Samu
Kuli muka-kutwamenena. Masikiu.* Mwaso wembile Devidi, Doegi wa Kaedomo mwalekele Saulu ngwendi Devidi naija mu njibo ya Ahimeleki.
52 Bika biulishashela mwafwa ya bilinga byobe byabibi obe muka-nzili?
Cizemo ca Njambi cije kucesi kutenguluka cikalako litangwa lyoshe lya mutunu.
2 Ndaka yobe ya kubambuka ngwe kabemba,
Itumba matumbe amabi na kupanga bipangi bya makuli.
3 Wazema manene bubi kutubakana bubwa
Na kukwisa kutubakana kwendeka busunga. (Sela)
4 Wazema majwi oshe aje azibisa bakweni kubabala ku mbunge.
Yobe wakala na ndaka ikendeka makuli.
5 Bikebyo bilingisa Njambi akundyange hasi na kukunyongesa.
Akucapulula mu tenti yobe na kukusanyozola.
Akutukula mu lifuti lya baka-kuyoya. (Sela)
6 Baka-kusungama mubakabimona bakakasama,
Co bakakujola.
7 “Ou ikeye munu uje kapwisile Njambi kupwa butewelo bwendi,*
Oloni wakulahelele bufuko bwendi bwabwingi
Na kukulahela* matumbe endi amabi.”
8 Oloni yange njipwa ngwe muti wa olive wa kuzibalela mu njibo ya Njambi.
Myaka yoshe, njikulahela cizemo ca Njambi cije kucesi kutenguluka.
9 Njikushangazala myaka yoshe mwafwa ya byuma biunalingi.
Njikulahela lizina lyobe ku mesho a bakulongwa bobe
Mwafwa lyapwa lyalibwa.