila, napu lika muku. (Sela)
6 Cili bene munu woshe akende ngwe munzinzime.
Akashatozoka* kwa kujeneka seho.
Akalundika bufuko, oloni kazibuka baje bakabulya.
7 Bikoni binjinapande kulabelela, obe Yehova?
Yobe lika lilabelelo lyange.
8 Njobole ku milonga yange yoshe.
Keti utabese cilema anjishaule.
9 Njolokele kulu.
Kunjasele kufukula mu kanwa kange
Mwafwa yobe walingile ebi byuma.
10 Njitundise aka kashitiko kaunanjana.
Njinajuka mwafwa liboko lyobe lili na kunjipupanga.
11 Ukana munu kashitiko mwafwa ya bubi bwendi mangana umusungamese.
Ukali bufuko bwendi ngwe tulongolo.
Cili bene munu woshe wapwa lika muku. (Sela)
12 Ziba lilombelo lyange, obe Yehova.
Tolilila ku kulila kwange kwa kulomba bukwasi.
Keti uyengule misozi yange
Mwafwa kuli yobe njinapu nji munu wa ku lifuti lyeka,
Nji muka-kwenda* uje aita lika ngwe mubakele na kulinga bakukulwila bange boshe.
13 Talesa kweka cihanga cobe ca butenu
Mangana njibwahelele, simbu kanda njitse na kuzimangana.”